Storia vecchia/Atto secondo

by Carlo Netti

 EPUB   MOBI   PDF   RTF   TXT

ATTO SECONDO.

In casa di donna Carmela.

Una stanza mobiliata con sfarzo: quello caratteristico d’"a mercante" nel popolino napoletano. In fondo è la porta d’ingresso a vetri, con tendine di stoffa gialla; a destra un uscio. Tra l'uscio e la porta un canapè, delle poltroncine eguali, e più avanti la toelètte col necessario: pettini, piumino, un vasellino per la cipria, un cuscinetto di raso celeste ricolmo di spilli. Addossato a la parete opposta, è un armadio a specchio di palissandro; subito dopo un segretèr dello stegno legno. Sul segretèr fra due candelabri a braccio arde una lampada di cristallo azzurro, dinanzi a l’immagine della Madonna. Al centro de la stanza un tavolino tondo con sopra sei tazze, qualche ninnolo, e intorno intorno delle sedie. Ricca di veli, scende dal soffitto su la tavola, una lumiera a luce elettrica.

È mattina.

SCENA I.

Donna Carmela, Assunta e Pascalino.

(Donna Carmela è davanti a la toelètte e Assunta la pettina. Pascalino, seduto presso la porta, strimpella svogliatamente qualche motivo su di un mandolino).

Assunta

Ve piace accussì?

Donna Carmela

(spazientita) No… no! T’aggio ditto ca cca (si tocca una tempia) è troppo tirato.

Assunta

(con intenzione) E mo ’abbuffammo! (a Pascalino) ’On Pascali?!…

Pascalino

(seccato) Tu che buò?!

Assunta

E che mmalóra! A chi state accumpagnanno?

Pascalino

(c. s.) A te.

Assunta

Ovèro? È buono!

Donna Carmela

Lass’’o i’: ca chillo ogge s’ à fatto na mala roce, e io nu’ mme voglio ntussecà!

Assunta

(a donna Carmela) Ve stevo dicenno: aggio tenuto nu poco ’e fatica superchia. E po’, apprimma mm’aiutava Crestina…

Donna Carmela

(subito, inveendo) Chell’ata… bbona femmena! Guè, dincello ca mme purtasse ’e quaranta lire meie; ca si no lle scippo quanta capille tene ’n capo!

Assunta

Eh, puverella! Sta proprio bona malata.

Donna Carmela

Io voglio sapè sti fatte? Cher’è, s’’e ssapette piglià?

Assunta

’O Signore v’accresce ’e salute. Quarantadoie lire a vuie che ve so’?…

Donna Carmela

Na vota, sora mia, na vota! Mm’ànno miso ll’uocchie ’ncuollo! (forte, perchè senta anche Pascalino) Ah! M’aggio ’accattà nu cuorno luongo na canna!

Pascalino

(a parte) Va’ te cunfiesso, che faie meglio!

(S’alza, posa il mandolino sul tavolo, piglia il cappello ne l’armadio)

Assunta

’On Pascali, ascite?

Donna Carmela

(voltandosi) Addò vaie? Famme chillu cunto ’e don Biagino.

Pascalino

(dispettoso) Mo nun tengo genio.

Donna Carmela

Spìcciate, fa ampresso! E s’ànno ’a passà pure ’e ghiucate int’ ’o libro: ca ogge è sàpato.

Pascalino

Cher’è, ’on Ciccio nun ’e po scrivere isso?

Donna Carmela

È ghiuto esigenno, nun vene pe mo.

Pascalino

Io aggio ’ascì. (resta in piedi, le spalle appoggiate al segretèr, una mano nella saccoccia, mentre ne l’altra fa girare nervoso il cappello)

Donna Carmela

Ma che cànchero t’à pigliato, stammatina, se po sapè?!

Assunta

Meh, ’on Pascalì…

Pascalino

’Un boglio fa’ niente.

Donna Carmela

E schiatta! (disperata) I’ nun mme ne fido cchiù! Chisto mme vo’ atterrà a me! Chisto mme vo’ atterrà…

Pascalino

(borbottando) Nun saccio chi!

Donna Carmela

Stu ’aliòta! Gue’, sa’ che nc’è de nuovo? Si mm’hê ’a ntussecà ’e sta manera, è meglio ca te ne vaie.. Vattenne, so’ cchiù cuntenta!

Pascalino

Dàteme chello ca mme spetta, e i’ me nne vaco.

Donna Carmela

Nu cuorno!

Pascalino

(canzonatorio) Chillo v’ ’o tenite pe vuie: ve serve p’ ’e mal’ uocchie…

Donna Carmela

(con impeto) Pe chi?! Pe chi?! (si leva, gli si fa accosto, i pugni stretti)

Assunta

’Onna Carme?…

Donna Carmela

(c. s.) T’aggio ’a rompere ’a faccia, scrianzàto!

Pascalino

(spallucciando) Seh! Quando piglio e rumpeva!

Assunta

Chesto che significa, Madonna mia! Site mamma e figlio…

Donna Carmela

(fremente di collera) Figlio? I’ nun tengo figlie… Tengo n’assassino!

Pascalino

(in uno scatto) E si vuie fùsseve n’ata mamma, nun mme trattarrìsseve accussì.

Donna Carmela

Uh, faccia mia! (ad Assunta) Vuie ’o sentite?! (a Pascalino) E che te manca, neh? Llate a l’aità toia iètteno ’o sango d’ ’a matina ’a sera nfacci’a nu banco… Io te manno passianno!

Pascalino

Meglio si mm’avesse ’mparato n’arte. Faticarrìa e magnarrìa. Ve credite ca io nun ’e mmirio a chilli lla?

Donna Carmela

E ba fatica! Chi te tene? (gridando) Iesce!

Pascalino

Sì… Vaco a faticà! Vaco a faticà… Ammacàro nisciuno mme rinfacciarrà cchiù niente. Pozzo fa’ chello ca mme pare e piace…

Donna Carmela

(sorride beffarda) Se capisce! Tanno t’ ’a può piglià a chella bella cosa! Chella pupata ’e ficusecche!

Pascalino

Oi mà… abbaràte comme parlate! (È pallido, convulso).

Donna Carmela

(con autorità) Gue’, stu fatto nun succede; nun succede, no. Si t’hê miso stu penziero ’ncapo, lievatillo: ca nun po essere! (con un urlo) No!… No!… No!

Pascalino

(sfidandola) Pecchè, chi ’o ddice?

Donna Carmela

(c. s.) ’O ddich’ io.

Pascalino

(c. s.) Avimmo ’a vedè!

Donna Carmela

(c. s.) E verimmo. (Pascalino esce)

Assunta

’Onna Carmè, meh, fernitela… Mo ve facite venì nu moto!

Donna Carmela

Che nne vuo sapè, Assunta mia! che nne vuò sapè?! Ogni ghiuorno è ’sta storia, tutte ’e mumente! Mme ll’anno affatturato a chillu figlio! Chillo nun cumbina cchiù; nun tene cchiù rispetto ’e niente… ’e nisciuno!

Assunta

Eh! Quanno ’o core…

Donna Carmela

(al colmo dell’ esasperazione) Che core e core! So’ state chilli duie ruffiane d’ ’o pate e d’ ’a mamma.

Assunta

(protestando) Nun ’o dicite chesto…

Donna Carmela

Pascalino ’a cca, Pascalino ’a llà; Pascalino sotto, Pascalino ncoppa… s’ ’hanno fatto cu ’a vocca! Chillo, ch’è nu guaglione abbunato, nc’è caduto… E mo vularriano ca io lle desse ’o cunzenzo? Teh! ànno voglia ’e sbattere!

Assunta

Sentite, nun credo ca si’ Francisco era capace ’e na cosa ’e chesto. È n’ ommo allero, ca lle piace ’a cumpagnia; ma ’ncunto ’e piglià ’o figlio vuosto cu l’inganno…

Donna Carmela

(subito) Pecchè, allora, nun ’o càcceno? ’O ssanno ca io nun boglio. N’ommo ’e principio lle dicesse: "Pascalì, tu, cca, nun nce hê ’a veni cchiù".

Assunta

Ce ll’à ditto. E Pascalino ca nun sente.

Donna Carmela

Sia fatta ’a vuluntà ’e Ddio! Vuò verè mo’, c’a figliemo, lle mancassero belli guaglione!

Assunta

Che nce vulite fa’?!… Se cuntenta isso?

Donna Carmela

Ovèro?! Io songo ’a mamma, e aggio ’a penzà a chello che po succedere dimane! (borbottando entra nell’uscio a destra).

SCENA II.

Si’ Dummineco e detti; poi Don Antonio.

Assunta

(guarda a caso in istrada, vede passare Si’ Dummineco, lo chiama) Psst… Psst… Si’ Dummì?! Si’ Dummì?! (gli fa segno con la mano di avvicinarsi)

Si’ Dummineco

(ad Assunta, senza entrare) Che buò?

Assunta

(tirandolo per la giacca) Venite ’a cca! (ride forte) Sentite…

Si’ Dummineco

(comico) Embè, ’o spasso tuio songh’ i’!

Assunta

(ridendo sempre) Pecchè? (lo accarezza) I’ ve voglio bene!

Si’ Dummineco

(spazientito) Mo se sta… mo!

Donna Carmela

(ritorna). Ched’è? neh, Si’ Dummì?

Si’ Dummineco

(con un inchino, ossequioso) Sèveri vostre, ’onna Carmè.

(Su la porta, in fondo, compare don Antonio; vede si’ Dummineco, incrocia le braccia, tentenna il capo indignato).

Don Antonio

Tu staie lloco?!… (agli altri) Bôngiorno a tutte.

Si’ Dummineco

(gli muove incontro premuroso, timido). ’O i’ cca, mo venevo…

Don Antonio

(c. s.) Seh! N’ata vota te cumbino io ’o servizio: nchiudo ’a porta, e me nne vaco p’ ’e fatte mieie…

Si’ Dummineco

(scusandosi) ’A vi’, ’sta figlia ’e bbona crestiana! ( indica Assunta)

Assunta

(a si’ Dummineco, scherzosa) Busciardo! (a don Antonio) Mmo mmo è trasuto cca!

Don Antonio

E nfì a mo, addo’ si’ stato?!

Si’ Dummineco

Arò avevo ’a sta’? Addo pustiere. E che folla! (a Carmela, che intanto sfaccenda per la casa) Carmè, ’sta semmàna è notte. (strizza l'occhio contento) Tengo tre nummarielle!…

Assunta

Che v’avite iucato? sentimmo.

Si’ Dummineco

Vintuno, sissantacinche e sissantanove.

Donna Carmela

Buone.

Assunta

’O diàvulo è diàvulo: avesse ’a purtà ’o scrupolo? Scrévite, ’onna Carmè: duie solde, l’ambo ’e nu piezzo.

Donna Carmela

E chi scrive? Chillu sfurcàto se n’è ghiuto pure isso! ’Onn’ Anto’, mme facite ’o favore?

Don Antonio

(complimentoso) Tutto chello che bulite.

Donna Carmela

Io ve ringrazio (va a pigliare il libro delle giocate nell’armadio).

Assunta

(a si’ Dummineco) Si piglio, ce spusammo sùbbeto?

Si’ Dummineco

Te staie, o no?!

Donna Carmela

Addo’ v’ ’avite abbuscato?

Si’ Dummineco

Cher’ è, nun sapite niente? (agli altri) ’O fatto d’aieresséra?..

Don Antonio e Assunta

(si guardano con intenzione) Ah!…

Donna Carmela

(curiosa) Qua’ fatto?

Assunta

(a si’ Dummineco) Uh! che ghiate cuntanno… (gli tira la giacca perchè taccia).

Si’ Dummineco

(ingenuamente) Comme?! Chille erano nùmmere bell’ e buono, (a Carmela) Aieresséra, Margaretella, ’a figlia e si’ Francisco…

Donna Carmela

(con interesse) Neh?! Che facette?

Si’ Dummineco

Passanno ’a Maronna, lle scappaie nu chianto! Ma nu chianto!…

Don Antonio

Sapete, la commozione… (subito)

Donna Carmela

(canzonatoria) Vuie vedite! ’E ttene sempe mpizzo mpizzo, ’e lacremelle, chella spiciòsa! (sorridendo maligna) Fìgliemo steva llà?

Si’ Dummineco

Gnorsì.

Donna Carmela

E pe cchesto!… Dàteme, ’onn’ Anto’. (piglia la carta scritta e la porge ad Assunta; poi va a conservare di nuovo il libro nell’armadio) Nce ’a faciarrìa passa’ io, ’a malatìa!

Assunta

(piano, a si’ Dummineco) E comme, cu ’sta vocca nun ve vulite sta’ zitto!

Si’ Dummineco

Ch’ è succieso? (non comprende).

Don Antonio

Vaie a dicere c’ aieresséra…

Donna Carmela

(tornandosi, agli altri) Accussì mme ll’ànno nfanfarruto! Accussì.

Don Antonio

(per cambiare discorso, a Dummineco) Gue’, è venuto ’o signore d’ ’a tavuletta: ’o prufessore…

Si’ Dummineco

Ah! E nce ll’hê data? Chillo mm’à da pavà pure…

Don Antonio

I’ saccio tu addo’ ’o bbaie ’nficcanno, ’a robba? Ha ’itto ca turnava a natu ppoco.

Si’ Dummineco

Giesù! steva arreto ’o stiglio, (a Carmela e Assunta) E permettete, allora. (fa per andare).

Assunta

(trattenendolo) Quanno ce vedimmo? Io si nun ve veco…

Si’ Dummineco

Ma, abbuonicunte, hê ’itto ca te vuò spassa’ cu mmico?! (levando i pugni stretti) Ah! ca si tenesse vint’ anne mancante…

Don Antonio

Eh, sulo vinte!

Assunta

Nun fa niente; a me accussì mme piàceno: stagiunatielie. (Si ride).

Si’ Dummineco

(solleticato) Siente…

Don Antonio

’I si se spiccia! (lo spinge verso la porta).

Si’ Dummineco

(ad Antonio) Tu che faie, neh?

Don Antonio

Abbìate ca mo vengo.

Si’ Dummineco

E viene ampresso (esce).

Assunta

(a si’ Dummineco, canzonatoria) Sùbbeto, te pare! (a don Antonio) Embè, vuie dduie nun ve fidate ’e sta’ nu mumento luntano.

Don Antonio

(sorride).

Assunta

(fingendosi piccata) Io nun ’o ppermetto… I’ so’ gelosa!

Don Antonio

Gelosa ’e che?

Assunta

’E si’ Dummineco. À da essere sulo d’ ’o mio!

Donna Carmela

(sorridendo anche lei) Vire a chesta comme lle prore ’a capa!

Don Antonio

Sapite ched’è? Tutt’’e due ce canuscimmo ’a piccerille. Ce stimammo e ce vulimmo bene come a due fratelli.

Donna Carmela

Chesto è ovèro!

Assunta

(scherzosa) Sarebbe a dicere, avite fatto suggità?…

Don Antonio

(c. s.) Proprio.

Assunta

E si se nzora, a mugliera s’’a piglia pure ’nzuggità?!

Don Antonio

Se capisce…

Assunta

Leva, lè! Nun ’o voglio cchiù.

Don Antonio

Vuie dicite chesto? aggio paura c’ ’o vicchiariello ovèro c’è trasuto… (Assunta e Carmela scoppiano in una gran risata).

SCENA III.

Don Biagino e detti

Don Biagino

(su l’uscio) È permesso?

Don Antonio

Don Biagino egregio! (gli muove incontro affabile).

Donna Carmela

Favorite, ’on Biagì…

Don Antonio

Come si va?

Don Biagino

Eh, comme s’à da i’?! (manda un sospiro).

Don Antonio

(con importanza) La vita è dura!

Don Biagino

Uh!… Avite voglia!

Donna Carmela

Ched’è, neh, don Biagi’?

Don Biagino

Col permesso di questi signori (indica Assunta e don Antonio).

Don Antonio

(tirandosi in disparte con Assunta) Prego. (don Biagino e ’onna Carmela restano in fondo a chiacchierare).

Assunta

(a don Antonio, piano) Chi è, chisto?

Don Antonio

Comme?! ’on Biagino ’o paglietto: chillo ca sta cca ffore… ’o palazzo ’e Gargiulo.

Assunta

(ricordando) Ah! Sì… sì… Dìceno ch’ è nu celebre ’mbruglione!

Don Antonio

Figlia mia: (si stringe ne le spalle) — "Voce di popolo, voce ’e Dio!" —

Assunta

Pure cca è benuto?! Gue’, e pe spugna´ ’sta ’alletta!… (ride)

Don Antonio

Chillo spugnarrìa ’e pprete! (commiserando) Nientemeno, so’ nove perzone ’e famiglia! Isso, ’a mugliera, na sòra, cinque figli… e ’o patrone ’e casa!

Assunta

Uh, puveriello!

Donna Carmela

(forte, a don Biagino) ’On Biagì, ’a verità ’e Dio, pare ca vuie mme stìsseve facenno ’e ccarte! Io voglio ’e denare mieie.

Don Biagino

(persuasivo) Ma, vedete…

Donna Carmela

C’aggio ’a vede?! (sempre più irritata) I’ voglio veré ’e denare!

Don Biagino

(c. s.) E sissignore; chi ve li nega? Io non ve li ho negati…

Donna Carmela

Ched’è, mm’ ’e vulíveve pure annià?!

Don Biagino

Nossignore! Calmatevi; si nun ve calmate…

Donna Carmela

(minacciosa) ’On Biagì, verìte chello c’aite ’a fa’, e pavàteme.

Don Biagino

Certo… Certo. Ho sempre pagato, io…

Don Antonio

(a parte) Càspito! (fa sforzi per trattenersi dal ridere).

Don Biagino

(indicando don Antonio)… don Antonio, qua, può testimoniare!

Don Antonio

(comico) Sì, proprio chesto scevo dicenno… (piano ad Assunta) ’I che campione! (Assunta ride).

Don Biagino

(pigliando coraggio) Datemi nu poco ’e tempo, diàmine!

Donna Carmela

Ancòra?! Ma, cchiù o meno, quanto cànchero aggio ’aspettà?

Don Biagino

(c. s.) Sono cinquanta lire, una sciocchezza!

Donna Carmela

(gli si pianta in faccia spavalda, le mani nei fianchi) ’On Biagiiii!…

Don Antonio

(ad Assunta) Ah… ah! Mo siente!

Donna Carmela

…io vengo ncoppa, e ve rompo ’e gamme a vuie, a’ mugliera vosta, a’ sora vosta, a tutte chilli che t’appartèneno, hê capito? Faccio ’a pazza! ’A pazza!

Don Biagino

(confuso, stordito) Ma… che modo di trattare è questo, ’Onna Carme?! Per chi mi avete preso!

Donna Carmela

(gridando ed eccitandosi sempre più) Pe nu ’mbruglione… Pe nu mariunciello!

Don Biagino

Badate!… (indietreggia fino a l’uscio).

Donna Carmela

’E che?! Che buo’ fa’?… (si slancia come per acciuffarlo).

Don Antonio

(accorre e li divide) Iammo, ’onna Carme!

Donna Carmela

Se ne venette "Cchiù cchiù, cchiù cchià" e mme facette messère cinquanta lire. Sti muorte ’e famme! E chell’ ata scigna ’e sòrete…

Don Biagino

(sotto la porta) ’On Antò, avete inteso? (ad Assunta) Avete inteso?

Donna Carmela

…chillu scupettìno spennato, ca vuleva ’i a ricorrere! (furibonda) Puórteme ’e solde… Puorteme ’e solde, ca si no… (fa ancora per acchiapparlo).

Don Antonio

’Onna Carme, e va buo’; 1’avvocato…

Don Biagino

(fremente di sdegno) Me la pagherai! (ad Antonio e Assunta) Voi siete testimoni…

Donna Carmela

Lasseme Assu’! (cerca di sciogliersi) Lassateme!

Don Antonio

(a don Biagino, mentre lo spinge fuori) ’On Biagì, mo ve n’aite ’a î…

Don Biagino

(allontanandosi) Vampiro!

Donna Carmela

(su la soglia, trattenuta da don Antonio e Assunta) Neh, carugno’?! Ommo ’e niente?!…

Don Antonio

Stàteve zitto; c’alluccate a fa’?! (cerca di farla rientrare in casa).

Donna Carmela

C’à ditto? Comme à ditto? "Rampiéro"?!

Don Antonio

(correggendo) Lampiro…

Donna Carmela

Lampiro a me?! ’On Anto’, che bene a dicere ’sta parola?

Don Antonio

(con un sorriso di commiserazione) Giesù, vuie nun sapite manco che significa e ve pigliate tutta sta collera?! (imbarazzato) Lampiro? Ecco qua: (ricordando) lampiro… Ah, "uno che zuca il sangue".

Donna Carmela

Io zuco ’o sanghe?! Sarebbe a dicere ’o sanghe d’ ’a ggente?…

Don Antonio

(con intenzione) Proprio… Proprio così!

Donna Carmela

(fuori di sè) Mo vedimmo! Si nun mme faccio venì mmano ’a parrucca d’a mugliera, s’ ’a da perdere ’o nomme mio! (prende lo scialle e fa per uscire).

Assunta

Addò iate?

Donna Carmela

Vaco ncopp’ ’a casa…

Don Antonio

Chillo ve fa na querela! Nce à chiammate pe testimmonie…

Donna Carmela

(gridando) A chi?!

Don Antonio

Eh, na vota ’on Ciccio ’o putecaro, p’ ’o piglia’ a maléparole nce avette ’a refónnere ’o riesto appriesso!

Donna Carmela

Sì, ma io nun so’ don Ciccio! Assù, aggio pacienzia, damme n’uocchic a’ casa.

Assunta

Iate, facite ’affare vuoste.

Donna Carmela

Nu zumpo e torno. (fra sè) Io zuco ’o sanghe d’’a gente, neh?! (via).

Don Antonio

(appena so lo con Assunta) Che ciucciarìa c’à ditto chillo! Essa zucava ’o sanghe d’ ’a ggente… (parlando verso l’uscio di dove è uscita donna Carmela) A ll’anema toia! Ncoppa a cinche lire se piglia na lira ’e ’nteresse… (ad Assunta) Il cento per cento!

Assunta

(guardando fuori) Ssst! Avasciàte ’a voce, po venì ’o figlio…

Don Antonio

E ’o Pateterno che a cierta ggente nun ’e fa manco schiaffà ’e faccia ’nterra!

Assunta

Proprio! Accussì iésseno buone pure chilli duie povere guagliune…

Don Antonio

Chi?

Assunta

Margarita e Pascalino.

Don Antonio

(con interesse) Ah!… Sempre contraria?

Assunta

(sottovoce) Mo, à fernuto na storia c’ ’o figlio. Essa vularrìa ca Pascalino se spusasse ’a valla: ’onna Teresina. Capite? accussì ’o capitale se aumenta…

Don Antonio

…e po zucà meglio! Ave ragione ’on Biagino! ll’avesse vasato mmocca! — "Lampiro!" —

Assunta

Stamattina si’ Francisco ha da venì cca pe lle parla ’e stu fatto…

Don Antonio

D’ ’o matrimmonio?

Assunta

Gnorsì: ’a guagliona aieresséra nce cuntaie tutto cose ’o pate.

Don Antonio

Neh? (malizioso) Ma, dichi i’: ’o paté nun ne sapeva proprio niente?

Assunta

’O ssapeva… e nun ’o ssapeva…

Don Antonio

(scrolla il capo, sorride) Capisco…

SCENA IV.

Si’ Francisco e detti

Si’ Francisco

(compare su la porta in fondo) Bôngiorno.

Assunta

Gue’, dicenno Gesù; s’è spezzato ’o chiappo! (gli muove incontro) Si’ Francì, ched’è? A chi iate truvanno?

Si’ Francisco

’Onna Carmela nun ce sta?

Don Antonio

Mo vene… Pecchè?

Si’ Francisco

(riservato) No… Nce avimmo ’a fa’ na chiacchieriatella tutt’ e dduie.

Assunta

A core a core?! (strizza l’occhio con malizia).

Si’ Francisco

(sospira penosamente) Gnorsì.

Assunta

(va a spiare a la porta; poi sottovoce a Francisco) Si’ Francì, astrignite ’e diente!

Don Antonio

(sorride) Gue’?!

Assunta

(franca, energica) Eh, io mme capisco! (a Francisco) ’E guagliune se vonno bene, e essa s’à da fa’ capace.

Si’ Francisco

’E che?! (fìnge di non comprendere).

Assunta

Iammo! ca nuie simmo d’ ’o buttone…

Don Antonio

Che bellu tipo!

Assunta

(a Francisco c. s.) Lle vulite parla p’ ’o figlio?

Si’ Francisco

(scuote la testa scorato) Eh!…

Assunta

Chi v’ ’o ddice?! Cierti vote ’e ccose cchiù difficile…

Si’ Francisco

Sì… sì… accussi sperammo! (guarda supplice in alto) E comme faciarrìa cu Margaretella?! (tace commosso).

SCENA V.

Donna Carmela e detti

Donna Carmela

(entra ancora eccitata e tutta accesa in viso) Ah! mme sento n’atu tanto!.. (vede Francisco, s’interrompe, à un risolino falso) Che so’ sti strate, Si’ Francì?!

Si’ Francisco

(ossequioso) Bôngiorno, ’onna Carme; v’avarrìa parlà.

Donna Carmela

A piacere vuosto.

Si’ Francisco

(a gli altri, scherzoso) Sti signure nun téneno che fa’?

Assunta

Neh?! Nce ne cacciate?

Si’ Francisco

Iate, iate… Lassatece nu poco sule. (a Carmela) Vuie premettete?

Donna Carmela

(c. s.) Ve pare! Chesta è casa vosta.

Don Antonio

Bôngiorno, ’onna Carmè. (a Francisco) Nce vedimmo cchiù tarde. (via).

Assunta

(su la porta, impertinente) Vulisseve nchiudere ’o telàro?!

Si’ Francisco

Eh, faie buono!

Assunta

(attraverso i vetri, con intenzione a Francisco) Facite buone cose pure vuie!… (s’allontana).

SCENA VI.

Francisco e Donna Carmela

Donna Carmela

(sorridendo ironica) Bboni ccose ’e che, neh si’ Francì?!

Si’ Francisco

Nun’ ’a date retta; chella pazzèa.

Donna Carmela

Ah!… (dopo una pausa, durante la quale si ranno guardati scambievolmente, come per leggersi ne l’intimo) Mo stammo sule; che v’ aggio ’a servì?

Si’ Francisco

Vuie mme favurite, (prende una sedia) Premettete?

Donna Carmela

Giesù, n’ ata vota?! Chesta è casa vosta.

Si’ Francisco

(sedendo) Grazie (non sa come cominciare) E vuie, nun v’assettàte?

Donna Carmela

(nervosa) Si’ Francì, si mm’aite ’a dicere caccósa, spicciàmmoce.

Si’ Francisco

Chello che v’aggio ’a dicere… (si ferma timido).

Donna Carmela

Aggio capito, se ne parla n’atu iuorno. Mo tengo che fa’.

Si’ Francisco

No! È meglio ogge… (facendosi animo ) "Tiempo nun cerca tiempo".

Donna Carmela

Embè, allora facite amplesso (siede).

Si’ Francisco

Uh! pe cunto mio… (scrolla il capo, sorride mestamente) Si dipennesse ’a me?

Donna Carmela

(finge di non comprendere) E ’a chi dipenne?

Si’ Francisco

(guardandola fiso negli occhi) ’A vuie!

Donna Carmela

(con un sorriso forzato) Neh?!

Si’ Francisco

(supplichevole) ’Onna Carme, vuie sapite ’e che voglio parla… Vuie ll’ avìsseve ’avuto ’a capì!

Donna Carmela

E ll’ aggio capito! Perciò ve dico: ne parlammo n’atu iuorno… (s'alza, resta in piedi, poggiata con la schiena a la tavola, le mani nelle saccocce del grembiule; spazientita e arcigna. Di tanto in tanto nelle saccocce suonano delle monete).

Si’ Francisco

N’atu iuorno… Pecchè n’atu iuorno?! Doie povere criature stanno ’n pena pe na parola vosta… E nun sulamente lloro! Int’ ’e mmane voste, ogge, nce sta ’a pace d’’a casa mia! tutt’ ’o bene ’e stu povero viecchio… (è commosso).

Donna Carmela

(deridendo) ’I quanta robba, teh!

Si’ Francisco

No, nun pazziate! Nun so’ cose ’a pazzia. Si sapìsseve… (dopo una pausa, con strazio) Ma comme ve firate ’e vede’ suffrì tanta gente p’ammore vuosto?!

Donna Carmela

P’ammore mio?! Che nce traso, io?

Si’ Francisco

Vuie pure sîte mamma! Vuie pure sîte stata figliola… Dice ’a legge ’e Dio: "Nun fa’ a ll’ate chello ca nun vuo’ essere fatto a te."

Donna Carmela

(recisamente) Si’ Francì, io quanno voglio sentere ’a prèreca, vaco ’a chiesa… Senza tanta chiacchiere: ’a ’ntenziona vosta, qual’ è? Ca Pascalino se sposa a Margarita? E levatevello ’a capo: ca stu fatto nu’ po succedere!

Si’ Francisco

No, ’onna Carme, nun dicite subbeto no! Penzatece apprimma si è ghiusto, si…

Donna Carmela

Pecchè nce aggio penzato, ve dico ca no.

Si’ Francisco

’Onna Carme, Dio ’a coppa vede! Dio ve sente…

Donna Carmela

(in uno scatto) E ched’è, sul’a me, vede?! Ma facite ovèro, o pazziate? Ve credìveve proprio ca io putevo accundiscennere a stu matrimmonio?! Uno figlio tengo, chello ca mme costa ’o ssaccio sul’i’… e mo ca s’era fatto bello, gruosso: (con una riverenza, beffarda) "È servito" nce ’o devo a’ figlia vosta!

Si’ Francisco

Margaretella?!… E pecchè? C’avite ’a dicere ncopp’ ’o cunto d’ ’a piccerella mia?

Donna Carmela

Niente; ma nun fa pe fìgliemo. Fìgliemo tene ati ’ntenzione.

Si’ Francisco

(Dopo una pausa, implorando a mani giunte) ’Onna Carmè, ’onna Carmè! Io aggio fatto na prumessa a chilli povere guagliune…

Donna Carmela

(sobbalza, lo fissa acutamente)

Si’ Francisco

… ’e ve fa’ dicere che sì!

Donna Carmela

(irremovibile e cattiva) Embe’, io n’aggio fatto n’ata: ’e dìcere ’e no.

Si’ Francisco

(con un grido d’indignazione) Ma che nce tiene ’n pietto?! Na vreccia?!

Donna Carmela

(sfidandolo) Nce tengo chello ch’è nicessario pe cierta gente…

Si’ Francisco

Ah!… (chiude, disperato, il volto nelle mani)

(Un silenzio)

Si’ Francisco

(con risoluzione improvvisa, drizzandosi) Be’, vuie site ostinata? Ma si fìgliema mme cade malata n’ata vota…

Donna Carmela

(subito, sarcastica) Nun avite appaura!… nun cade malata!

Si’ Francisco

Accusì sperammo: ca sarrìa guaio, pe chi nce ave ’a colpa!

Donna Carmela

(intrepida) Che buò dicere?

Si’ Francisco

Nun ’o ssaccio!…

Donna Carmela

(c. s.) Mm’ ammenacce?!

Si’ Francisco

(gridando, pazzo di dolore) Nun ’o ssaccio?!… Penza ch’io tengo sulo a chella figlia! (la commozione lo vince, lo soffoca. Con un singhiozzo) Io nun tengo c’a essa? Si so’ venuto cca, è stato nu penziero terribbele che mme nce à purtato… Io ll’aggio vista, aiere, cu chella faccella cchiù ghianca d’ ’a cera, chiàgnere, disperarse, comme nun ll’aggio vista quanno steva pe murì… e mme chiammava pecchè… (non può continuare: la voce gli si spezza nel pianto) Aiere, passanno ’a prucessione…

Donna Carmela

(seccata) Va buo’, ’o saccio ’o fatto ’aiere…

Si’ Francisco

’O ssaie?… Appena simmo rummàse sule, mme ll’assettata vicino; nce aggio spiato: Margaretè, ched’è a papà tuio?! E essa mm’ha cuntato tutto cose; da ’o primmo iuorno ca s’è vista cu Pascalino. Ah, si ll’avisse ’ntisa! Tanta ’spressione, tanta belli parole, chi nc’ ’e suggeriva?! (tace rapito. Una pausa). Allora chiammaie a Pascalino…

Donna Carmela

(subito, con dispetto) Facìsteve malamente!

Si’ Francisco

(fermo ed energico) Era duvere. E Pascalino lle giuraie che s’ ’avarrìa spusata.

Donna Carmela

Neh?!… Ma ve site scurdato ca cca nce stevo pur’io! A le corte: fìgliemo si tene na pusizione nce ll’aggio fatt’io! Io, capisce?! cu tant’anne ’e fatica; e nfì a mo nun s’è permiso ’e fa’ che cosa, senza ’o cunzenzo mio. Margarita ’o vo’ bene e nce soffre? Se ll’à da piglià cu chi puteva, e nun ce à puosto remmèrio ’n tiempo… (maligna, aggressiva) Ched’è, nun ne sapìveve niente, vuiate. Nun v’ìreve accorte ’e niente?!…

Si’ Francisco

(con uno scoppio di tenerezza) ’O ssapevo, sì! ’O ssapevo!… Ma chi teneva ’o curaggio!… si pe st’ammore i’ vedevo ca lle turnava ’a vita! Si, iuorno pe ghiuorno, mme pareva cchiù allèra, cchiù bella! Mme so’ miso appaura ’e nce ’o ddì…

Donna Carmela

Pruibìveve a figlìemo ’e veni a’ casa vosta. Se sape, ca stanno sempe azzeccate…

Si’ Francisco

Eh! quanno duie se vonno bene… (sorride incredulo, alza le spalle come per dire: è inutile).

Donna Carmela

(scattando inviperita) Che bene e bene! Site state vuie, c’avite truvato ’o muorzo sapurito, e v’ ’o site fatto cu ’a vocca.

Si’ Francisco

(con un grido) No, nun è overo!!!

Donna Carmela

Aîte aparato ’o mastrillo, e chillu chiòchiero nc’è caduto!

Si’ Francisco

Nun è overo! Chesto nun ll’hê ’a dicere!… Nun t’ ’o permetto! Nisciuno… Manco Dio!!! (la sua anima si solleva in un moto di ripugnanza e di fierezza) E putarrìsse credere na cosa ’e chesta?! Mme faciarrìsse capace ’e na cosa ’e chesta… accusi ’nfame!?… (inorridito) Cu Margheretella mia!

Donna Carmela

’O cuntegno vuosto mm’ ’o fa credere…

Si’ Francisco

Ma qua’ cuntegno?! C’aggio fatto?! C’avimmo fatto! (profondamente ferito) Doppo sissant’anne ’e vita onesta, faticata, Francisco Pèrcopo s’aveva ’a sentere n’offesa comm’ a chesta!… E ’a chi, neh? (ergendosi) ’A chi nun è degna manco ’e ll’alleccà ’a sòia d’ ’e scarpe soie!

Donna Carmela

(livida, fremente) Guè, abbara comme parle, viecchio mbambìto! Abbàra comme parie! Ca si no, me scordo….

SCENA VII.

Pascalino e detti

Pascalino

(su l’uscio, accorrendo) Ch’è stato, Si’ Francì?! Che so’ sti strille?!…

Si’ Francisco

(afferra Pascalino per un braccio, e lo spinge verso la madre) Ah! viene ’a cca… È Dio che te manna! Di’ tu, di’ tu (con sarcasmo) si "t’avimmo fatto cu ’a vocca! (ripete le parole di lei) Dincello tu quanta vote nun bulevo ca tu fusse venuto… Quanta vote te n’avimmo cacciato!

Pascalino

È ovèro. (con voce ferma e a testa alta) So’ stato io ca nun aggio ’ntiso: ammore nun sente a nisciuno!

Donna Carmela

(furibonda) Ah, no?! Vide ca tu te iuoche na brutta carta…

Pascalino

Nun ’mporta, so’ cuntento!

Si’ Francisco

(a Pascalino, singhiozzando) E màmmeta mm’à chiammato ruffiano! Nce à chiammate ruffiane!…

Pascalino

(con impeto, indignalo) Chella è na pazza! Nun’a rate auriénzia…

Donna Carmela

Io so’ na pazza?!… (si avventa sul figlio, gli tira uno schiaffo).

Pascalino

(ha un ruggito di rabbia) Ah!… (afferra una sedia, fa per scagliarla contro la madre; ma Si’ Francisco interviene a tempo).

Si’ Francisco

No… Pascalì! No! È mammeta!!!… (Pascalino indietreggia egli stesso spaventato dell’atto irriverente; nasconde con disperazione il viso nelle mani).

SCENA Vili.

Annarella, poi il Delegato con le guardie

Annarella

(viene di corsa. Appena su l’uscio:) ’Onna Carme, vulite ’a menesta!

Donna Carmela

(con sgarbo) Nun boglio niente.

Annarella

(più piano, sporgendosi nella stanza) ’A squadra! (s’allontana).

(Tutt’ e tre si guardano sorpresi).

Donna Carmela

’A squadra?! E pecche ’sta squadra?!

Pascalino

(quasi contento) È Dio ca te punisce!…

Donna Carmela

(cerca in fretta qualche cosa nell’armadio).

Si’ Francisco

Statte buono, Pascalì (esce).

Donna Carmela

(a Pascalino) Te’ (gli dà il quaderno delle giuocate) fuie ncoppa addo ’a signora Bràico… (lo spinge verso la porticina a sinistra).

Pascalino

No. Se pigliassero tutto cose! so’ cchiù cuntento…

Donna Carmela

(disperata, supplichevole) Assassino! Mme vuo’ vede distrutta?! Mme vuo’ vede! Curre… fa amplesso! (lo spinge fuori. Intanto su la porta, in fondo, compare il Delegato, seguito da quattro guardie in abito borghese. Carmela gli muove incontro con atteggiamento tra il bonario e l’ingenuo).

Il delegato

(s’affaccia nella stanza, guarda se c’è nessuno; poi a Carmela, con un risolino ironico:) Che se dice… neh, Carmè?

Donna Carmela

(affettando indifferenza) Che s’à da dicere, signò? Ô cumànno vuosto.

Il delegato

(dà un occhiata attorno diffidente, scrolla il capo) Eh… eh… eh… (s allontana insieme agli altri).

Donna Carmela

(spia ansimante e spaurita. Appena quelli sono scomparsi, leva le braccia, riconoscente, a l’Immagine ch’ è sul cassettone) Ah! Mamma mia bella… Scànzame sempe Tu! (s’accosta a la porticina di sinistra, fa un fischio,) Pascaliii…!

Pascalino

(rientra, getta sul tavolo il libro che ha portato con sè, siede su la sedia accanto. Con un gesto disperato si piglia il capo fra le mani, resta così).

Cala la tela