Le poesie di Giovanni Capurro
Le Poesie di Giovanni CAPURRO
Tutti i diritti riservati - Proprietà esclusiva della
Casa Editrice Italiana Emilio Gennarelli & C.
Monteoliveto 39 e 40 - NAPOLI - Telef. int. 30-60
Copyright 1918 U. S. by Italian Book Co. New-York
Emilio Gennarelli & C.
Monteoliveto 39 e 40 - NAPOLI = Telefono 30-60
La più importante Casa di Macchine Parlanti e Dischi
Dischi con canzoni Napoletane
cantate dal Comm. FERNANDO DE LUCIA
DISCHI CANTATI
dell’Operetta La Duchessa del Bai Tabarin
Ognuno L 6,50
OPERE COMPLETE IN SPLENDIDI ALBUM
CON RELATIVI LIBRETTI
CAVALLERIA RUSTICANA - RIGOLETTO
TRAVIATA - PAGLIACCI - CARMEN
Assortimento completo
in Corde per Chitarre e Mandolini
Il più completo Catalogo
di edizioni di Canzoni
per Mandolino, Canto e Pianoforte
Spedizioni gratis dietro richiesta
POESIE DIALETTALI
DI
Giovanni Capurro
(Prima Serie)
Tutti i diritti riservati • Proprietà esclusiva della
CASA EDITRICE ITALIANA
EMILIO GENNARELLI & C.
| Monteoliveto 39 e 40 - NAPOLI |
|
Tutti i diritti riservati
Copyright 1919 by U.S. of Italian Book Co. New-York
’A tessera nova
E aggio avuto pur’io ’a tessera nova,
chella d’ ’a pasta e chella 'e ll’uoglio fino;
ma ’a chi aggia avè sta pasta nun se trova,
sulo pe’ ll’uoglio è scritto ’o magazzino.
’O putecaro mio nun m’ha vuluto,
m’ha fatto ’e scuse e ha ditto ch’è cumpleto.
Grazie — aggiu ditto — allora ve saluto,
e sto sbattenno ancora nnanze e arreto.
Tutte cumplete, embè, ma che so tramme?
che lle vuò dì si ’o nummero é arrivato?
Allora vale a dire ca scherzamme,
sta tessera pecchè me ll’hanno dato?
E m’aggio riflettuto chella ’e ll’uoglio,
ma quanto nn’aggia avè nun ce sta scritto:
chisto, parola mia, è nu vero mbruoglio,
fatte ’a nzalata seh, prepara ’o fritto!
Tessera nova, cartuncino rosa,
ha cagnato culore, e che vulite?
Chesto ca mo hanno fatto è n’ata cosa,
e v’ita cuntentà ’e chello ch’avite.
Chello c’avite, sempe si ’o ttruvate,
si arrivate a ll’avè, po tutto è niente,
pecchesto, forze, hanno multiplicate
paricchie ’e sti tagliante o sti tagliente.
Aggiu vista mpezzata cu accurtezza
’a primmavera tutta sana sana;
accummencia cu aprile, che bellezza,
può friere tre vote ’a settimana.
Aprile e stammo a luglio, ite capito?
maggio, giugno, gnorsi, songo ’e ritorno,
so nnummere, accussi ci hanno servito,
hanno puosto tre mise pe’ cuntorno.
Femmene in aria
Dice ca pure ’e ffemmene
s’hanna levà ’o gulio,
e ncielo vonno correre,
ah! sia ludato Dio!
Sempe p’ammore ’e Patria
vurria tenè ’a speranza
ca nzieme risulvennese
vulassero mparanza.
Femmene mie simpatiche
vulate, sì, vulate;
’o cielo sulo è l’unico,
st’idea nun ’a cagnate.
Saglite, divertiteve
cu ’a mbomma e l’arioplano,
cercate ’e ve mantenere
sempe accussì, ’a luntano.
Appena sta nutizia
s’è misa ncoppa ’a stampa
nnanze a ’na bella Vergine
aggio appicciato ’a lampa.
Che bella cosa a sentere:
femmene pàtriote!
Chelle ca nun se moveno
restano a fa ’e carote.
Mmuccateve, mpezzateve,
quanno ce sta l'offerta
pe’ vuie ’o fatto è facile,
tenite ’a porta aperta.
E quante se nn’arapeno,
che suddisfazione
a dì: mia figlia, sorema
mo campa c’ ’o pallone:
Se dice ’o sesso debbole
ma nun è overo niente,
ll’ommo, cchiù scarzo ’e stommaco,
fa tutte ’e ccose a stiente.
Se tratta sulo ’e correre,
n’ esame a votta llà,
iamme ch’è bello a leggere
sempe ’na nuvità.
’A Speranza
’A Speranza è chella forza
che sulleva ogne dulore,
che sturzella ’int’a na morza,
comme ’o ffierro, ogne timore.
È na luce ’a cchiù lucente,
’nu sustegno forte assaie,
è na fiamma ’a cchiù putente
ca nun po stutarse maie.
E che vonno dì ’e preghiere?
che vo dì tanta custanza?
quante so tutte ’e penziere
sustenute ’a sta Speranza?
Fino a mo ’na nota overo
chi l’ha scritto per estesa?
ma chi ’a fa si ’o munno intero
penza, veglia e sta in attesa?
’A vedite chella mamma
dint’a n’angolo ’e ’na stanza?
sente friddo, ma ’na fiamma
tene ncore, e ch’è? ’a Speranza.
Nun s’accorge ca nun tene
cchiù muniglia e cernetura,
penza sulo quanno vene
chella povera criatura!
E gnorsì, pensa ’o suldato!
addò stanno ’e tiempe ’e primma?
’o vrasiere s’è stutato
ma ’a Speranza ’a dà calimma...
Ah! che morte che sarrìa
senza o ffuoco ’e chella llà!
fiamma, vita, unica via
pe’ st’afflitta umanità!
Doppo n’anno
Si, tu si stata accorta,
fina e maliziosa;
dint’a ’na senga ’e porta
facive ’a cuntignosa.
T’ive mparate ’a parte
comme ’a na ricitante,
e a tutto ce vo ll’arte,
pure pe’ fa ll’amante.
Resella e parlà muollo,
’a vutatella ’e ll’uocchie,
’a mana attuorno ’o cuollo,
n’ata ncoppa ’e ddenocchie.
Parole nzuccarate,
mpastate cu ’e suspire,
ma tutte preparate
comme a tanta raggire.
Che garbo, che maniera
pe’ cogliere ’nu core,
tutta n’annata intiera
senza cagnà culore.
Embè, nce so caduto,
so stato affatturato,
pur’io t’aggio creduto,
pur’io me so ngannato.
Durmeva a suonno chino,
me steva cunzulanno,
quanno schiarai matino,
peccato, doppo n’anno!
Me so scetato tarde
ma... nun fa niente: tu
ca spiere e ca mme guarde
nun me faie senzo cchiù.
Nuvula
Tu ca te sfuorze a ridere
quanno te sto vicino,
’o ffai pe’ m’annasconnere
stu core malandrino.
Me vuò fa afforza credere
ca nun te si cagnata,
ma ’o ssaccio pe’ sperienzia
ca tu te sì seccata.
Tu vuò scanzà n’appicceco,
niente vuò fa appurà,
e dice ch’è calunnia
chella ch’è verità.
Pecchè te vene ’a mutria
quanno rest’io cu te,
e sai ca manco n’anema
tanno ce po vedè?
Nun pienze quant’è fauza
sta vocca ca se nzerra?
Nun vide ca t’accusano
st’uocchie acalate nterra?
Suonne e parole tennere
so ghiute tutte a funno?
Pecchè nun me vuò dicere
chello ca m’annascunne?
Suspire, ma na lacrema
nun veco a stu mumento
ca mme facesse lucere
’nu segno ’e pentimento.
Parla; te voglio sentere,
voglio sapè ch’è stato;
dì ch’è passata ’a nuvula,
dì ca mme sò ngannato.
’O fracchesciasse
A Roma hanno penzato
ca dint ’a tratturia
pure p’ ’o fracchesciasse
ce vo n’economia.
Pecchesto ’o cammariere
adda levà l’usanza
’e presentà ’e piatte
vestuto cu eleganza.
Ce vo na cosa corta,
’na specie ’e giacchettella,
senza sti felle arreto
ma stretta e zucatella.
’A robba costa cara
e nun è tiempo ’e sciasse,
cu ’e mbulle, cu ’e decrete,
cu tasse ncoppa a tasse.
Ogne patrone dice:
«magneno ’na miseria,
se nn’esceno diune
e penzano ’a sciammeria.
Tu dint’a nu lucale
comme te vieste ’e gusto,
cu chelli felle appese
senza ’na fella arrusto?»
E stu ragiunamento
è giusto, sissignore,
mo quanno lieve chesto
addò po ghi ’o signore?
A Napule ’e tratture
si fanno pure ’o stesso
’o cammariere ’a sera
sa che se porta appriesso!
’A mancia, a regalia,
miettece nomme penna,
cu ’a giacchettella corta
se ienche e ssacche ’e vrenna!
Allora ’o titulato
quacc’uosso s’ ’o spellecchia,
senza attaccarce idea,
dint’addu Mezarecchia.
E intanto ’o cammariere
c’accumpagnava ’e muorte
penza pur’isso ’e tiempe
quanto so nfame e stuorte!
Se guarda ’o fracchesciasse
ch’è verde quase blu
e dice: «quann’è strutto
a chi accumpagno cchiù?»
- Si è pubblicato
La Regina del Fonografo
Concessione esclusiva di
CARLO LOMBARDO
alla
Casa Editrice Italiane EMILIO GENNARELLI e C
Pezzi staccatti per mandolino L. 0,25
Libretto sole parole L. 1,00
L’interpellanza
Quanno ’nu deputato
vede arrivà ’o mumento
c’adda dà segno ’e vita
stanno a stu parlamento.
Quanno lle pare giusto
ca s’adda friccecà
e ca ’o suffragio bello
ll’adda giustificà,
allora ’o pover’ommo
trova ’na circustanza
e cu fatiche e stiente
scrive n’interpellanza.
Se legge ncopp’o foglio
sta cosa spiccia e lesta,
ognuno aspetta e spera
ma ncopp’o foglio resta.
E chesto è tutto ’o fforte
e sta prufessione,
sapé accucchia tre righe
d’interrogazione.
Tutte dimande perze,
fatte pe’ fa vedè
pecchè chi ll’ave mmano
adda penzà per sè.
Quanno sò troppo assaie
sempe ce sta chi ’e vvò,
è stabilito ’o prezzo
se venneno a chilò.
Si aspiette ’na risposta
miettece nomme fu!
M’avita cecà n’uocchio
si se nne parla cchiù.
’A dint’ ’o lietto
’Na San Giuseppe ’e creta ’int’a campana
me ll’hanno miso ncoppa ’a culunnetta
affianco ’o lietto: è già ’na settimana
che guarda ’o calamaro cu ’a ricetta.
Ce ll'hanno miso apposta o scasualmente?
Cerine, buttiglielle, ciento mpicce
p’avè tutto sott’uocchie prontamente,
’nu libro antico e poche solde ’e spicce.
Ma che vulite ca stu San Giuseppe
nun dà ll’idea d’ ’o pate d’ ’o Bammino:
a chell’aità secava ancora zeppe?
schianava ancora ’o stipo e ’o tavulino?
’O fanno viecchio pecchè accussì vonno
pecchè è cchiù caro quanno è vicchiariello;
uno lle pare ca vedesse ’o nonno
e’ ’o ninno mbraccia ch’è nu niputiello.
Diceno ch’è patrone e prutettore
d’ ’a bona morte, e si; ’o ssaccio pur’io:
forze pecchesto, pe’ nn’avè favore
me ll’hanno miso affianco ’o lietto mio.
Ma che vulite ca tenenno mente
stu San Giuseppe c’ ’o Bammino mbraccia
che morte e morte... chillo, seriamente
tene ’a salute ca lle schioppa nfaccia.
Chillo me fa penzà ll’aità passata,
quann’era assai felice, piccerillo,
quanno papà, bonanema, p’ ’a strata
na vota m’accattaie ’nu cardillo.
E penzo ’o zerro-zerro, ’a trummettella;
guardo stu viecchio ’a notte, stongo sveglio
e veco ’e sciure; ’e zeppole, ’a tiella,
che bona morte, si me sento meglio?
Chello che s’avarria requisì
Pe’ se spiccià cchiù ampressa
e vencere ’a partita
ll’arma che servarria
nisciuno ll’ha capita.
’A Francia, ll’Inghilterra,
stanno vuttanno ’e mmane,
è overo, sissignore,
’nzieme a ll’americane.
Villagge, priggiuniere,
nun hanno cchiù che fa,
stanno piglianno tutto
e cchesta è verità.
Suldate valuruse,
nisciuno abbada ’a morte
e ’nfaccia ’a resistenza
se sentono cchiù forte.
Ma ce vo tiempo ancora,
s’allonga cchiù ’o viaggio
sultanto cu ’a fermezza,
cu ’a forza d’ ’o curaggio.
N’arma putente assaie
pe’ vencere sta guerra,
n’arma ca tutto abbatte
e te scamazza ’nterra.
Ce sta, e nun s’è penzato
’e requisì sti tramme
ca vanno sempe a caccia
’e cape, vracce e gamme.
Piglia nu tramme e ’o tango,
cunfrunta chisto e chillo,
ma ch’è stu tango? è niente,
è nu carrucciulillo.
’O tramme nuoste corre,
s’incendia, te dà ’a scossa,
t’afferra, t’arreduce
’na mappatella d’ossa.
Meglio che dice è notte,
quanno ha pigliato ’e lisce,
embè, va vide ’o tango
sti ccose si ’e capisce.
Panno unico
Dice ca vonno fa ’a rrobba p’ ’e panne
pe’ fa ’e custume ’a pupulazione
sinò cca, pazzianne pazzianne
se resta annuda e manco te n’adduone.
Ll'idea è comme fosse tale e quale
p’ ’o ppane e ’a pasta, e quello è troppo giusto,
tipo unico, chest’è l’essenziale,
’nu panno consistente e assai di gusto.
A me ’o pruggetto nun me dispiace,
ogge ’o custume addò t’ ’o vaie a ffa?
dice: ma ccà poc’ato e vene ’a pace,
gnorsì, ma primma m’aggia cummiglià?
Quanno tu truove ’a rrobba ’e poco prezzo
è nu favore gruosso ca te fanno;
nun ’ita sta a sentì chi fa ’o disprezzo
senza ancora vedè comm’è stu panno,
’O cchiù brutto difetto è a parlà male,
’e rusecà ncoppa a ’na cosa nova;
nfaccia alla legge simme tutte eguale?
embè ’o vestito serve a dà ’na prova.
Chi se veste ’a deritto, chi ’a gnurante,
sempe accussi nun se po cammenà,
ma quanno vanno ’o stesso tutte quante
s’ave ll’idea della fraternità.
Dice: pare ’nu fatto curiuso,
tu mmiezo ’a strada vide nu culleggio!
ma ll’uocchio a ppoco ’a vota ce fa ll’uso
sinò che faie Adamo? e nun è peggio?
Va spia ’nu metro ’e panno quanto costa,
senza sapè ca ’o può truvà tarlato:
nun è meglio ’o custume fatto apposta,
comme si fosse il tipo abburrattato?
Storia Sacra
Diceno ’a gente che il peccato è grande
e ca pecchesto dura stu flagello,
ogge vedete il figlio che cumande
e nu fratello contro a nu fratello!
Addò sta cchiù ’a muralità ’e ’na vota?
l’ammore? l’unistà? mo è tutto inganno;
cca se putesse overo fa ’na nota,
cierti mugliere chello ca te fanno.
C’adda fernì? nun po fernì sicuro,
simmo arrivate a ccose ’e ll’atu munno!
ogge o dimane rimmanimmo ’o scuro
si pure ’o ccisto vuttarranno a funno.
Castigo gruosso! ma cu chi t’ ’a piglie?
guaie ncopp’ati guai, chesto se sente,
chesto se va dicenno p’ ’e famiglie,
e chesto iuorno e sera dice ’a gente.
Embè, scusate, fateme ’a finezza,
se so ingrandite iusto ’e peccate nuoste?
sulo ’na vota nc’era la nettezza?
ch’e? primma cammenavano all’opposte?
Tutte angele cu ’e scelle, se capisce,
tutte divote ’a gente ’e tiempe antiche,
erano scorze tutte quante lisce,
pane ca nun faceva mai mulliche.
E ’o primm’ommo ve ll’ite già scurdato?
Adamo quanno cu Eva fuie unito
subbeto dette ’origene ’o peccato
pecchè? Pe’ se lanzà a primm’appetito.
Isso accettaie il dono, tomo tomo,
comme racconta il vecchio testamento,
quann’Eva lle dicette: «Prendi il pomo»
e lle facette chillu cumplimento!
Perciò ’a ch’è nato ll’ommo ncoppa ’a terra
è nato il male, chesto ’o ssape ognuno;
criscenno ’a razza è asciuta mmiezo ’a guerra
ca o t’arrecchisce o te fa sta diuno.
Almeno Adamo se magnaie ’o frutto;
va bene, ce perdette ’o Paraviso,
ma chillo avetta dì: rutto pe’ rutto
mo me ne faccio n’ato e agghiusto ’o piso!
Comme avette ’a cundanna d’ ’a cacciata
guardaie attuorno, era ’o mumento estremo
e se facette ll’urdema magnata,
nun ce vulette rummanè pe’ scemo.
Ascette maleditto, minacciato,
ma ’o zzuccaro ’o tteneva ancora mmocca...
E doppo? E doppo è stato casticato
pure chi ’e frutte ’e gguarda e nun ’e tocca!
Pro Mutilate
'A sapite? ’A tre culure,
proprio ’a vera milanese:
quatto ’e chelli scatulelle
m’abbastavano nu mese.
Ogneduno preferiva
d’accattà ’a Pro Mutilate
p’ ’a bellezza d’ ’e cerine
ca ce stevano nzardate.
Ma cunforme hanno ncaruta
chesta marca accreditata
s’è truvato ’o patriota
ca nne fa pur’isso n’ata.
Ha pruvvisto zitto e zitto
tutte quante ’e tabbaccare
e redenno ncuollo ’a gente
s’è mmuccato a fa denare.
Si nun fosse capitata
proprio a me chesta pazzia,
v’assicuro francamente,
poco o niente ’a credarria.
Io, se’ solde, e chisti tiempe,
mo nce vo, nun ’e ghiettava;
n’accattava pappacone,
miezu chilo!... E chi ’o ppenzava?
Tu strufìne e struie ’arena
ca sta ncoppa a cascetiella
ma ’o cerino nun appiccia,
se nne cade ’a capuzzella.
E so buone sulamente
pe’ spassà ’a criaturella,
fanno ’a botta e ’a lampetella,
neh? cchiù ’e chesto ch’anna fa?
A poco a’ vota
Ha ditto ’a lavannara
ca nun tenenno ll’acqua
ll’adda piglià ’a funtana
e ca ’o cammino ’a stracqua.
Chell’era tanto esatta,
aggarbatella e brava
e ha ditto ca stu mese
panne nun me ne lava.
’A stiratrice appunto
iere manco è venuta
pecchè, comme sapite
’a posema è ncaruta.
Tene ’a cammisa mmano
e intanto nun s’addona
ca tengo sulo chella
e serve, moscia e bona.
Acqua nun ce n’esiste,
posema nun se nn’usa,
mo chi nun va pulito
almeno tene ’a scusa.
Poc’ato e siente ’o sarto
ca vo cagnà mestiere
pecchè, che ssa, ’o ccuttone
è fraceto, è liggiere.
Quanno va a dà ’nu punto
nfaccia a qualunqua pezza
ll’aco ntrattene, ntoppa
e subbeto se spezza.
Po iesce ’o cappellaro
ca vo cagnà pur’isso:
’a tenta p’ ’e cappielle
vene a custà n’abbisso.
Allora, a poco ’a vota,
iarrammo tutte annuda,
’na moda ’e stilo antico,
còmmeta pe’ chi suda,
Sultanto ’nu mestiere
resta — senza sudore —
e chisto è ’o mpignatore
ca veste comme vo.
’E lamiente d’ ’a spicaiola
E che ve voglio dicere,
cara donna Cuncetta,
pe’ quanto cchiù te fricceche
stai sempe cchiù ristretta.
Me trovo chiena ’e diebbete
pecchè neh? p’ ’a famiglia,
e mentre 'e iuorne passano
’nu soldo nun se piglia.
E vvote pierde ’a mmummara,
te dice ’a fantasia:
«sa che vuò fa? risuolvete,
e mmocchete ’a liscìa».
Senza avè sciorta è inutele,
’a storia nun se cagna;
luotene, sempe luotene
e chesto se guaragna!
’E capezzune ntridece
saglieno sempe a poppa,
che fa, lloro se mporpano
e nuie magnammo stoppa?
Vi c’ata bella musica
se sona a stu paese;
avota e gira e ’o popolo
resta cu ’e mane appese.
Dico buon’io ch’è pioneca,
è proprio niro ’e seccia!
pe’ forza t’è arreduce
secca comme a na meccia.
Apprimma cu na prubbeca
magnave e te vestive,
po dice ca fai scandalo
facenno muorte ’e vive!
Te suonne, e comme, caspita,
manco ’nu suonno bello?
almeno, nun dic’auto,
suonnete n’ambusciello!
Niente: m’avita credere
ncoppa all’onore vuosto
ch’è ’nu destino barbaro,
destino troppo tuosto.
E mo te suonne appicceche,
mo ca te daie a ffuoco;
pare ca siente cocere
o lietto a poco a poco.
Te scite; ’a lampa subbeto
te mettarria ’o ssicuro,
ma è na ’parola; all’urdemo
te truove pure ascuro!
Nun pozzo manco ienchere
’na lampa p’ ’a nuttata;
cummà, quant’è terribbele
’na vita disperata!
E vvote l’arremmedio
cu ll’uoglio d’ ’a tiella;
comm’aggia fa, diciteme
io sola puverella?
Po se ne vene ’o guardio
ca va truvanno ’a tassa,
e a te chisà, guardannolo
p’ ’a capa che te passa!
Mannaggia ll’ova ’e papera
cu chi t’ ’a piglie? embè...
tengo ’a pullanca tennera,
signò, ’nu soldo tre!
’O cupista
Copia ogne cosa, musica, pruciesse,
carte d’ ’o Municipio, chello c’ave;
’o lusingano ’e chiacchiere e prumesse
e ’o fanno vedè ’o Cielo sotto ’e trave.
Corre a dderitta e a manca, va sbattenno,
cunzuma ’e scarpe e nun ricava niente,
torna ’a casa accussì quase redenno,
pecchè se scorda ’e ’na iurnata e stiente.
Ma se scorda p’ ’a figlia ca ll’aspetta,
’a figlia ’a quinnice anne ch’è nu sciore,
ca, senza mamma, a niente cchiù da retta
e nun ne vo sapè ’e parlà d’ammore.
L’ammore suio sempe ’o padre è stato,
anze mo ’o vo cchiù bene int’ ’a strettezza
e quanno ’o vede stanco e affaticato
tutto l’abbraccia e tutto l’accarezza.
L’affligge sulo ’nu penziero brutto
’e quacche cosa ’a ’nu mumento a n’ato!
e tene mente ancora chellu llutto
ca p’ ’a mamma ’a tre mise s’ha levato.
Ma è mezanotte: ’o padre copia ancora
nnanze ’a cannela ca poc’ato tene;
copia penzanno ’o figlio che sta fora;
chisà si ’o vede cchiù, chisà si vene!
Va pe’ nfonnere ’a penna e a primmo lanzo
sbaglia e l’acala ’a fora ’o calamaro.
Ah! dinto a chillu core che rumanzo!
che vita ’nfama e che mumento amaro!
E a chell’ora chi ’o vede a stu cupista?
sultanto ’a figlia ca nun ce se sparte:
— Papà tu sude? — No, mme tremma ’a vista
e ’na lacrema cade ncopp’ ’e ccarte!
’Nu suonno e ’na voce
Me so sunnato n’ammuina ’e gente,
signure, lavurante, mezzo ceto
guagliune e gruosse, pazze overamente
che ghievano currenno nnanze e arreto.
Ma nun erano pazze, era na gioia,
stevano tutte quante assaie allere,
dicevano: «Vivò! Viva Savoia!»
e ’a ccà e ’a llà cacciavano bannere.
’A parrocchia aparata proprio scicca
cu ferze rosse e bianche e ’a frangia d’oro.
Che folla! N’allummata overo ricca,
cantavano o «Te Deum» tutte a coro.
Campane a gloria, strade revutate,
rummore ’e cienti cose, e chi capeva?
Sant’Elmo che sparava cannunate
e a Capitanaria che rispunneva.
’Na festa ’nterra e a mmare, ma ’na scena
ca nun se po cuntà, tant’era bella:
io ve ne do n’infanzia appena appena,
ma comme ’a conto conto nun è chella.
Che suonno! Ma che quatro naturale:
«’A pace! ’A pace!» e po s’è accumminciato
’nu sfrenamiento peggio ’e Carnevale;
ma a chistu punto neh, chi m’ha scetato?
«Dateme ’o cchiummo viecchio, ’o ffierro, ’attone,
cappotte rutte, cazune ausate;
io songo chillo ca v’ ’e ppave buone,
robba ’e lana, giacchette cunzumate... »
E scerianno ll’uocchie aggio penzato:
Giesù! ’nu suonno accussì bello, chiaro,
ll’aggia credere fauzo? m’ha ngannato?
ma... me ngann’io o se nganna ’o sapunaro.
Gente allera
Quase tutte ’e matine,
vaco add’ ’o tabbaccaro,
embè, ’o truvasse maie
o ntussecato o amaro.
Saccio chi tene ’a nzogna
e ’o llardo annascunnuto
e ’o venne a chi lle pare,
pe’ ll’aute l’ha fernuto...
Povero putecaro,
tene nu figlio ’o fronte,
ma tene ’a faccia ’e chillo.
che manna ’e guaie a monte.
Saccio ’nu panettiere
cu ’a folla ca s’accide,
ma ’o panettiere pesa,
fa ’o sperituso e ride.
E ride ’o fruttaiuolo
cu ’na salute ’e toro
pe’ fa vedè ca mocca
tene tre diente d’oro.
Sta allera ’a lavannara
che posa ’o mappatone
e n asa ogne semmana
cu ’a spesa d’ ’o sapone.
E saccio ’o canteniere
ca steva n’arruina
e mo sta sempe allero
pecchè ha miso ’a cucina...
Saccio... e nne saccio tante
ca fanno mpicchie e mpacchie
e se so cummigliate
pure ’e brillante ’e ttracchie,
Ce vo ’a puteca aperta
e, chello ca se sia
vinne a qualunque prezzo
ca vene l’allegria.
Ma chillo ca nun venne
che spera, stenta e scippa
nun se po fa cu ll’ova
manco ’nu poco ’e trippa!
’A Luna
Luna mia bella, tonna, liscia e chiara
comme a ’na grossa lente ’e ngrandimento,
ah! quanto me sarrisse overo cara
si te fermasse ncielo ’nu mumento.
Dice: e che mme vuò fa qualche canzona?
vuò scrivere tu pure Luna argiento?
Levammo ’argenteria, mo se ragiona,
lassa fa a ll’ate ’o solito lamiento.
Io si parlo cu te ce sta ’o mutivo
parlo seriamente, comme amica;
fusse capace mo ’e trasì ncurrivo?
che ce pierde a sentì, fai sta fatica.
Trase ’nu raggio ’e luce p’ ’a fenesta,
spanne e va ncoppa ’o lettino mio
ma, che saccio, è ’na luce troppo mesta,
nun me fa suspirà: ah! Ludato Dio!
Grazie lo stesso, e te ringrazio sempe
pecchè tu ’e mise nun t’ ’e scuorde maie,
e po ’nu poco ’e luce ’e chisti tiempe
cierti mumente vale proprio assaie.
Ma stai luntana, uh quanta e quanta miglia
e può servì sultanto ’e nnammurate;
nun si ’nu lume buono p’ ’a famiglia,
e ’a gente ’e te quase se so scurdate..
Che staie a fa sempe all’istessa altezza?
nun può calà a livello ’e ccase noste?
Scuostete ’a cielo, famme sta finezza
ca ll’ore ’e sera ’e mo song’ore toste!
Ma tu rifliette ll’ommo a che arreduce?
ll’è visto ’o cannelotto o nun l’è visto?
embè, e perchè nun viene a mme fa luce
mo ca m’aggio vennuto ’o lume a ccisto?
L'impiegato cevile
L’impiegato cevile avota a faccia
quanno vede ’a vetrina d’ ’o scarparo:
che guarda a fa? riflette? e che ne caccia?
meglio ca nun se fa ’nu core amaro.
Nfaccia ’o custume addò sta cchiù Pluisette
ca vesteva ’e pupazze ’e rrobbe chiare?
«Tutto cumpleto lire trentasette».
Truovele mo pupazze e barraccare!
L’impiegato cevile mo sta ncroce,
niente lle vene e niente sta magnanno;
sultanto cierte hanno aizato ’a voce
e càmpano accussì, sempe aspettanno...
Se sentono ’o discorso, la proposta,
e s’è parlato ’e Roma, ’e ministero;
se scrive sempe, se cunzuma gnosta,
pruteste, carte e po... zero via zero.
L’impiegato cevile se lamenta
e sfoca tutte ’e iuorne ncoppa ’o foglio;
cerca 'ascì mmiezo, penza, studia, tenta,
e stanno tutte ncoppa ’o stesso scoglio.
’O cummissario d’ ’e cunzume ha ditto:
— Usate ’o llardo e sparagnate ll’uoglio —
Ma ’o llardo ch’è avasciato? addò sta scritto?
cca ce capimmo o no? chisto che mbruoglio?
Se torna a fa n’ata riunione,
’ati pruteste, chiacchiere, pruposte:
chi vo furmà n’associazione,
chi va cchiù ’e pressa e fa ’nu tiritoste.
E passa ’o tiempo comme tutto passa
ma dint’ ’a panza che ce miette?... ’a bile.
Tu si cevile? Embè, guarda chi ngrassa
e cchello ca può fa è... ’a morte cevile.