Femmene in aria
Dice ca pure ’e ffemmene
s’hanna levà ’o gulio,
e ncielo vonno correre,
ah! sia ludato Dio!
Sempe p’ammore ’e Patria
vurria tenè ’a speranza
ca nzieme risulvennese
vulassero mparanza.
Femmene mie simpatiche
vulate, sì, vulate;
’o cielo sulo è l’unico,
st’idea nun ’a cagnate.
Saglite, divertiteve
cu ’a mbomma e l’arioplano,
cercate ’e ve mantenere
sempe accussì, ’a luntano.
Appena sta nutizia
s’è misa ncoppa ’a stampa
nnanze a ’na bella Vergine
aggio appicciato ’a lampa.
Che bella cosa a sentere:
femmene pàtriote!
Chelle ca nun se moveno
restano a fa ’e carote.
Mmuccateve, mpezzateve,
quanno ce sta l'offerta
pe’ vuie ’o fatto è facile,
tenite ’a porta aperta.
E quante se nn’arapeno,
che suddisfazione
a dì: mia figlia, sorema
mo campa c’ ’o pallone:
Se dice ’o sesso debbole
ma nun è overo niente,
ll’ommo, cchiù scarzo ’e stommaco,
fa tutte ’e ccose a stiente.
Se tratta sulo ’e correre,
n’ esame a votta llà,
iamme ch’è bello a leggere
sempe ’na nuvità.
