’Nu suonno e ’na voce
Me so sunnato n’ammuina ’e gente,
signure, lavurante, mezzo ceto
guagliune e gruosse, pazze overamente
che ghievano currenno nnanze e arreto.
Ma nun erano pazze, era na gioia,
stevano tutte quante assaie allere,
dicevano: «Vivò! Viva Savoia!»
e ’a ccà e ’a llà cacciavano bannere.
’A parrocchia aparata proprio scicca
cu ferze rosse e bianche e ’a frangia d’oro.
Che folla! N’allummata overo ricca,
cantavano o «Te Deum» tutte a coro.
Campane a gloria, strade revutate,
rummore ’e cienti cose, e chi capeva?
Sant’Elmo che sparava cannunate
e a Capitanaria che rispunneva.
’Na festa ’nterra e a mmare, ma ’na scena
ca nun se po cuntà, tant’era bella:
io ve ne do n’infanzia appena appena,
ma comme ’a conto conto nun è chella.
Che suonno! Ma che quatro naturale:
«’A pace! ’A pace!» e po s’è accumminciato
’nu sfrenamiento peggio ’e Carnevale;
ma a chistu punto neh, chi m’ha scetato?
«Dateme ’o cchiummo viecchio, ’o ffierro, ’attone,
cappotte rutte, cazune ausate;
io songo chillo ca v’ ’e ppave buone,
robba ’e lana, giacchette cunzumate... »
E scerianno ll’uocchie aggio penzato:
Giesù! ’nu suonno accussì bello, chiaro,
ll’aggia credere fauzo? m’ha ngannato?
ma... me ngann’io o se nganna ’o sapunaro.
