’A Luna
Luna mia bella, tonna, liscia e chiara
comme a ’na grossa lente ’e ngrandimento,
ah! quanto me sarrisse overo cara
si te fermasse ncielo ’nu mumento.
Dice: e che mme vuò fa qualche canzona?
vuò scrivere tu pure Luna argiento?
Levammo ’argenteria, mo se ragiona,
lassa fa a ll’ate ’o solito lamiento.
Io si parlo cu te ce sta ’o mutivo
parlo seriamente, comme amica;
fusse capace mo ’e trasì ncurrivo?
che ce pierde a sentì, fai sta fatica.
Trase ’nu raggio ’e luce p’ ’a fenesta,
spanne e va ncoppa ’o lettino mio
ma, che saccio, è ’na luce troppo mesta,
nun me fa suspirà: ah! Ludato Dio!
Grazie lo stesso, e te ringrazio sempe
pecchè tu ’e mise nun t’ ’e scuorde maie,
e po ’nu poco ’e luce ’e chisti tiempe
cierti mumente vale proprio assaie.
Ma stai luntana, uh quanta e quanta miglia
e può servì sultanto ’e nnammurate;
nun si ’nu lume buono p’ ’a famiglia,
e ’a gente ’e te quase se so scurdate..
Che staie a fa sempe all’istessa altezza?
nun può calà a livello ’e ccase noste?
Scuostete ’a cielo, famme sta finezza
ca ll’ore ’e sera ’e mo song’ore toste!
Ma tu rifliette ll’ommo a che arreduce?
ll’è visto ’o cannelotto o nun l’è visto?
embè, e perchè nun viene a mme fa luce
mo ca m’aggio vennuto ’o lume a ccisto?
