Panno unico
Dice ca vonno fa ’a rrobba p’ ’e panne
pe’ fa ’e custume ’a pupulazione
sinò cca, pazzianne pazzianne
se resta annuda e manco te n’adduone.
Ll'idea è comme fosse tale e quale
p’ ’o ppane e ’a pasta, e quello è troppo giusto,
tipo unico, chest’è l’essenziale,
’nu panno consistente e assai di gusto.
A me ’o pruggetto nun me dispiace,
ogge ’o custume addò t’ ’o vaie a ffa?
dice: ma ccà poc’ato e vene ’a pace,
gnorsì, ma primma m’aggia cummiglià?
Quanno tu truove ’a rrobba ’e poco prezzo
è nu favore gruosso ca te fanno;
nun ’ita sta a sentì chi fa ’o disprezzo
senza ancora vedè comm’è stu panno,
’O cchiù brutto difetto è a parlà male,
’e rusecà ncoppa a ’na cosa nova;
nfaccia alla legge simme tutte eguale?
embè ’o vestito serve a dà ’na prova.
Chi se veste ’a deritto, chi ’a gnurante,
sempe accussi nun se po cammenà,
ma quanno vanno ’o stesso tutte quante
s’ave ll’idea della fraternità.
Dice: pare ’nu fatto curiuso,
tu mmiezo ’a strada vide nu culleggio!
ma ll’uocchio a ppoco ’a vota ce fa ll’uso
sinò che faie Adamo? e nun è peggio?
Va spia ’nu metro ’e panno quanto costa,
senza sapè ca ’o può truvà tarlato:
nun è meglio ’o custume fatto apposta,
comme si fosse il tipo abburrattato?
