’A tessera nova
E aggio avuto pur’io ’a tessera nova,
chella d’ ’a pasta e chella 'e ll’uoglio fino;
ma ’a chi aggia avè sta pasta nun se trova,
sulo pe’ ll’uoglio è scritto ’o magazzino.
’O putecaro mio nun m’ha vuluto,
m’ha fatto ’e scuse e ha ditto ch’è cumpleto.
Grazie — aggiu ditto — allora ve saluto,
e sto sbattenno ancora nnanze e arreto.
Tutte cumplete, embè, ma che so tramme?
che lle vuò dì si ’o nummero é arrivato?
Allora vale a dire ca scherzamme,
sta tessera pecchè me ll’hanno dato?
E m’aggio riflettuto chella ’e ll’uoglio,
ma quanto nn’aggia avè nun ce sta scritto:
chisto, parola mia, è nu vero mbruoglio,
fatte ’a nzalata seh, prepara ’o fritto!
Tessera nova, cartuncino rosa,
ha cagnato culore, e che vulite?
Chesto ca mo hanno fatto è n’ata cosa,
e v’ita cuntentà ’e chello ch’avite.
Chello c’avite, sempe si ’o ttruvate,
si arrivate a ll’avè, po tutto è niente,
pecchesto, forze, hanno multiplicate
paricchie ’e sti tagliante o sti tagliente.
Aggiu vista mpezzata cu accurtezza
’a primmavera tutta sana sana;
accummencia cu aprile, che bellezza,
può friere tre vote ’a settimana.
Aprile e stammo a luglio, ite capito?
maggio, giugno, gnorsi, songo ’e ritorno,
so nnummere, accussi ci hanno servito,
hanno puosto tre mise pe’ cuntorno.
