'A Morte

'A Wikisource.
 EPUB   MOBI   PDF   RTF   TXT
 

[p. 1 càgna]

MENOTTI BIANCHI




’a Morte




Scene drammatiche in un atto






NAPOLI

TOMMASO PIRONTI

Libraio-Editore - Piazza Cavour, 70

[p. 3 càgna]







’A MORTE

[p. 4 càgna]

Opere di

MENOTTI BIANCHI


(Teatro Napoletano)

Rosa Esposito dram. in un atto trad. dial. di S. Di Giacomo. — Edit. A. Chiurazzi 1902.

’A figlia d’ ’a Madonna dram. in un atto trad. dial. di R. della Campa. Edit. E. Chiurazzi 1903. (esaurito).

’O duvere dram. in un atto trad. dial. di E. Pignalosa. Edit. A. Chiurazzi 1905.

Comm’ a nu brutto suonno dram. in un atto trad. dial. di L. Postiglione. Edit. E. Chiurazzi 1905.

Int’ ’o canciello dram. in un atto trad. dial. di L. Postiglione.

’O sfregio dram. in un atto trad. dial. di G. Di Giacomo. Edit. A. Chiurazzi 1905. (2a Edizione).

Notte dram. in un atto trad. dial. di R. Chiurazzi.

’A morte dram. in un atto trad. dial. di R. Chiurazzi.

Nella corrente dram. in 3 atti.

Casa di prestiti dram. in 3 atti.

Il pittore comedia in 3 atti.

Il fato dram. in 3 atti.

Le miserie di D. Biagio comedia in 3 atti.

(Teatro Siciliano)

Comparatico dram. in un atto con prefazione di G. Verga ill. da E. Matania. Edit. S. Romano. Napoli 1890. (esaurito).


I contadini dram. in 3 atti.

Gli emigranti dram. in 5 atti.

Sull’Etna dram. in 2 atti.

La chiusa dram. in 1 atto.

La madre dram. in 1 atto.

Il nuovo Messia dram. in 1 atto. [p. 5 càgna]

MENOTTI BIANCHI




’a Morte

DRAMMA IN UN ATTO











TOMMASO PIRONTI

Libraio-Editore — Piazza Cavour, 70

NAPOLI

[p. 7 càgna]



PERSONE


D. Sufia ’a nirone, mercantessa

D. Amalia.

Crescenzo, cocchiere da nolo, marito di D. Sofia.

D. Eugenio, impiegato al Monte della Misericordia.

Luca, artista pittore.

Emilio, studente.

Salvatore, operaio di Guppy.

Mariano, muratore.

D. Ferdinando, medico.

Concettina

Franceschella, ragazza di servizio di D. Sofia.



[p. 9 càgna]


LA SCENA


Il basso di D. Sofia. Parete sinistra: in centro, un gran letto d’ottone lucente, con una ricca coperta di seta damascata; appesa al muro, una cornice ovale, dorata, chiude un’immagine dell’Addolorata con le sette spade d’argento in petto; poco discosto, più in giù, una pila di argento per l’acqua benedetta e due candele listate di carta rossa e gialla; ai lati del letto due comodini di mogano a pulitura. Parete di fronte: un armadio a due luci con specchi ai due lati dell’armadio, due chiffonnières con sopra due grandi quadri dorati, uno con l’oleografia di S. Vincenzo Ferreri, l’altro con quella di S. Anna, e con lampade, candelieri e candelabri. Parete destra: la porta d’entrata; da un lato una cristalliera fornita di piatti, bicchierini, bicchieri di cristallo, e di argenteria; dall’altro un tavolinetto filettato d’oro, con un paesaggio dipinto sopra. Dal soffitto pende un lampadario di cristallo guernito di steariche rosse; una dormeuse con fodera bianca ai piedi del letto; sedie di Vienna; un tondo con marmo bianco, in centro della camera. Sono le ore antimeridiane di un giorno di marzo.


[p. 11 càgna]


ATTO UNICO



A              

Gerolamo Rovetta



SCENA 1.a


D. Sofia e Crescenzo

(D. Sofia è seduta su di una poltrona, con parecchi guanciali dietro la schiena; è pallida, sofferente. Crescenzo le siede vicino e cerca di confortarla).

D. Sofia (con un filo di voce). É fenuta pe me!... Mm’ ’o sento!...

Crescenzo. Vattenne, ca finchè c’è vita, c’è speranza.

D. Sofia (con tristezza). ’O ssaccio... Tu comme haie ’a di’, pe mme dà curaggio? Rieste vidovo, nun ce penzà, e te puó spusà a ’Nnarella cu ’e denare mieie.

Crescenzo. E sempe ’a stessa canzona!

D. Sofia. Tu ’a vuó bene a ’Nnarella... e chi sa si nun so’ state ’e ghiastemme soie!...

Crescenzo. Tu qua’ Nnarella ha fatto a te!...

[p. 12 càgna]D. Sofia. N’ato poco, e t’’a spuse... e c’ ’o sanghe mio, c’ ’o sudore d’ ’e fatiche meie...

Crescenzo. Sufì, penza a sta’ bona! Che vaie mettenno mmiezo, mo! Mmece ’e te mettere ’ngrazia e Dio, ca te l’ha ditto pure ’o cunfessore.

D. Sofia. (con terrore). ’O cunfessore?! ’O cunfessore... è overo, chesto m’ha ditto: — Sufì, figlia benedetta, miettete ’ngrazia ’e Dio, na vota pe sempe... E ave ragione... Giesù Cristo pecchesto mm’ha fatto arreducere accussì... e po’ se n’è scurdato!...

Crescenzo. Vattenne, ca Dio nun abbandona a nisciuno... e specialmente a chi se pente... Fa chello che t’ha ditto ’o cunfessore, e nun te n’incarricà.

D. Sofia. E chesto farraggio. Aggio mannato già a chiammà pe Franceschella na bona purzione ’e gente, p’ ’e pave che tengo dispenzate, e l’aggio mannato a di’ ca nun voglio manco na cientesemo ’e ’nteresse... Mme voglio ritirà sulo ’o capitale, e niente cchiù. Faccio buono?

Crescenzo. Buono.

D. Sofia. (addita il comò) Tira ’o primmo teraturo d’ ’o cumò: llà ce stanno sei fazzulette ’e seta, e sei scialletielle ’e lana; pigliatille e vide d’ ’e vennere pe chello ca mme costano... cinche lire l’uno e... ammeno accussì scacciammo ’a tentazione..

Crescenzo. Va buò: po’ se ne parla ’e chesto.

D. Sofia. No: primm’ ’e mo... Tu nun saie nuiate mercantesse che passione tenimmo pe stu mestiere... Simmo tentate ogne minuto sicondo...

[p. 13 càgna]Crescenzo. (va a chiudere il tiretto). E va be’: io mo ’nzerro e me porto ’a chiave cu mmico.

D. Sofia. Accussì pure va buono... Ma saie chedè? Io vuleva ’ntruità subbeto subbeto ’e donare mieie, pecchè, capisce?, a prezzo ’e costo tu l’avarrisse vennute ampresso ampresso... Ma basta: nun fa niente: stanno ’nchiuse dint’ ’o cumò, e pure è ’o stesso.

Crescenzo. Penza a Dio, ca te fa santa.

D. Sofia. Ch’aggia fa’? Perdo chello pucurillo ca m’avevo abbuscà... Tanto pe tanto mo è ghiuta ’a varca a mare! Accussì! po essere ca me levo ’o vizio (una breve pausa, poi con rimpianto) Vizio! E già... c’aggia dicere mo? nu vizio, ca s’abbuscano ’e dudece carri c’ ’a pala...

Crescenzo. Se sape: ’o ciento pe’ ciento ’o mese.

D. Sofia. E chello ca se perde nun ce ’o mmiette? Parle bello, parle... E ti ’a sta zitto pure... si no si appurano ’o debole, e nisciuno pava cchiù.

Crescenzo. Sì, ma tu nun hè perduto maie nu sordo... Si tutte ’e banche se sapessero fa’ pavà, comme te saie fa pavà tu, t’assicuro ca nun se sentessero fallimente.

D. Sofia. Povera a me! Già: tu me si’ stato sempe cuntrario.

Crescenzo. Se capisce... ’A cuscienzia ’nnanz’ ’a tutte cose...

Sofia. E mo ca te lasso ’e denare mieie, cu che cuscienza t’ ’e piglie?

Crescenzo. Primma ’e tutto, chesto nun succederà maie, [p. 14 càgna]pecchè tu staie bona, ma si’, a ffunno ’e mare pozza i’, succedesse, io ne facesse sempe dicere messe a l’aneme pezzentelle.

D. Sofia. ’O ssaccio... tu si’ ommo ’e cchiésia e quanno muore truove ’e porte d’ ’o paradiso aperte... A me m’ attocca l’inferno... ’o ssaccio... ’o ssaccio... (piange).

Crescenzo. Tu chiagne? E che so’ sti lacreme? ’Ncapo a te, ca tutte ’e peccature vanno ’a casa ’o diavolo? Sì, staie fresca... Si sapisse quante se ne sarvano pe nu minuto, nu sicondo sulo ’e pentimento sincero... E tu l’hё avuto!

D. Sofia. Accussì fosse overo!

Crescenzo. Ce vo’ ’a fede: ’a fede sulamente.


SCENA 2.a

Franceschella e detti

Francischella. Donna Sufì?

D. Sofia. Guè, Franceschè, si’ stata a du tutte quante?.. L’hé ditto ca ’e voglio assolutamente, nicessariamente?...

Francischella. Gnorsì. Comme m’avite ditto vuie. Sulo a Cuncettina ’a sarta nun l’aggio truvata; ’e figlie mm’hanno ditto ch’è ghiuta anfino a ’ncoppa ’agenzia ’e don Mariano pe fa nu pigno...

Crescenzo. Povera guagliona! S’è zeffunnata ’a ch’è muorto ’o marito! Cinche aneme ’e Dio: e tutte ’e cinche comme ’e dete d’ ’a mano!

[p. 15 càgna]D. Sofia. Guè, a la fine è figliola: ce stanno tanta vie pe ghi’ ’a Roma!

Crescenzo. Cuncettina, però, comme tu saie, è na figliola onestissima...

D. Sofia. Chi campa deritto, campa afflitto! (Dolendosi). Ah! Mamma d’ ’o Carmene! Che dulore! Cca sta ’o mmale mio, cca ddinto!... (Toccandosi la pancia).

Crescenzo. Signò, miettece ’a mana toia!

D. Sofia. Na furnace cca dinto!... Me sento ardere ’e stentine ’ncuorpo... Ah! San Giro beneditto! Vengo scàveza anfino a Puortice, si mme faie sta grazia... Criscè!... Siente... Nun te sfasterià... Mme vuò fa nu piacere?

Crescenzo. Dice.

D. Sofia. Si putisse passà nu mumento addu chella mariola d’ ’a rossa...

Crescenzo. Pecchè?

D. Sofia. Mm’ha da dà vinte lire; e nfino a ogge ancora mm’ha da mannà nu soldo...

Crescenzo. E parle ’e te mettere ’ngrazia ’e Dio?!

D. Sofia. Allora, comme dice tu, mme vuò fa perdere pure ’o capitale?

Crescenzo. Siente a me: aizele ’a mano...

D. Sofia. (a poco a poco accalorandosi) Aizele ’a mano?! E già! Tu te l’ ’e faticato cu l’anema ’e mammeta! Ch’aggio ditto che voglio ’o ’nteresse? Io voglio ’o sanghe mio, ’o sanghe mio sulamente... E sì! Mo lle manno pure nu cumprimento appriesso! Si avesse tenuto a n’at’ommo vicino, all’ora ’e mo... [p. 16 càgna]chi sa?.. Ma aggia sta bona!... Puverella a essa.

Crescenzo. Figlia mia, ’o Pat’Eterno te sta aspettanno cu ’e braccia aperte.

D. Sofia. Ma comme aggia fà? Io mme scordo, mme scordo ’e tutte cose... (Si commuove). Sto ’npunto ’e morte, è overo; ma mme vene n’impulso, ca mme fidasse ’e passà pure nu guaio cu chi m’ha da dà nu soldo!

Crescenzo. Nun ’mporta: nun te piglià collera... (Donna Sofia si riversa con la testa sulla spalliera della poltrona). He visto? Tu t’arragge e te faie cchiù male. Nun penzà a niente, ca ’e denare veneno cu ’e piede loro.

D. Sofia. Si. Aie ragione: nun voglio curà niente cchiù. Sulo ’a salute mia... (alla ragazza di servizio) Franceschè, he avisato a tutte quante che venessene addu me?

Francischella. Nun dubitate. M’hanno ditto che veneno.

D. Sofia. E quanno po’?... Criscè, dà nu fazzuletto ’e seta a Francischella... (Crescenzo fa per cercare la chiave del comò nella saccoccia, quando D. Sofia lo ferma con la mano) Ma mo tu già ’e nchiuso ’o teraturo... Ce ’o daie n’ato iuorno.

Francischella. C’ ’o commeto vuosto, donna Sufì. Io nun vaco truvanno chesto.

Crescenzo. (Sottovoce alla ragazza) Va bene: ’o fazzuletto t’ ’o dongo io dimane.

D. Sofia (sospettosa) Che ll’hë ditto?

Crescenzo. Che fosse iuta a chiammà ’o miedeco.

D. Sofia. E pecchè? Io nun ’o voglio...

[p. 17 càgna]Crescenzo. Chesta è n’ata fissazione...

D. Sofia. Vattenne ca chillo è nu ’mbruglione.

Crescenzo. Pure chesto!

D. Sofia. Pecchè? Nun aveva ditto ca era gravidanza stu nturzore?!

Crescenzo. Tutte quante ponno sbaglià.

D. Sofia. Seh! Isso sbaglia, e io mme ne vaco ’o campusanto!


SCENA 3.a

D. Ferdinando e detti.

D. Ferdinando (dalla soglia) E’ permesso?

D. Sofia. Guè! ’E vuie stevemo parlanno...

D. Ferdinando. Forse per la bevanda, che é un poco amaretta?

Crescenzo. Già. Dice ca è troppo amara.

D. Ferdinando. Figlia mia, a la fine è nu calmante. E poi, come si dice?, amaro, tienelo caro!

D. Sofia. No... No... Io nun voglio niente cchiù! Voglio murì!

D. Ferdinando. Ma la scienza non lo permette.

D. Sofia. I’ ch’ata scienzia tenite vuie! Mm’avite pigliati pe’ prena, m’avite pigliata!

Crescenzo. Sufì! Sufì!... Accumminciammo!

D. Sofia. Vattenne, va te fa squartà tu pure!... ’O miedeco! E’ meglio ca ve mettile a fa ’o ferracavallo, mmece d’accidere ’a carna vattiata...

D. Ferdinando. Ma, don Crescenzo! Questo è troppo!

[p. 18 càgna]Crescenzo. Duttò, cumpatitela: è ’a malatia.

D. Ferdinando. Vedete... Solo per rispetto vostro mi sto zitto, (a donna Sofia) Poi, del resto, voi siete la padrona di farvi curare da chi vi pare e piace. Pagatemi, e felice notte.

D. Sofia. Ve pavo?! E che m’avite fatto stà bona?

D. Ferdinando. Oh! Bella questa! Secondo voi, per essere pagati, dovremmo guarire tutti? Eh! E starriemo frische!

D. Sofia. E allora è meglio che ve mettite a fà ’o schiattamuorte!

D. Ferdinando (a Crescenzo). Ma la sentite?!

Crescenzo. Sufì!...

D. Sofia Ma che ve site miso n’capo, tu e isso? Ve credite ca cca ’e denare se ietteno?

D. Ferdinando. Questo non m’importa.... Vi ho curata per più di due mesi; e quindi....

D. Sofia. V’aggia ringrazià pure appriesso? Vuie pe nu miraculo’ e Giesù Cristo nun mm’avite accisa primma d’ ’e iuorne mieie..

D. Ferdinando. Ecco quanto mi tocca di sentire per non essere stato cauto...

Crescenzo. Duttò! Chella è femmena, e parla addò va va!

D. Ferdinando. Ma la mia dignità...

D. Sofia. Nè... don comme ve chiammate vuie, ma che ve credite ca io tengo ’e mane attaccate? ’A dignità!... Guardate chi parla ’e dignità!

D. Ferdinando. Ora, basta!

D. Sofia. Pecchè? Mm’avisse ’a vattere? (fa per alzarsi) Mo mme faie saglì ’o sanghe ’a parte ’a capa!...

[p. 19 càgna]D. Ferdinando. A me?!

D. Sofia. Sì, a te!

Crescenzo. (si alza e si pone fra i due; avvicinandosi di più al medico, gli dice sottovoce) Don Ferdinà, nu poco ’e prudenza, si no chella ve vatte.

D. Ferdinando Be’ pagatemi, e finiamola.

Crescenzo. Sufì, figlia mia benedetta, nun te sbollere! (sottovoce) Tu ’o ssaie ca ’e miedece, doppo c’accideno, pure s’hanno a pavà.

D. Sofia. E chillo tene chella maniera...

D. Ferdinando. Ma, scusate: vuie parlate ’a schiovere.

Crescenzo. Venimmo a nuie (al medico) Quanta visite avite fatte?

D. Ferdinando. Sentite: non parliamo di visite, perchè sono più di duecento.

D. Sofia. Chedè? Ogne vota che veneva era na visita?

D. Ferdinando. Ve site scurdata ca venevo ’a matina, ’o mezzogiorno e ’a sera?

D. Sofia. Ih, comme ’o vennite caro! Na scarfatura ’e seggia m’ ’a passate pe visita?

Crescenzo. Va be’ pavalo, e nun fa chiacchiere..., Duttò, quanto avite ’avè?

D. Ferdinando. Che debbo dire? Fate voi.

Crescenzo. Dicite vuie, ca è meglio.

D. Ferdinando. Be’ fate duecento lire.

D. Sofia. (ha uno scatto e salta dalla sedia come spinta da una molla) Duiciento scannaturate n’canna!. E chi ’e tene duiciente lire!

D. Ferdinando. ’E denare mancano a me, non a voi.. Capisco ca ve sape a duro; ma non c’è che fare.

[p. 20 càgna]D. Sofia. E si nun ve voglio dà manco nu sordo?!

D. Ferdinando. E se vi mando una citazione?

D. Sofia. Io nun tengo che perdere...

D. Ferdinando. Questo poi lo vedremo, si tenite che perdere...

Crescenzo. Nonzignore, chesto nun ce ha da essere (a sua moglie) Piglie ’e denare e dammille a me, ca mo acconcio io...

D. Sofia. Ma quanto vuò, ’a me puverella?

Crescenzo. Damme cinquanta lire: iammo.

D. Sofia. Cinquanta lire?!

D. Ferdinando. Ma per fare che cosa?

Crescenzo. Pe ve pavà...

D. Ferdinando. Cinquanta lire! Ma vuie state pazzianno?

Crescenzo. No, io dico seriamente...

D. Sofia. Poveri denare mieie!

D. Crescenzo. Facimmo iusto sissanta.

D. Ferdinando. Che vendiamo all’asta pubblica, forse?

Crescenzo. Sissanta lire, meh!

D. Ferdinando. Impossibile!

Crescenzo. Ottanta.

D. Sofia. Guè, ma che ghiammo arrubbanno? Tu a quanto vuò saglì?

D. Ferdinando. Per farvi vedere quanto son galantuomo, datemi cento lire, e finiamola così.

D. Sofia. Mio signò, vuie nuvanta lire ’e vulite? No? E allora facite chello che vulite vuie.

Crescenzo. (sottovoce al medico) Duttò, pigliatevelle, ca ve dongo io l’ate diece lire.

[p. 21 càgna]D. Sofia (a Franceschella) Si’ rimasta là mpalata! Te muove o nu’ te muove? Là int’ 'o tiraturo d’ ’a culunnetta piglia 'o sacchetielio d’ ’e denare.

Franceschella (esegue l’ordine della padrona e porta il sacchetto. D. Sofia incomincia a cavare da esso due tondi da cinque lire che consegna al marito). Chesto succede! Quanno dinto a na casa arriva a mettere pede ’o miedico… So’ duie… tre… quatto.. cinche....


SCENA 5.a

D. Eugenio e detti.

D. Eugenio. E’ permesso?

D. Sofia. Don Eugenio! Favorite. Favorite.

D. Eugenio Grazie.

D. Sofia Francischè, piglia na seggia a Don Eugenio.

D. Eugenio. Non vi pigliate fastidio: mm’ ’a piglio io stesso. (piglia una sedia e siede)

Crescenzo. Senza ceremmonie.... Io tengo ’e mmane ’mbarazzate.

D. Sofia. (al marito) Avimmo cuntato?

Crescenzo. Cinche cuoppe.

D. Sofia. Sei… sette… otto… nove… diece…

D. Ferdinando. Scusate, sti solde sono per me?

D. Sofia. Pecchè? nun ’e vulite?

D. Ferdinando. Ma io non sono venuto a riscuotere con l’asinelio.

D. Sofia. Pecchè, non so’ danare?

Crescenzo. Va bene, duttò, nun fa niente; (al medico, [p. 22 càgna]mettendogli nella saccoccia i rotoli da cinque lire). ’O vedite cca: ve ll’aggio sistemate io stesso (poi sottovoce) Aggiate pacienza… Nun ’a cuntrariate… E’ malata, capite? (alla moglie) Sufì, e l’ati quaranta lire nce ’e daie ’e carta?

D. Sofia. Si ’e tenesse, pecchè no?

D. Ferdinando (irritato) Ma!…

Crescenzo. Allora nce ’o daie ’argiento?

D. Sofia. ’E bi’ cca: duie cuoppe ’e vinte lire l’uno (al medico) Avite ’avè niente cchiù?

D. Ferdinando (intascando il denaro) Nonsignore… Ah! Povero Esculapio!.. Statevi bene. Vi ringrazio… Statevi bene… (esce).

Crescenzo. Conservatevi…

D. Sofia. Te pozzano addeventa gravunelle, sperammo a Dio!

D. Eugenio. D. Sofia… La verità, non so cosa vogliate da me. Io vado perfettamente in regola col pagamento, come sapete.

D. Sofia. Sissignore, sissignore… Io ’e vuie nun ne pozzo chiudere vocca… V’ ’aggio mannato a chiammà pe ve dicere ca ’o ’nteresse che m’avite ’a da v’ ’o cundono.

D. Eugenio. (con meraviglia) Dite sul serio?!

D. Sofia. Don Eugenio mio, io sto’ malata assaie, assaie malata e me voglio mettere nu poco ’ngrazia ’e Dio.

D. Eugenio. Quanto siete buona!.. Ma che ve sentite?

D. Sofia. ’O male mio sta cca dinto… (si tocca la pancia).

[p. 23 càgna]D. Eugenio. Povera Donna Sofia!

D. Sofia. Sulo Dio me po salva! A isso, a isso sulamente tengo fede!

D. Eugenio. Non dubitate, guarirete subito… E diciteme na cosa… Viene a dire… che io non vi debbo più nulla?

D. Sofia. (con scatto). D’ ’o nteresse? Ma ’o capitale m’avite ’a dà quanto cchiù priesto è possibele.

D. Eugenio. Donna Sofia mia, se non viene il ventisette del mese, non vi posso servire… Voi lo sapete. Il Pio Monte della Misericordia paga il ventisette. Però vi avverto che non vi porto tutto. Quanto più posso: ecco.

D. Sofia. Facile vuie… Vuie site nu galantomo… Chi sa! Forse, quanno venite ’e vintisette, nun me truvarrate nemmeno… Ma vuie restate tutte cose a Criscenzo… Avite capito?

D. Eugenio. Non dubitate. Fino all’ultimo centesimo.

Crescenzo. Site rimasto cuntento?

D. Eugenio. Contentissimo, vi pare! Fino a mo ho pagato già tre volte il capitale, pagando solo gli interessi.

Crescenzo. E che vulite di’?

D. Eugenio. Voglio dire ca… na vota che me trovo abballanno, voglio paga pure l’interesse, e da voi non voglio essere beneficato nemmeno d’un soldo.

D. Sofia (sorpresa) Ah? Giesù! Va a fa bene ’ncoppa a sta terra!

D. Eugenio. Io ve ringrazio d’ ’o bene vuosto… Il mio desiderio è di pagarvi tutto.

[p. 24 càgna]Crescenzo. Ma sapite ca site nu bello tipo?

D. Eugenio. Io non voglio niente da voi. Comme ’o vulite capi?

D. Sofia. Guè! Nun v’alderate... Facite comme vulite vuie... ’E ventisette quanto mine purtate?

D. Eugenio. Cinquanta lire.

D. Sofia. Sentite a me, e ll’ati cinquanta ’e ’nteresse v’ ’e perdono.

D. Eugenio. Io nun ’e voglio… Avrete tutto. Dovessi toglierlo di bocca ai miei figli!


SCENA 6a

Luca e detti.

Luca (un giovanotto smilzo e simpatico. Gesticola sempre). M’avite mannato a chiammà, donna Sufì? Ma avite avè ’a buntà d’aspettà n’ato poco… Ora mi trovo assicco a denare e nun tengo nemmeno per pagarvi gl’interessi.

D. Sufia. No: nteresse nun ne voglio cchiù; aggio aizato ’a mana a tutte quante!

Luca (con un gesto di grande sorpresa) E comme va?

D. Sofia. Pe fà na bona azione.


SCENA 7a

Tore, Mariano e detti.

Tore. Salute e bene!

Mariano. Donna Sufì, sèveri voste!

D. Sofia. Turì, Maria, v’aggio mannate a chiammà [p. 25 càgna]pe ve dicere ca nun voglio cchiù ’o ’nteresse d’ ’a pava che tenite mmano.

Tore (che ha già i soldi nelle mani) Allora vene a di’ ca m’ 'astipo n’ata vota dinto ’a sacca? Guè, donna Sufìa s’ha fatto cuscienzia!

D. Sofia. Io v’aggio dato denare, e nu’ pezze vecchie. Cca ’a cuscienzia nun ce trase.

Mariano. Ave ragione donna Sufìa. ’A cuscienzia nun ce trase.

Tore. Ched’è? Ve site pigliata collera?

Crescenzo. To’, fanne a meno ’e sti chiacchiere.

Luca. Ave ragione don Crescenzo… Certe cose non bisogna dirle.

Tore. Embè, allora stammece zitte!

D. Sofia. (in tono lamentevole, come per dolore) Ah! Nun mme fido cchiù! Io mo moro!

SCENA 8a

D. Amalia e detti.

D. Amalia. Comme iammo, donna Sufì?

Crescenzo. Nun ’a vedite? Se sta turcenno ’e chella manera!

D. Amalia. E ’o miedeco ch’ha ditto?

D. Sofia. Ch’aveva ’a dì! Chillo mariuolo!…

D. Amalia. Si m’avisseve ntisa a me, a ll’ora ’e mo… chi sa!

D. Sofia. Avite ragione! Avite ragione! Aggio tenuto ’a capa tosta.

D. Amalia. Già, si vuie vulisseve, starrieme ancora a tiempo.

[p. 26 càgna]D. Sofia. (con gioia) Ancora a tiempo?! Donn’Amà, vuie dicite overamente?

D. Amalia. Nu tentativo, a la fine, nun ce costa niente.

D. Sofia. E ’o putimmo fa’ mo?

D. Amalia. Mo stesso.

D. Sofia. Uh! Aneme d’ ’o Priatorio! Fosse angelo ’a vocca vosta, ’onn’Amà!

D. Amalia. Però, avimmo ’a restà sole.

D. Sofia. Sì... sole... tutte ’e doie... Neh, bella ge’ vuie ce facite ’a gentilezza ’e ve ne i’? P’ ’e denare’, v’ ’a vedite cu maritemo. E ricurdateve ca ve l’aggio date ’argiento... Me l’avisseve ’a purtà ’e bronzo?

Tore. Stateve a penziero cuieto.

Mariano. Nun ce penzate. Doppo ca nce aggia pavà ’a cagnatura...

Luca. Statevi bene. Allora, a vostro marito?

D. Sofia. Sì... sì... a mio marito.

D. Eugenio. A rivederci.

D. Sofia. Stateve buone tutte quante (escono tutti).

Crescenzo. (a D. Amalia) Io pure aggio ’ascì?

D. Amalia. Don Criscè, vuie pure.

Crescenzo. Ma ch’avite ’a fa’? Si ’o miedeco nun ce ’a pututo!

D. Amalia. Don Criscè, me dispiace ca site vuie!... Comme cheste fosse stata ’a primma ch’aggio fatto sta’ bona... Donna Sufia tene ’o diavolo ’ncuorpo... Vuie capite o no?... E a fforza ’e scungiure nce l’aggia fa’ ascì...

D. Crescenzo. Ched’è? Mo è diavolo?

[p. 27 càgna]D. Amalia. E’ diavolo, gnorsì.

D. Crescenzo. Ma, dich’i’, pe do’ ll’è trasuto?

D. Amalia. Quanto site buono! ’O diavolo se mpizza pure...

Crescenzo. Sarrà!

D. Amalia. Nun ce penzate ca v’ ’a faccio sta bona, subbeto subbeto.

D. Sofia. Giesù Cristo mio! Ma se vede!

D. Amalia. Meh! Nun perdimme tiempo.

Crescenzo. Io mo vengo, allora (esce)

D. Sofia. Nun tricà tanto, ca io me metto paura.. Veco tant’ombre nere attuorno a me.

D. Amalia. ’O vedite? Io nun me sbaglio maie, Donna Sufì, primm’ ’e tutto ’nzerrammo a porta.

D. Sofia. Nzerratela c’ ’a chiave...

D. Amalia. Accussì stammo sicure (chiude).

D. Sofia. Che nce vo’?

D. Amalia. Donna Sufia mia, nun ve pigliate collera... Cca, primma d’ogn’altro ce vonno ’e llire.

D. Sofia (trepidante). E... quanto ce vo’?

D. Amalia. Vedite... pecchè site vuie... pecchè ce canuscimmo ’a tanto tiempo... me date duiciento lire.

D. Sofia. Accussì assaie?!

D. Amalia. P’ ’a salute se fa chesto e ato!

D. Sofia (forzatamente rassegnata). Embè, quanto vulite vuie... Ma sto’ bona overamente?

D. Amalia. Ncoppa a chesto, nun ve pozzo risponnere... a colpo sicuro. Quanno ’o vulite sapè, ce ne vonno mille.

D. Sofia. Mille lire?!

[p. 28 càgna]D. Amalia. Tanto ce vo’. E m’avite ’a dà primma n’anticipo...

D. Sofia (accesa dalla speranza). V’ ’o dongo...

D. Amalia. Cincuciento lire nnanze, e nun ve credite ca v’afferro pe ccanna... Chesti cose se pavano a caro prezzo. Ve ricurdato ’a Nnarella? Nun teneva ’a stessa malatia vosta?

D. Sofia. Pe mo chesto... Appriesso quanto vulite vuie.

D. Amalia. E vulite vedè comme è overo ca tenite ’o diavolo ncuorpo? Diciteme na cosa: ve sentite nu fuoco, n’abbruciore dint’ ’a panza?...

D. Sofia. Sì.

D. Amalia. Ve vene sempe ’o desiderio ’e iastemmà, ’e fà peccate, ’e dà scandalo?

D. Sofia. Sì...

D. Amalia. Embè, chisto ’e ’o diavolo...

D. Sofia. Madonna d’ ’a libera!... Io mo moro d’ ’a paura!

D. Amalia. Ma io ve salvo, però.

D. Sofia. Donna Amalia mia, pe carità, levateme ’a tentazione! Io sto dinto ’e mmane voste. Vuie m’avite ’a fa sta’ bona. Io faccio tutto chello che vulite vuie!...

D. Amalia. Ecco cca’. Io so’ pronta. Accuminciate ’a dì duie paternostre. E nun ve mettite paura si sentite quacche rummore, ca appriesso ce penz’io.

D. Sofia (recita atterrita i due paternoster).

D. Amalia. ’A do’ ve sentite ’o dulore?

D. Sofia. (indica il lato destro della pancia). Cca!

D. Amalia (spaventata). Cca?! A deritta?... Ah! [p. 29 càgna]Puverella a vuie! Si era a sinistra, era cchiù facile. Basta. Tentammo... (S’inginocchia davanti a donna Sofia e le fa parecchie croci sulla pancia, mormorando parole incomprensibili). Ve sentite niente?

D. Sofia. Nu fuoco...

D. Amalia. Zitto, ca mo’ se scatena: «Spireto maligno!... Avummaria, grazia piena. Pe San Michele Arcangelo ca sotto ’a spata te tenette... Avummaria... Scràstete, sciuògliete, scatènate ’a stu cuorpo ’e sta femmena! (Cava dalla tasca del grembiale una figura di S. Michele e la mette sulla pancia di D. Sofia).

D. Sofia (implorante). San Michele! San Michele benedetto!

D. Amalia. (tiene con ambe le mani la figura sulla pancia di D. Sofia ed esclama un’ultima volta). Scràstete, sciuogliete... scatènate... Avummaria ecc. (Una breve pausa). Ve sentite meglio?

D. Sofia. Sì, nu poco meglio: ’o dulore m’è passato.

D. Amalia. Allora è fatta ’a botta!... San Michele ha scacciato ’o diavolo. Pe tutto dimane, ve susite e cammenate.

D. Sofia. Vuie che dicite?! Io mo moro p’a cuntentezza!

D. Amalia. Nun ce penzate: è riuscito tuttecosa.

D. Sofia. A nomme ’e San Michele beneditto! Isso è stato ca m’à fatto ’a grazia.

D. Amalia. Isso primma... e po’ io... e me ne so’ addunata, quanno v’aggio fatto ’e croce ncoppa a panza... pecchè maggio ntiso sotto ’e mane [p. 30 càgna]comme ’a na cosa ca s’è muvuta e s’è arravugliata... Allora aggio ditto: è fatta. E vuie stessa ’a chillo mumento avite avuto ’a sentere nu brutto dulore.

D. Sofia. N’ato poco murevo! Mm’aggio ntiso ammancà ’o rispiro... è overo. Me sento bona e me pozzo n’ata vota chiaità ’o sanghe mio, cu sti quatte magnafranche ca vonno sempe denare. Io ’o diceva ca ’o miedeco s’era sbagliato e s’ha pigliata nuvanta lire ’a me vergene vergene. Ha da ittà nuvanta cate ’e veleno, sperammo a Dio! E chill’ato buono cristiano d’ ’o cunfessore, che m’aveva cunsigliato d’aizà a mano, p’ ’o nteresse, ’a tutte ’accunte mieie!... Seh! Avevemo magnato a una taverna, forze, o ce l’avevamo faticate nzieme!

D. Amalia. ’E prievete?! Manco ’e notte v’ ’e puzzate sunnà! Vuie dimane, piacenno a Dio, ve n’ascite e ghiate ’arrecogliere vuie stessa.

D. Sofia. Se capisce... ’e voglio accuncià io p’ ’e feste. Accuminciammo ’a D. Eugenio, chillo pudecchioso, che s’è vestuto pure ’e carattele. Dimane me vesto, bello pulito, me metto ’o crespo, ’a rusetta, ’e perne, ’anella, ’e brillante; e mm’ ’e vaco piscanno p’ ’a mano attuorno... Seh! Me vulevano fa murì a me, vulevano!

SCENA 9.a

Concettina e detti

Concettina. E’ permesso?... (timidamente).

D. Sofia (con dispetto). Gué, si tu? Che te manca?

[p. 31 càgna]Pure tu me credive morta?

Concettina. No, donna Sufia mia, cient’anne ’e salute a chi male e bene ce vò...

D. Sofia. ’O saccio, ’o saccio... Ma che buò? Si viene pe denare, t’ ’o dico ’a mo ca nun tengo manco nu cientesemo.

Concettina. Ma io v’aggio pavata sempe. Io stammatina aveva cunzignà ’e cammise ’e musullina a na signora... So’ ghiuta, e chella benedètta pozza essere nun ce steva. Io nun voglio assaie, che ve credite?...

D. Sofia. E’ m’e purtate ’o ’nteresse ’ncoppa ’e vinte lire?

Concettina. Ma guardate: io vengo pe ve cercà quacche cosa, e vuie vulite ’o ’nteresse d’ 'e vinte lire! Io nun ve l’aggio ’anniato. Dimane matina cunzegno e v’ ’o porto.

D. Sofia. E’ dimane te piglie pure ’e denare, allora. Va bene?

Concettina. ’E ’e criature ca m’aspettano pe mangià?... Io che lle dico?... Donna Sufì, io nun ve cerco assaie... Vuie me prestate doie lire e io dimane v’ ’e porto, aunite c’ ’o ’nteresse ’e l’ata pava.

D. Sofia. E chi m’ ’e dà?...

D. Amalia. Quanno chella nun ’e tene, ch’ha da fa’?

D. Sofia. Vuie vedite!

D. Amalia. Se capisce, bella mia, vuie avite a levà primma ’o viecchio, e po’ mettite ’o nuovo.... A la fine, donna Sufia nun campa ’e rènneta! E si sapisseve chello che se n’e ghiuto p’ ’a malatia...

[p. 32 càgna]D. Sofia. M’hanno spugliata viva viva.

Concettina (con dolcezza) Ma io nun n’aggio cercato na somma. Se tratta ’e doie lire. Dimane ve ne porto tre.

D. Sofia. E pe chi m’ ’e pigliata? A cuscienza nun me l’apporta; tu ’o saie ca me piglio quatto sorde a lira pe na semmana; tu dimane puorteme ’o nteresse d’ ’e vinte lire e io t’ ’e dongo...

Concettina. Ma dimane nun me servono...

D. Sofia. E allora vattenne. Io che ce pozzo fa’! Donna Amà, dimane me venite a truvà?...

D. Amalia. Comme, no!...

D. Sofia. V’aspetto?

D. Amalia. Certamente, ve pare! Vulite niente ’a me?

D. Sofia. Voglio ca state bona.

D. Amalia. Manteniteve forte, e ce vedimmo dimane (esce).

D. Sofia. Bona iurnata! Bona iurnata!... (a Concettina) E tu? Staie ancora lloco? Nun te ne vaie?...

Concettina (con le lagrime agli occhi). Donna Sufì, facitelo pe carità tengo cinche aneme ’e Dio ca m’aspettano. Si fusseve mamma pure vuie, me putarrisseve cunsiderà overamente! Vuie nun sapite che vo’ dì sta parola!

D. Sofia. Ma pecchè nun cagne arte, dich’i’? Che te può abbuscà cusenno biancaria? Mo ce stanno tanta belli mestiere, ca se fatica poco e s’abbuscano ’e lire.

Concettina (con risentimento). A me m’è piaciuta sempe ’a fatica, pe revula vosta! Meglio a purtà na [p. 33 càgna]vunnella ’e percalla, ca na veste ’e seta, donna Sufì!

D. Sofia. Ma tu ’e capito io che voglio dì?...

Concettina. E ce vo’ ’a zingara? Basta: cagnammo trascurzo ch’é meglio pe me e pe vuie (tornando dolce). E che vulite fa? Me vulite prestà ’e doie lire? Nun dubitate: dimane, ’a costo ’e me vennere ’ngalera, ve ne porto tre.

D. Sofia (seccata) Ih che zecca cavallina! Ma comme ’o vuò sentì ca nun tengo denare?

Concettina. E addò vaco? A du chi vaco? Ah, Madonna mia!... Madonna mia, famme murì!... (Piange e cade su di una sedia. In questo mentre il dolore assalle di nuovo donna Sofia, che siede contorcendosi).

D. Sofia. Ah! Madonna!... Madonna!... Io mo moro!... Aiutateme! Io mo moro!... (Concettina la guarda in atto di disprezzo, e si alza quasi per fuggire). Cuncettè!... Fèrmete !... Viene ’a cca !... Siente... Nun me lassà accussì... Io mo moro... Aiuteme!... Aiuteme!... Pe cariià!...

Concettina. E n’ ’e tenuta carità pe me, che t’aggio cercate ’o pane ’e figlie mieie! Tu si’ n’anema dannata!

D. Sofia. No... No...

Concettina. Anema dannata! Comme a na cana ’e ’a murì!

D. Sofia. Perdoneme... perdoneme... Siente... Viene ’a cca... Chiamma a quaccheduno (si contorce sempre più). Damme ’a mano...

Congettina (indietreggiando). No, tu me faie paura! (spalanca la porta). Tu si’ dannata!

[p. 34 càgna]D. Sofia. No... Siente... No...

Concettina. Dannata!... (Esce. Sofia, brancolando, con dolore atrocissimo, cerca di giungere alla porta, ma cade bocconi sul pavimento).

SCENA ULTIMA

Francischella e detti

Francischella. Donna Sufì... ’o marito vuosto... (Vedendo, subito, donna Sofia a terra, dà in un grido) Madonna mia! (Si avvicina, la chiama ripetutamente). Donna Sufì... Donna Sufì?... (Con spavento, fugge, gridando). E’ morta donna Sufia! E’ morta donna Sufia!

(Voci in lontananza). E’ morta donna Sufia!

(Intervallo). E’ morta donna Sufia!


Fine