La Vaiasseide/Canto Primmo

'A Wikisource.
 EPUB   MOBI   PDF   RTF   TXT

[p. 17 càgna]

ARGOMIENTO.


Cecca fa na nfroata à lo patrone
De Renza, ca no l’have maretata,
Tanto ch’isso le dace sfatione,
E lo zito, e la zita s’è corcata;
Ma primma fà banchetto, e ncrosione
Da le sogre la zita, è conzigliata
Zò c’hà da fare, e ’n chesto tutto fuoco
Zoccola venne, e sconceca lo iuoco.


CANTO PRIMMO.


I O canto commo belle, e vertolose

Sò le vaiasse de chesta Cetate
E quanto iocarelle, e vroccolose
Massema quanno stanno nnammorate,
Dirraggio po l’autre isce belle cose
Che fanno quanno songo nmaretate
Ma non faccio li vierze ntoscanese
Azzò me ntenga onn’uno à sto paese.

Haggie pacienzia pe no poco ò Musa

S’io te dongo la corda, ca besogna
Sore mia bella fare commo s’usa
Pe non essere ditto, ò che bresogna,
Hoie è peo stare co la vocca chiusa
Ca la zella, la gliannola, e la rogna,
Perzò nesciuno à Napole nce resta
Che scache la carta co la ngresta. [p. 18 càgna]

Perzò mo me ne vengo adaso adaso
Stipame de ienestre na corona
Ca voglio tutto quanto nfi à lo naso
Nchireme de chell’acqua d’Alecona
Viata te se dintro de Parnaso
Me faie trasire co la cera bona,
Ca te mprommetto fare pe saluto
No pideto, no sauto, e no stornuto.

Haveva Renza n’anno e miezo mese
Fatte le iacovelle à Menechiello
Ma lo patrone ch’era Calaurese
Maie nce la voze dare à lo Zitiello.
Cecca che l’era mamma è chesto ntese
Le disse se non cagnie cellevriello
Faraggio che cha dinto chiù non trasa
Ma la faccio chiavare à n’autra casa.

Ca tu te la chiavaste sola sola
De dece anne à sta casa la maressa,
Che pareva na lecora ngaiola
E mo de le Vaiasse è la vavessa,
Ca n’ha quaranta la scura fegliola
E la gonnella ancora è chella stessa.
Quanto disse allecorda quarche cosa
Musa ca sta materia è precolosa.

Sappe dicere tanto ncrosione
Che fu contento de la mmaretare
E dezele tre onze lo patrone,
Perzò subeto fecero chiammare
Mineco ch’era à Zoccola guarzone
E bello ne la fecero portare
Che iero chiù contiente è conzolate
Che chillo che và nmiezo a li Confrate.

[p. 19 càgna]

Deceva onn’uno a la bona hora sia
Ve guarde nchioppa sempre lo Segnore,
Era co lloro madamma Locia
Femmena vertolosa e de valore,
E disse zitto zitto figlia mia
Teccote chisto lazzo de colore
Ch’è buono arrasso sia p’onne fattura,
Chi sape figlia la mala ventura.

Arrevate a la casa s’assettaro
A la tavola ch’era apparecchiata,
Cuorto onne ncosa, e subbeto manciaro,
E pe le fare nore fù cantata
Da no vecino lloro potecaro
Chesta canzona c’haveve accacciata
Uno certo poeta de la Marca,
Non saccio se lo Dante ò lo Petrarca.

Bella cocchia gentile quinci, e linci
Pozzare goder anco un quanco lei
Pocca tu de bellizze paste, e vinci
De lo Mercato tutti i semidei,
E tutto questo Munno anco costrinci
Ad auzarete chillete, e trofei
Talche da Bacco à Tile p’accellenza
Se canta viva Menechiello, e Renza.

Fornuca che s’havette sta canzone,
Che fece tutte quante ashevolire
Onne vaiassa prega Iacovone
Che le bertute lloro voglia dire,
Ed’isso pe le dare sfatione
Cossì decette, stateme à sentire
Ca de vuie mo dirraggio, ò vaiasselle
Quanto site comprite, e quanto belle.

[p. 20 càgna]

Songo le vaiasselle iusto iusto
Cenere, e ianche commo na rapesta
Colloritelle propio commo arrusto
E saporite chiu che n’è l’agresta.
O sia de lo Iennaro, ò sia d’Agusto
O iuorno de lavore, ò de la festa
Le vide chiù attellate, e chiù lucente,
Ca no lo S.A. le iommente.

Tutte sò iure, e tutte penneriglie,
E cannacche, e scioccaglie, e zagarelle,
Se radeno lo fronte co le striglie
Pe parere chiù lustre, ianche, e belle,
Se vanno ntonacanno po le ciglie
De mille scotelluccie ed aruarelle
Che le patrune teneno stipato.
Col’acque de cocozza, e solemato.

Le scarpetelle (ora lloco te voglio)
Chi vedde maie la chiu attellata cosa?
Dimmello à me ch’ancora me ne doglio
Perche à ste spalle n’haviette na ntosa
Craie ò pescraie penzo c’arrecoglio
E n’accatto no paro à Pretiosa
De sommacco piccato co la sola
D’unnece punte po mo ch’è fegliola.

Ma io me ne sò sciso troppo priesto
E n’haggio ditto de l’uocchie, e lo naso
E de le belle vucche, è de lo riesto
Chiu saporito ca non è lo caso.
Chella cornuta me levaie de siesto,
E songo insicco mo friddo rommaso.
Aiuta Musa pe l’arma de zia
La nova vaiassesca fantasia.

[p. 21 càgna]

Hora le vertolose qualetate
Chi farrà chillo che le pozza dire?
Lloro sapeno fare le frittate
Maccarune, e migliaccie da stupire.
Le nobele pignate mmaretate
Zeppole ed autre cose da stordire,
Agliata, e sauze, e mille aute sapure
Cose da cannarure e da segnure.

Cheste fanno na posema reiale
Che te dura pe chiu de miezo mese
Ne hai paura d’ire à lo spetale
Ca spienne poco chiù de no tornese:
Na vota me ne’nchiette no stevale
Pe paura de mastro lo franzase,
O vaiasselle meie belle e comprite,
Rosecarelle comme sò l’antrite.

Le vaiasse sò bone p’onne cosa
E sempre maie te danno sfatione
Sò sempre frescolelle commo à rosa
Sano servire pò tutte perzone,
Di ca ne truove maie nulla schifosa
E che dica ste cose non so bone,
Non se pò stare propio senza lloro
Onne vaiassa vale no tresoro.

Chi vò sapere commo sia l’ammore
Una vaiassa nce la pò mmezzare
Va la festeggia và schitto doie hore
E vi se non te face pazzeiare,
Subeto se ne vene, e dice core
La gratia toia me fa spasemare,
Che cosa è chella, chi non zuca, e licca
Come fà co la de la franferlicca?

[p. 22 càgna]

Falle quatto carizze amale sulo
Ca de manciare non te pò mancare
Schitto che tu le dinghe no cetrulo
De pettorina te fa satorare,
De cotene te carreca no mulo
E te dà quanto maie pote aboscare,
E te ietta da suso à la fenestra
Pe fi à lo vurodo, e pe fi a la menestra.

Di ca truove nesciuna vaiassella
De nomme brutto Livia ò Catarina
se chiamma onn’una Cecca, e Iacovella
Meneca, Pretiosa, e Cramosina,
Vasta, Renza, Grannitia, ed Antonella.
Nomme che ne puoie nchire na cantina,
E di ca me pò dire quarche chiario
Ca songo nomme pueste ncalannario.

O vaiasse lustrissime Segnore
Vuie chiù nmerdate de l’aute perzune,
Vengano adonca pe ve fare nore
Cicco, Cenzullo, Rienzo, e Vecenzone,
E de fauzetto, vascio, e de tenore
Le laude voste co lo colascione
Onn’uno canta onn’uno strilla, e dica
Viato chi vaiassa hà ped’amica.

Cedano donca tutte Baronesse
La Marchesa, e la figlia de lo Duca
E quanta songo chiù gran Precepesse,
Nulla de lloro sarrà maie che luca, `
De le vostre bellizze vaiassesse
Vestale mastro Granne, ò mastro Luca, `
Facciano tutto chello zò che sanno
Ca maie vaiasse commo à vuie saranno.

[p. 23 càgna]

Che serve lo zibetto, e li sapune
Moscate, che ne songo tutte chiene
Se chillo fieto ammorba le perzune
E face spisso adebolire le prene,
Ma da vostre tetelleca, e tallune
Vale chiù chillo adore che ne vene
Che quanto museo ad acque sperfummate
Porrano le segnore tetolate.

Quanno chesto cantare fù scomputo
Ch’onnuno fece stare à vocca aperta,
Commo iocasse à l’uovo cannaruto,
De brocca se susio madamma Berta.
E disse iatevenne ch'è venuto
Lo tiempo che lo zito faccia certa
La mogliere, ch’è ommo, e craie venite
Ch‘à la cammisa lo nore ashiarrite.

Se ne iero le gente, e se corcaro
Li zite, se contiente penzatello
C’havea sett’anne che se deseiaro,
Mineco disse orsù bene mio bello,
Mo me ne vengo, ma pigliame à caro
Ca volimmo iocare tanto bello, `
Vienela viene, disse la mogliera
Comma se fosse iuoco à covalera.

Musa cantalo tu quanto se disse
Quanto se fece a l’una, e l’auta parte:
Cose da fare ashevolire Ulisse,
E da fare sorreiere no Marte,
Venga conca d’ammore, e guerra scrisse,
Ca no ne porria dicere na parte,
Vasta ca se sosero sbessechiate
Commo se funge havessero manciate.

[p. 24 càgna]

Mostrato la cammisa allegramente
Quanno venette po lo parentato,
Che pareva na vesta de vattente,
Tanto che ne rommase conzolato,
Vedenno tanto nore a lo parente
Che nullo se l’havette mai penzato
E se ne iero alliegre; ma restaro
Le sogre, che cossi le conzigliaro:

Mo che me l’allecordo, è non me ncresce
Te dico figlia mia tu no scopare
La casa toa quanno mariteto esce,
E non volere ntierzo manco fare
Lo lietto, ne pigliare maie lo pesce
Pe la capo, e se te vuoie sfommecare
Ietta lo fuoco fora la fenesta
Ca nullo male agurio pò nce resta.

Se viene a scire prena, ed hai golio
De quarche cosa tienemente a l’ogna
O te tocca la nateca; fai ch’io
Fice a frateto nfronte na scalogna,
Che se ne desperaie lo figlio mio,
E foiette pe colera a Bologna,
A lo Leparo falle na vasata
Se no lo ninno ha la vocca spaccata.

E caccialo tre vote quanno è nato
A la fenesta; ca sarrà quieto,
La sera è tu lo chiamma sbregognato,
No lo chiammà pe nomme te lo beto
Ca da ianare non sarrà guastato
A la conola mpizza de segreto
Le fuerfece, e pò miette à la fenesta
Vallareiana, e statte sempre nfesta.

[p. 25 càgna]

A criature no lo fà vasare
Ca pò non parla, ed a lo pegnatiello
Fa che veva, ca priesto sa parlare,
E se fosse no poco vavosiello
Da quarche schiavo è tu lo fà vasare.
E faccia mpumma à quarche capaniello,
Chello che l'è mprommiso falle havere
Se no sempre lo vide pò cadere.

Voleva dire chiù, ma se sosio
Chell'auta, e disse, e tu che non saie l'uso
De li nzorate, siente che dico io,
Se filanno mogliereta lo fuso
Le cade, e tu lo piglia figlio mio;
Mozzecale la coda ca si scruso
Da chello che da tutto eie temuto
Zoè ca mai non te farà cornuto.

Hora bona pozzessere, respose
Renza, madamma sogra che decite
No besogna co mico chesse cose
Ca sapite chi songo, e vederrite
Tutte l‘opere meie fare norose.
E sempre maie de me ve laudarite,
Lo creo (disse essa) ma buono è penzare
Chello che po de facele accascare.

Stà zitto mamma (respose lo zito)
Ca se quarch’uno adocchia mente schitto
Le cacciarraggio n’uocchio co sto dito,
No bene mio chesto non sia pe ditto,
Tanno (respose Renza a lo marito)
E la mamma non singhe beneditto,
se si geluso è faie no sbarione
Ca vaie de zeppe e pesole mpresone.

[p. 26 càgna]

In chesto venne Zoccola à gridare
Ca la taverna steva senza cuoco,
E ncera gente che voleva magnare
Se no ca se ne ieva à nauto luoco,
Perzò scompio lo Zito de parlare
E scese vrociolanno à fa lo fuoco,
Da dove po tornai tutto sedunto
Ma craie scompo lo riesto de lo cunto.


Scompetura de lo Primmo Canto.