Songo le vaiasselle iusto iusto
Cenere, e ianche commo na rapesta
Colloritelle propio commo arrusto
E saporite chiu cha n’è l’agresta.
O sia de lo Iennaro, ò sia d’Agusto
O iuorno de lavore, ò de la festa
Le vide chiù attellate, e chiù lucente,
Ca no lo S.A. le iommente.
Tutte sò iure, e tutte penneriglie,
E cannacche, e scioccaglie, e zagarelle,
Se radeno lo fronte co le striglie
Pe parere chiù lustre, ianche, e belle,
Se vanno ntonacanno po le ciglie
De mille scotelluccie ed aruarelle
Che le patrune teneno stipato.
Col’acque de cocozza, e solemato.
Le scarpetelle (ora lloco te voglio)
Chi vedde maie la chiu attellata cosa?
Dimmello à me ch’ancora me ne doglio
Perche à ste spalle n’haviette na ntosa
Craie ò pescraie penzo c’arrecoglio
E n’accatto no paro à Pretiosa
De sommacco piccato co la sola
D’unnece punte po mo ch’è fegliola.
Ma io me ne sò sciso troppo priesto
E n’haggio ditto de l’uocchie, e lo naso
E de le belle vucche, è de lo riesto
Chiu saporito ca non è lo caso.
Chella cornuta me levaie de siesto,
E songo insicco mo friddo rommaso.
Aiuta Musa pe l’arma de zia
La nova vaiassesca fantasia.
Hora
