'O luciano d''o Rre
FERDINANDO RUSSO
’O “LUCIANO„ D’’O RRE
CON PREFAZIONE E NOTE
(SECONDA EDIZIONE)
Editore - Dr. GENNARO GIANNINI - Napoli
– Addò se vere cchiù, Santa Lucia?!
Addò sentite cchiù l’addore ’e mare?
Nce hanno luvato ’o mmeglio, ’e chesta via!
N’hanno cacciato anfino ’e marenare!
E pure, te facea tant’allegria,
cu chelli bbancarelle ’e ll’ustricare!
’O munno vota sempe e vota ’ntutto!
Se scarta ’o bello, e se ncuraggia ’o brutto!
Ah, comme tutto cagna! A tiempo ’e tata,
ccà se tuccava ’o mare cu nu rito!
Mò ncopp’'o mare passa n’ata strata,
tutto va caro, e niente è sapurito!
Santa Lucia m’ha prutiggiuto sempe!
M’ha rata ’a vista ’e ll’uocchie, pe veré
ca l’ommo cagna comme cagna ’o tiempe,
e ca chi sa che vène, appriesso a me!
Io, quacche vota, quanno sto nfuscato
e me straporto a quann’ero guaglione,
me crero ca so’ muorto e sutterrato
sott’'a muntagna ’e chisto Sciatamone!
Pare n’ato paese! È n’ata cosa!
Tu nce cammine e nun te truove cchiù…
E pure, è certo, era accussì spassosa,
Santa Lucia d’'a primma giuventù!
Arbanno juorno, dint’’e vuzze, a mmare,
c’addore ’e scoglie e d’ostreche zucose!
Verive ’e bbancarelle ’e ll’ustricare
cu tutt’’o bbene ’e Ddio, càrreche e nfose!
E chelli ttarantelle int’’a staggione!
Femmene assai cchiù belle ’e chelle ’e mo’!
Uocchie ’e velluto, vocche ’e passione,
lazziette d’oro e perne, int’ ’e cummò!
Tutt’’e ccanzone t’’e ppurtava o mare,
pa festa r’ ’a Maronna r’ ’a Catena,
cu a bbona pesca, e cuoppe r’ ’e renare,
e ’a cantina ’e Cient’anne sempe chiena!
Mò… che ne cacce? Cca s’è fravecato!
Tutto è prucresso, pe puté arrunzà!
Si’ marenaro? E, quanno ’e faticato,
fai ll’uocchie chine… e ’a rezza nun t’’o ddà!
II
Quanta ricorde! Quanta cose belle!
N’arena d’oro e n’abbundanza ’e ciele!
Treglie e merluzze, vive, int’'e spaselle,
e ’o mare tutto cummigliato ’e vele!
Veneva ’a voce, da li pparanzelle:
“Aonna, ’o mare! Aonna!…„ E li ccannele
s’appicciavano nnanza a li Ssant’Anne,
p’'a pruvverenzia “ch’è venuta aguanne!„
Te redevano ll’uocchie comm’'o sole!
Tenive mmocca ’o ddoce d’ogne mmèle!
Nfra l’anno ’mmaretàvemo ’e ffigliole
cu uno ’e tutto, ’e musulline e tele!
N’appicceco? Era justo ’e tre pparole!
Muglièreta? Nu scuoglio! Era fedele!
Ncapace ’e niente, a chillo tiempe bello,
c’ogne cazetta era nu carusiello!
’E state, tuorno tuorno all’ustricare,
muntagne ’e freselline e tarallucce.
L’addore ’e purpetielle e fasulare
faceva addeventà pisce ’e cannucce!
E nterra ’a rena sciascïava ’o mare;
e, appriesso, ’o ballo d’'e ttarantellucce;
e nu suono e chitarra e tammuriello,
e na magnata d’ostreche ’o Castiello.
Facèvamo ’Accarèmia ’e ll’ova tosta,
a chi se mmucava a doi pe morza!
Scummessa fatta, s’accetta ’a pruposta,
e n’agliuttive tre, cu tutt’'a scorza!
E ’a coppa, vino niro comm’'a gnosta,
e danne quanto vuò ca cchiù se sorza!
E ’o bello nun cadèvamo malate!
Robba sincera, e stuòmmece pruvate!
’E ffeste p’'a Maronna ’e miez’Austo!
’A nzegna pe ncignà l’àbbete nuove!
Te nce spassave e nce pruvave gusto,
pecché ’o pputive fa! Tenive ’e chiuove!
Mo’, vai p’assaggià vino, e siente musto,
te vonno dà ’e mellune senza prove,
e, comm’a chillo, sfurtunato ’ntunno,
si mine ’o sciato a mare, te va ’nfunno…
’A nzegna ne chiammava folla ’e gente!
D’uommene e nenne friccecava ’o mare.
Sott’'o sole, cu amice e cu pariente,
tu quanto te spassave, a summuzzare!
’O furastiero, nun sapenno niente,
si se fermava a riva pe guardare,
se sentea piglià pèsole: e ched’è?
Mm’'o carrïavo a mmare appriesso a me!
E che vedive, llà! Strille e resate,
e chillo ca n’aveva calatune!
Doppo: “Signò, scusate e perdunate!
È festa, e nun s’affènneno nisciune…„
Cchiù de na vota nce se so’ truvate
’a Riggina c’'o Rre, sott’'e Burbune…
E ’o Rre, ca tuttuquante nce sapeva,
quanta belle resate se faceva!…
III
Io mo’ so’ bbiecchio, tengo sittant’anne,
’a sbentura mm’ha fatto ’o core tuosto,
embè, affruntasse pure ati malanne
pe vedé ancora ’a faccia d’'o Rre nuosto!
Ferdinando Sicondo!… E che ne sanno?!
Còppola ’nterra! N’'o ttengo annascuosto!
E nce penzo, e me sento n’ato ttanto!
So’ stato muzzo, a buordo ’o Furminanto!
’O Rre me canusceva e me sapeva!
Cchiù de na vota, (còppola e denocchie!)
m’ha fatto capì chello che vuleva!
E me sàglieno ’e llacreme int’all’uocchie!
’A mano ncopp’'a spalla me metteva:
“Tu nun si’ pennarulo e nun t’arruocchie!
Va ccà! Va llà! Fa chesto! Arape ’a mano!„
E parlava accussì: napulitano!
Quanno veneva a buordo! Ma che vita!
Trattava a tuttuquante comm’a frato!
Sapeva tutt’'e nomme: Calamita,
Mucchietiello, Scialone, ’o Carpecato…
Èramo gente ’e core! E sempe aunita!
“Murimmo, quann’'o Rre l’ha cumannato!„
Mo’ che nce resta, pe nce sazzià?
Ah!… Me scurdavo ’o mmeglio!… ’A libbertà!
’A libbertà! Chesta Mmalora nera
ca nce ha arredutte senza pelle ’ncuolle!…
’A libbertà!.. ’Sta fàuza puntunera
ca te fa tanta cìcere e nnammuolle!…
Po’ quanno t’ha spugliato, bonasera!
Sempe ’a varca cammina e ’a fava volle,
e tu, spurpato comm’a n’uosso ’e cane,
rummane cu na vranca ’e mosche mmane!…
’A libbertà! Mannaggia chi v’è nato!
’A chiammàsteve tanto, ca venette!
Ne songo morte gente! S’è ghiettato
a llave, ’o sango, sott’'e bbaiunette!…
Mo’, vulesse veré risuscitato
a ’o Rre ca n’'a vuleva e n’'a vulette!
E isso, ca passai pe ttraritore,
se ne facesse resatune ’e core!
IV
Comme lle pïaceva ’a capunata!
Quase ogne juorno na capunatella!
Se ne faceva justo na scialata,
e doppo, ’o bicchierino e ’a pastarella.
Po’, cu na bona tazza ’e ciucculata,
se pastiggiava sempe ’a marennella…
Ah, chella tazza! Chella tazza fuie,
ca, comm’a mo’, nce ha ’rruvinato a nuie!
Che nce mettette ’a rinto, chillo ’mpiso
ca, pe farlo murì, l’avvelenaie?
Meglio era s’isso nce mureva acciso!
Isso, ch’è stato ’a causa ’e tutt’'e guaie!
’O Rre nuosto ’o ssapette, ’nparaviso,
e certo, ’o ggiurarrìa, nce ’o pperdunaie!
Ma si nun era ’o ttuòsseco ’e sta tazza,
n’avriamo viste tanta cane ’e chiazza!
Lassammo sta’! Nun ricurdammo niente!
Quanno nce penzo me sento malato!
Se verèvano a sciumme, ’e ppèzze ’argiente!
Mo’ è raro pure ’o sòrdo scartellato!
Trasètteno?… Ma a botte ’e trademiente!
Nun me dicite ca me so’ ngannato!
Trasètteno, gnorsì!… Senza cammise!
E ’o ddicevano stesso ’e piamuntise!
Mo’ lloro stanno ’a coppa!… Mo’ sta bene!
Ma, p’arrivà, n’hanno magnato sivo!…
A Palazzo Riale, ’e ccasce chiene!
Nce hanno spurpato anfino all’uosso vivo!
M’aggia sta’ zitto, è ove’? Nun ve cummene
’e me sentì parlà?… Ve fa currivo?!
Llà s’avriano jucato a paro e sparo
pure ’o Santo Tesoro ’e San Gennaro!
So’ biecchio? So’ gnurante? Nun capisco?
Me sustenite ch’è tutt’'o ccuntrario?
Embè… voglio sapè che fosse ’o Fisco!
Nun fui n’aggrisso ’o cchiù straurdinario?
Io tengo ’a rrobba, tu m’'o mmiette ’nfrisco,
po’ me rice ca serve pe l’Arario!
Parole nove!… Io nun cumbino cchiù!
St’Arario fui ca t’'o mmagnaste tu!
Chi ne sapeva niente, ’e chesti ttasse?!
L’oro jeva accussì… comm’'e lupine!
Ognuno, a gusto suio, magnava ’e grasse,
cu’e ssacche chiene ’e rurece-carrine!
Mo’ manco cu ’e ppatane uno se ngrasse,
ca vanno care comm’'e tagliuline!…
Songo gnurante? Avraggio tutt’'e tuorte!
Ma… quanno mai, io jastemmavo ’e muorte?!
Me so’ mparato mo’!… È ’o sango stesso
ca se revota e nce scumbina ’e ccape!…
ah, tiempo bello!… Si’ squagliato ampresso!
Nui simmo addeventate tanta crape!
Ah, so’ gnurante?… Nce ’o scuntammo appriesso!
Po’ verimmo sta porta chi l’arape!
’E palazze?… So’ belle!… ’E strate?… Pure!
Ma s’è perza ’a semmenta d’'e signure!
Addò stanno, Statella e Muliterno,
nu ruco r’'a Riggina o n’Uttaiano!
Fosse cchiù certo ’e vengere nu terno!
Nun m’avantasse cchiù: "So’ luciano!"
È stata vuluntà d’'o Pat’Eterno,
si no, v’'o scummettesse a piezzo ’nmano,
ca, si nun era munzignor Caputo,
chillo, ’o Sissanta, nun sarria venuto!
V
So’ stato marenaro mmiezo ’a scorta
d’'o Rre, malato ’e chella malatia!
Tutte pronte a vigliarlo! Arreto ’a porta,
nnanz’'a carrozza, sulo, ’ncumpagnia…
Mai na parola! Mai na faccia storta!
Mai nu suspetto, pe Santa Lucia!
Era sicuro ’e jì, venì, restá…
’E luciane suoi stevano llà!…
Stevano llà! Na squatra pronta a tutto!
Ogne parola, ogne guardata, ogn’atto!
Viaggio tristo assai! Viaggio brutto!
Cchiù de na vota s’è purtato ’nquatto!
Isso, ca ne vulea tirà ’o ccustrutto,
n’arrivava a sapé che s’era fatto
pe chella malatia misteriosa,
accussì nfama e tantu mai schifosa!
Vi’ c’anno fui, chillo Cinquantanove
cu chillo spusalizzio ’e Francischiello!
L’otto ’e Jennaro, chiove, chiove e chiove!
C’aveva fa? Partette, ’o puveriello!
Lampe e saette, mmiezo ’e strate nove,
e pigliaimo nu bello purpetiello…
Già, ’o Rre, ca nce credeva, ’a jettatura,
se ll’era ntruitata, sta sbentura!
Partenno aveva ritto: “Si ncuntrammo
nu monaco, nu zuoppo o nu succiato,
sarrà nu malaùrio! Cammenammo!…„
E da nu piezzo se sentea malato.
Nun fui parola ritta, nui guardammo,
e già ’o penziero suio s’era avverato!
Chi ncuntrammo? Tre muònece! ’O ddicette!
E scatasciaino trònole e saette!
A Mugnano, cu ’o friddo dint’all’ossa,
scennette e jette a Santa Filumena.
Isso, ’e figlie, ’a Riggina, rossa rossa,
sott’a nu viento ca ’o Signore ’o mmena!
Se sape! ’O sango lle fa tale mossa,
ca dint’'a cchiesia se riggeva appena!
Doppo, s’abbatte ncopp’a nu cuscino,
e che nuttata cana, anfi’ ’Avellino!
Meno male ca po’ se repigliaie
e ’o juorno appriesso, all’unnece, partette!
Ma credite ca ’o tiempo s’accunciaie?
’O nfierno pure llà nce se mettette!
A munno mio, nun m’è succiesso maie!
Fui tanta e tanta ’a neva che cadette,
ch’io nun v’abbasto a dicere: zeffunno!
Llà nce cadette ’a neva ’e tutt’'o munno!…
Nu cielo ’e chiummo, na campagna janca,
e nnanz’all’uocchie nu lenzuolo ’e neva!
Tu vai cecato… ’A zoza ca te stanca,
’e ddete ’e fierro… E ’a forza, chi t’'a deva?
Po’ cierti vventecate, a dritta e a manca,
ca sulamente Dio nce manteneva…
-Che facimmo?… Fermammo, Maistà?
E isso:-Jammo nnanza a cammenà!
Ma ch’era ’acciaro, o steva ’nfrennesìa?
Facèvamo tre passe ogne doj’ore!
E duraie duraie, chesta pazzìa,
nfi’ a quanno nun turnaie ’o battitore.
- Maistà, nun è pussibbele, p’'a via…
Ccà passammo perìcule e mmalore…
E, cunzigliato da ’o barone Anzano,
isso urdinaie:-Vutammo p’Ariano!
E jettemo add’'o Vescovo! Capite?
E ’o vescovo era Munzignor Caputo!
Doppo nu miglio a ppede, me crerite?
’o Rre arrivai nu straccio! Nterezzuto!
E no sul’isso! Stevamo sfenite!
Nun tenèvamo ’a forza ’e chiammà ajuto!
’A Riggina, per farve perzuvaso,
jeva int’a neva cu ’e scarpine ’e raso!…
Che nce vulette, pe piglià calimma!
’A sera, ’a bbona ’e Ddio, votta e magnammo!
Llà fuie ’o mbruoglio! ’O ppriparàino apprimma
chello vveleno, o che?… Nun ne parlammo!
Dicetteno ca no!… Bella zuzzimma!
Quant’è certo stu juorno ca sciatammo,
stu Munzignore ca v’annummenaie,
dopp’'o Sissanta, po’… se n’avantaie!
Embè, chesto se fa?… Pròssemo tuio,
ca l’'e cercata ’a mitria e te l’ha data,
ca vene ’a casa toia, pe gusto suio,
’o vaie a ntussecà cu ’a ciucculata!…
Ma s’io songo tentato, io me ne fuio,
nun già ca sceglio justo ’a mala strata
sulo pecchè vene ’o Demmònio e dice:
“Avvelèname a chisto, e simm’amice!…„
S’era perduto ogne timore ’e Ddio!
Putive suspettà ’e nu saciardote?
Va buono, se mpattai!… Ma ve rich’io
ca l’avarrìano acciso ciento vote!
Chisto, verite, è razziucinio mio!
Nce n’addunàimo! Ch’èramo, carote?
E po’… si parle ca nun si’ birbante,
che vene a di’ ca doppo te n’avante?!
VI
’O Rre, ca già nun se senteva buone,
pecchè già ncuorpo serpiava ’o mmale,
se sape! quann’avette ’o calatone
se sentette cchiù peggio! È naturale!
Basta; nun ’o mmettimmo ’n custione,
nun ce scurdammo ’a cosa princepale!
Comme vulette Ddio, llà dintu llà,
magnàjemo… e nce ne jettemo a cuccà.
Ma ’a notte, all’antrasatto, nu remmore
nce mena tutte dint’'a stanza ’o Rre…
Vedennolo, accussì, cu ll’uocchie ’a fore,
l’addimannammo: -"Neh! Maistà… Che r’è?"
"-Llà… llà… chill’ommo… Nu cuspiratore…
Se vuleva accustà… vicino a me…
Da nu spurtiello… dint’'o muro… llà…"
E nui cercàimo… Ma che vuò truvà!
S’era sunnato, e overo se credeva
d’avè vist’uno ca l’assassenava,
quanno ca pe sti suonne che faceva
chell’era ’a malatìa che cammenava!
E chi durmette cchiù?! Nun te veneva!
Arbava juorno e se chiacchiariava….
All’otto, n’ata vota ’a stessa renza!
Nce sentettemo ’a messa, e po’: partenza!
Che precepizzio ’e via dopp’Ariano,
jenno pe Foggia e Andria e pe Canosa!
’O Rre malato, chillo tiempo cano,
nu mbruoglio pusetivo ’e tuttecosa!
Ogne vivò, isso cacciava ’a mano…
(’A veco sempe, chella mana nfosa…)
E po’ a Bitonto, pe Ruvo e Trellizze,
e gente c’aspettava a tutte pizze…
Aspetta, aspetta! ’O Rre passava ’e trotte,
pe tuccà Manferònia ampressa ampressa!
E p’Acquaviva nce passàimo ’e notte,
e doppo n’ora, cu ’a truttata stessa,
dïune, stracque, ammatuntate ’e bòtte,
cammina, pe ghì ncontra ’a Princepessa!
A Taranto, spezzate dinto ’e mmecce,
tu qua’ fermata! Nce fermammo a Lecce!
E a Lecce se nchiummai! Nun pare overo,
pecchè, che saccio… s’era repigliato…
Parlai cu tutte, ricevette ’o Clero,
e ’a sera stessa vulett’ì ’o triato!
Anze, vedite quanto steva allero,
ca, cu nu Truvatore appriparato,
isso alluccai: -“Che Truvatore! A chi?
Fate don Checco! M’aggia divertì!…„
Ma ’o juorno appriesso, (e chi s’'o suppuneva?)
nun se partette!… ’A cosa s’aggravava…
’O duttore Lione ca curreva,
’o nzagnatore ca m’'o salassava…
Apprimma, miccia miccia, chella freva
se nc’era misa ncuollo e n’'o lassava;
e ’a Riggina, gialluta comm’'a paglia,
fa correre, da Napule, a Ramaglia.
Vene Ramaglia cu Capozze, vene
ll’anema ’e ll’urzo, vene tutt’'o munno!
Se po’ sapè che r’è?! Chi te sustene
ca se va a galla; chi ca se va nfunno;
chi se stregne int’'e spalle; chi cummène
ca nun ’o ssape, e ’o ddice chiaro e tunno…
Eppure, chillo, ’o Rre, l’aveva ditto!
“Tengo ’o presentimento ca so’ fritto!…„
VII
Già, quanno stu Ramaglia fui chiammato,
primma ca stu viaggio se facesse,
dicette ’o Rre: - “Ramà, si scienziato?
E vedimmo sta scienzia che dicesse!„
Ramaglia ’o vesetai. - “State malato!
È niente, ma però… ve prupunesse…„
’O Rre ’o guardai. - “Che prupunisse, di’?„
-“Maiestà… ve prupunesse… ’e nun partì!„
-Pecchè? dicette ’o Rre; ch’è funnarale?
-No… nient’'e chesto! Mill’anne ’e saluta!
Ma che facimmo? Pe scanzà nu male,
mettimmo ncopp’a cuotto acqua vulluta?
E ’o Rre: -Ramaglia mio, si’ n’animale!
Sta cosa ’ncapo chi te l’ha mettuta?
Nun me vuò fa’ partì? Pe chi me piglie?
Quant’'e avuto, pe darme sti cunziglie?!
E vulette partì! Nu cuoccio tuosto,
ca ’o simmelo comm’isso, nun ce steva!
Tu l’'e chiammato? E chillo t’ha rispuosto…
Na cosa bona pure t’'a diceva!
Ma che buò fa’? pe malaurio nuosto,
quanno ncucciava, niente nce puteva!
’A pigliai storta, se mettette ’ntuono,
e vulette partì, malato e buono!
Che v’aggia di’? Chi sa!… Si nun parteva’
ferneva tuttecosa a ppazziella,
e chella sfenetezza che senteva
sarrìa passata cu na misturella…
Arïano aspettava, isso nun jeva,
e scumbinava buono ’a jacuvella,
e te lassava comm’a statue ’e sale
a Munzignore e a tutt’'e libberale!
Pirciò fui smaleditto, stu viaggio
cu ’a jettatura ’e trònole e saette!
E pirciò, pe sta causa ’e stu rammaggio,
anfino a Manferònia nun se jette!
Jettemo a Bare… Già traseva Maggio…
Era ’o vintotto ’Abbrile… o vintisette…
E nce arrivàimo mmiezo a spare e suone,
e na gran folla ’e pupulazzione.
Ma n’ato malaurio l’attuccava!
Te pareva na cosa fatt’apposta!
Sott’'e balcune ’a folla aumentava,
(genta tutta fedele ’a causa nosta)
e lle sbatteva ’e mmane, e l’accramava:
Vivò!… Vivò!… Vivò!… Botta e risposta…
Embè, ’o ccrerite? Justo mmiezo ’a via,
’o Rre a chi vede? Na cunfrataria!
Cosa ca, si se conta, uno te dice:
“A chi l’assigne? Va ncujeta a n’ato!„
E isso, (ca ’o Signore ’o benedice!)
nce rummanette troppo spaventato!
Ogne mumento sunnava nemice,
e, p’'a paura, sempe cchiù malato,
ve putite penzà cu che allegrìa
ricevette, accussì, Maria Sufia!
Nun se gudette niente, ’e chelli ffeste!
Parlava appena, passanno ’e paise!
Quatto, cinco parole, lestu-leste,
addò ca chillo ne facea fa’ rise!
C’argentaria! C’adduobbe e frusce ’e veste!
’E Ppuglie ne spennettero turnise!
Triate, balle, serenate, sciure,
e isso ncopp’'a branda cu ’e delure!
Ogge, nu poco meglio, e respirava;
dimane, verde peggio d’'e ccutogne!
A tavula, penzava e nun magnava…
Cu ’a capa sotta, se guardava ll’ogne…
Murtrïuso, accussi, sfarnetecava,
penzanno certo a chelli gran carogne
c’aveano armato contr’a isso ’a mano
e ’a bbajunetta ’e Gisalao Milano.
VIII
Bare era propio na galantaria,
cu tutte chilli princepe rignante
c’accumpagnàino ’a sposa! E p’'allegria
tu te sentive overo n’ato ttanto!
Chesto, pe dint’'e ccase e mmiezo ’a via,
pecchè add’'o Rre se ne faceano chiante!
Po’ avevano urdinato: -Lengua ’mmocca!
- Comme sta ’o Rre? -Sta buono… ma se cocca…
Aviveve ’a vedè chella Riggina!
Pe dà sullievo ’o Rre, facev’un’arte!
Jeva essa stessa pure int’'a cucina!
Na santa ’n cielo m’'a mettite ’e parte!
Senza vulè durmì, sera e matina,
a priparà dicotte, a firmà carte…
E parlava cu miedece e dutture,
danno curaggio a ’e stesse prufessure!
Passava ’o tiempo… ’O mmale aumentava…
Nisciuno cchiù diceva na parola…
Nisciuno cchiù durmeva o risciatava,
nfra nu silenzio ’e quanno ’a mosca vola…
Lampe allumate, gente ca pregava,
e ll’uoglio santo, e l’acqua ’e San Nicola,
e l’abbetiello ’e Sant’Affonzo… Che!…
Ch o era n’ombra ’e Rre, nun era ’o Rre…!
E venette ’o scatascio! Se sapeva!…
Giesù! Chill’uocchie suoi!… Comme guardava!…
Vivo, senteva ’a morte, e nun mureva,
vedenno ’o cuorpo ca se nfracetava!…
Delure dint’all’osse, friddo, freva,
nu tremmuliccio ca te spantecava,
na smània ’e sete, senza arrepusarte,
e vierme ca ll’ascéano ’a tutte parte…
IX
Comm’’o purtàimo, a buordo ’o Furminanto?
Comme jette da Puortece a Caserta?
Erano mise, e chi assaggiava tanto!?
Erano mise, ch’io durmevo allerta!
Doppo prïato a Dio santo pe santo,
’a povera Riggina, amara e sperta,
dice: - Tentammo st’urdema speranza,
e mannammo a chiammà Vicienzo Lanza!
Chisto era gran duttore e libberale,
ma currette, dicìmmola comm’è!
Surtanto, le fui ditto, tale e quale,
ch’isso, ’o malato nun l’avea vedè!
S’era penzato ca pareva male
fa trasì stu nemico nnanto Rre;
e Lanza se strignette dinte spalle:
“A saluta d’'o Rre nun va tre calle!„
- Comme, nun va tre calle? - V’'o ddich’io!
È inutele, sta vìseta add’'o Rre!
Io so’ chi so’! Faccio ’o mestiero mio!
Ma è troppo tarde, mo! Sentite a me!…
P’'o riesto, nu miracolo ’o fa Dio;
ma… si ’o facesse… ’o vvularria vedè!
’O fatto è chiaro comm’acqua ’e funtana!
Dàtele latte ’e femmena, e se sana!
’O miedeco curante era Rusato,
e se mettette a ridere. - N’'o ccrire?
dicette Lanza; fai c’aggio sbagliato?
Nnanza a Vicienzo Lanza nun se rire!
E, certo, o scienzia, o c’ato fosse stato,
nui simmo jute cu ’e vestite nire!
Speràvamo, nce dèvamo curaggio,
ma ’o Rre murette ’o vintiduie ’e Maggio…
Chest’è, quann’'a Furtuna è na zuzzosa!
Si tu ’o rilorgio ’o guaste int’'o cungegno,
hai voglia ’e l’accuncià, ca nun è cosa!
E accussì fui! Muort’isso, muorto ’o Regno!
’A strata se facette ntruppecosa,
Calibbarde aspettava e avette ’o segno;
cade Gaeta, doppo quatto mise,
e nui… natàimo ttutte int’'e turnise!
Ah! Ah! Me vene a ridere, me vene!
Ogneruno sperava ’avè na Zecca,
tanta renare quanto so’ ll’arene,
’a gallenella janca, ’a Lecca e ’a Mecca!
Faciteme ’e berè, sti ppanze chiene!
Seh, seh! Quanno se ngrassa ’a ficusecca!
Comme scialammo bello, dint’a st’oro!
Sciù pe la faccia vosta! A vuie e a lloro!
Ccà stammo tuttuquante int’'o spitale!
Tenimmo tutte ’a stessa malatia!
Simmo rummase tutte mmiezo ’e scale,
fora ’a lucanna d’’a Pezzentaria!
Che me vuò di’? Ca simmo libberale?
E addò l’appuoie, sta sbafantaria?
Quanno figlieto chiagne e vo’ magná,
cerca int’'a sacca… e dalle ’a libbertà!
FINE