Chesta paggena è stata leggiuta du' vote e mo è fernuta.
50
’O “luciano„ d’’o Rre
Meno male ca po’ se repigliaie
e ’o juorno appriesso, all’unnece, partette!
Ma credite ca ’o tiempo s’accunciaie?
’O nfierno pure llà nce se mettette!
A munno mio, nun m’è succiesso maie!
Fui tanta e tanta ’a neva che cadette,
ch’io nun v’abbasto a dicere: zeffunno!
Llà nce cadette ’a neva ’e tutt’'o munno!…
Nu cielo ’e chiummo, na campagna janca,
e nnanz’all’uocchie nu lenzuolo ’e neva!
Tu vai cecato… ’A zoza ca te stanca,
’e ddete ’e fierro… E ’a forza, chi t’'a deva?
Po’ cierti vventecate, a dritta e a manca,
ca sulamente Dio nce manteneva…
-Che facimmo?… Fermammo, Maistà?
E isso:-Jammo nnanza a cammenà!
