Chesta paggena è stata leggiuta du' vote e mo è fernuta.
69
’O “luciano„ d’’o Rre
Nun se gudette niente, ’e chelli ffeste!
Parlava appena, passanno ’e paise!
Quatto, cinco parole, lestu-leste,
addò ca chillo ne facea fa’ rise!
C’argentaria! C’adduobbe e frusce ’e veste!
’E Ppuglie ne spennettero turnise!
Triate, balle, serenate, sciure,
e isso ncopp’'a branda cu ’e delure!
Ogge, nu poco meglio, e respirava;
dimane, verde peggio d’'e ccutogne!
A tavula, penzava e nun magnava…
Cu ’a capa sotta, se guardava ll’ogne…
Murtrïuso, accussi, sfarnetecava,
penzanno certo a chelli gran carogne
c’aveano armato contr’a isso ’a mano
e ’a bbajunetta ’e Gisalao Milano.
