'E scugnizze - Gente 'e malavita/Gente 'e mala vita
GENTE ’E MALA VITA
(1897)
PASCALE ’E BELLO
Ron Pascalino ’e Bello, ’o vrennaiuolo
è l’ommo ca cumanna ’a pezza sana.
Quann’era nu scugnizzo ’e copp’’o Muolo
sceppava ’a jurnatella int’’a Rugana.
Po’, comme va? Piglia e pigliai nu vuolo!
Luvaie da ’o peccato ’a Puzzulana,
’a Camorra ’o facette cuntaiuolo,
e mo è tutt’isso, all’Aria Catalana.
Tene ’e cuppè r’affitto, ’e vuzze a mare,
’e ccase ’a Torre, ’e vacche a Margellina,
otto o riece puteche ’e farenare…
E quanno ha da sagli’ nu riputato,
Pascale ’e Bello se sceta matina,
e va a fa ’e patte ncopp’’o Cumitato.
COPPOLA-ROSSA
Gennarino Sbisà, Coppola-Rossa,
nfaccia ’a zumpata nisciuno l’appassa!
Si tene ’e faccia pure ’a truppa a massa,
tira mana, e fa sempe ’a stessa mossa.
Te mena ’a curtellata a scassa-scassa,
sott’’o prummone, ca te vene ’a tossa;
te fa sputa’ nu poco ’e scumma rossa,
te vere care’ nterra e po’ te lassa.
Gennarino era giovane ’e chianchiere,
ma mo l’hanno cacciato cammurristo
pecchè è suggetto ca po’ fa’ ’o mestiere.
È ’o "primmo taglio" ’e tutt’’e malandrine!
Pe nu crapiccio ca vo’ pare’ nzisto,
ncujeta pure a Cristo int’’e lupine!
MICHELE 'O CALAVRESE
Annammecato cu tutt’’a Ruchesca,
Michele è l’ommo ca mo nce vo’’o fatte,
le si’ nemico? E l’’e fatto fa’ chiatte!
Te veve int’’a nu surzo d' acqua fresca!
’E nnammurate ’o pavano; isso ’e vatte;
po’ s’’e pporta ’ncampagna e fa una mmesca!
’E vvire int’’e ccarrozze a quatte a quatte…
M’’e tratta a usa crape, e ’a sera ’e ssesca.
Se jenche ’e ssacche chiene ’e muccatore,
scioglie ’e nnòreche astrente e fa renare;
po’ va ncopp’’o bigliardo a fa ’o signore.
Ma quann’è ca se parla ’e se fa nnanza,
ca na femmena ’o chiamma a prutettore,
ricìmmela comm’è, ca nun s’’a scanza!
’O STUORTO
Tene n’ abbelità p’ ’o frutto ’e scasse,
ca ’o chiammano "’o papà r’ ’e mmascature".
T’ ’o vire renzia’ pe sott’ ’e mmure
guardanno a uocchio ’e puorco e jenno ’e passe.
Po’ se fremma... Fa nfenta c’ aspettasse
a quaccheruno... Guarda ’e ccriature...
Se stupetea si passano signure,
surveglia ’a strata, pe chi sa, sfullasse...
Quacche sera s’ attarda. Aspetta a ore:
e quann’ ’o palo l’ ha fatto ’o signale,
scassa, trase, e se mette a ruvista’!
Sbacanta a una a una ’e tteratore,
s’arronza ’abbrunzo ’a rint’ ’e vernecale,
po’ lassa ’a porta aperta e se ne va.
’O CAVALIERE
Comme se rice? Era na bona pezza:
pigliava a uno e n’ apusava a n’ ato.
Primma faceva ’o guardio ’e sicurezza,
po’, chi sa comme fui, ne fui cacciato.
Po’ pe na truffa jette carcerato,
ma doppo accumparette na bellezza!
Cu ’anelle ’e dete, tutto ammantecato,
chillo teneva n’ anema ’e sciurdezza!
Abbascio ’e Mprese aprette n’ Aggenzia
e doppo, arrecuglienno ’accuppatura
d’ ’o mmeglio ca putette cchiù aruna’,
lassai ’ntrezzetto a tutt’ ’a cumpagnia
e squagliai n’ ata vota. Appura appura,
è addeventato n’ ommo ’e qualità!
’O STURENTE
Sabbatiello ’o Sturente, int’ ’a Renaccia
è tenuto pe ccarna malamente!
Quanno se parla attuorno d’ ’o Sturente
se vede giallia’ cchiù de na faccia.
’O bbell’ è, c’oggirì prisentamente,
chi se fa ’o fatto suio, niente ne caccia.
S’ ha da zuca’ ’a camorra e l’ammenaccia,
t’ ’o vire vattia’ pe n’ ommo ’e niente.
Quann’ è ’a matina, int’ ’o Mercato ’e frutte,
cu ’a cravascella mmano e ’a sicaretta,
sponta ’o Sturente e fa: — Bongiorno a tutte!
E stu bongiorno ccà te véne a di’
ca l’ ’e ’a mpusta’ na lira ogne carretta,
e meza lira ’a sporta, ’o llunnerì.
SCIASCILLO
’O cchiù cuieto. Riccio ’e capellera,
doie spalluzzelle secche e scuntraffatte,
nu mustacciello a pile ’e spiche. Nera
’a petena r’ ’a faccia e ll’ uocchie ’e gatte.
Rorme ’a matina ma fatica ’a sera:
t’ ’o vire arriva’ ’ncuolle a ll’antrasatte.
T’ha da veni’ a truva’? Vene ’e carrera!
Te ra’ na base, e songo affare fatte.
Nun parla, nun se ntrica, nun fa mosse;
te rice: — Jate llà! — Quann’ha ritt’isso,
’o butto è scicco, songo morza grosse.
Nun s’appicceca mai, nun ammenaccia,
ma quanno mena ’e mmane int’ ’a n’aggrisso
tene ’o paccaro nzisto, a ntorzafaccia.
"’ONNA TERESINA"
Si parla, parla tutto affemmenato;
chiàmmalo bello, e chillo quase svene...
Porta ’o bracciale, tene ’o nnammurato...
È malatìa, che ssà, chella ca tene!
Dille c’addora ’e musco ’e ll’ ’e priato,
falle nu surdiglino, e chillo vene.
È cellecuso, e si sta risturbato,
sputa cu nu risgusto, comm’ ’e pprène.
’O ccert’ è ca se fraveca ’e russette,
se tegne ll’ uocchie cu na ggravunella,
tene ’a cammisa ’e seta cu ’e merlette.
Rire sempe, cu ’a gente mmiez’ ’a via,
e porta ’a carza rosa e ’a scarpinella
cu ’a nocca ncoppa e ’o tacco a fantasia.
CARMENELLA
Chill’uocchie nire ’e Carmenella mia
te nchiuvàvano ’a gente a ciente passe!
E chella vocca! Era na frenesia!
C’addore e che sapore d’ananasse!
Io mo’ vulesse ca s’allicurdasse
quann’ ’a scuntraie arreto a Vecaria!
Vurrìa vedè si se ne ridarrìa
comm’a tanno, e si ancora arrepassasse!
E si tanno ’a sparaie ma n’ ’a cugliette,
e m’arrestàino mpont’ ’o vecariello
pe causa ch’ ero ancora nu guaglione,
mo’ pe sfregio, pe sfizzio e pe dispiette
m’ ’a guardasse cu ll’ uocchie a zennariello
e lle facesse ll’atto c’ ’o bastone.
’A ZEPPULAIOLA
Tant’anne fa, quann’era viva ’a nonna,
Cannetella era ancora ’a capa nenna!
Teneva na faccella tonna tonna,
era cchiù bella e leggia de na penna.
Pareva na rusella ncopp’ ’a na fronna,
cu nu cunfietto faceva marenna;
mo si ’a vedite, mannaggia ’a culonna!
pare ngrassata cu cucozza e vrenna.
Culetta ’a Chiatta m’ ’a mettite ’e parte:
Cannetella è tre vote a Sandunato!
Venne ’o baccalà fritto dint’ ’a carta.
Ha truvato a nu tale e s’ha spusato;
’a sera ’o vatte: fanno sempe un’arta!
Ma a tutt’ ’e dduie ’e vvatte ’o nnammurato.
"’A MARCHESA"
Quann ’a canuscev’ io, Nannina Schiano
jeva cu ’e scarpuncielle rutte ’o père,
steva cu ’a suvarara int’ ’e Lanziere
e lle putive da’ nu soldo mmano.
’O pate era nu malo crestiano,
faceva tutte ll’arte, c’ ’o penziere,
ma jeva bello sulo a fa ’o mestiere
d’arrubba’ ’a gente mmiezo San Gaitano.
Doppo tant’anne ca ’e pperdette ’e vista,
mo' aggio saputo ch’ isso sta ngalera;
essa tira carrozza e fa l’artista.
Parla scio—sciommo, dice ch’ è frangesa,
tene tre serviture e ’a cammarera,
addora ’e musco e ’a chiammano ’a Marchesa!..
’A SCHIAVETTA
C ’o carofano russo int’ ’e capille,
è guappa e geniale ’a ggravunara;
t’appiccia dinto core na carcara,
te n’arrobba suspire, a mille a mille !
Tene nfronte na schiocca ’e ricciulille
ca me pareno ’e crocche d’ ’a vurpara,
e mpont’ ’o musso chilli duie pelille
vanno cinquanta pezze a centenara.
E pure chesta bella femmenona
ca putarrìa da’ sfizzio a tanto ’o chilo,
ha perza ’a pace soia pe na guagliona.
S’ha tene rint’ ’a casa ribbazzata
e se ne sta scennenno mpilo mpilo...
Va trova c’hann’ ’a fa, ll’ una cu ll’ ata!
’A MPIGNATORA
Quann’ ’o sabbato ’o juorno ’onna Carmela
va attuorno arrecuglienno, uh mamma mia !
’A gente se giallèa comm’ ’a cannela!
Chella ve fa veni’ na malatia!
’A Rossa ha da scunta’ na pezza ’e tela
e pava ’o sango suio; ronna Lucia
ha da scunta’ na vesta; a siè—Michela
l’ha da ra’ tanto e tanto ’e sanzarìa...
’A mpignatora, tutta ncannaccata,
vicino ’e qquatte a vide già spunta’
cu o cane ’e presa e l’ ommo! E fa ’a cuntata.
Arrecoglie e s’ ’o ssegna int’ ’a libbretta,
ma quanno vère ch’ è mal aria e ba’
caccia ’a spatella ’a rint’ ’a na cazetta...
’O MPUOSTO
I.
— Signori belli... Santanotte attuorno!
— Salutammo, Pascà! Nu rito ’e vino?
— Avisseve veruto a Tore ’e Cuorno?
— Mo è sciuto! Ha ritto... jeva ccà vicino...
— ’O sto ghienno truvanno ’a miezoiuorno...
— E chillo ha da turna’... Sta cu Peppino...
— Chi Peppino? — Peppino ’e Zi—Taluorno,
’o caiunzaro, chillo r’ ’o Pennino...
— Si torna, me facite na finezza?
Lle ricite accussì ca Pascalotte
tene ’a mmasciata ’e Nanninella Frezza...
Chillo capisce e ghiesce... E grazzie tante...
Signori miei!... Ve lasso ’a santa notte!...
— Fa malu riempo! ricette ’o Sfriggiante.
II.
Pascale ascette. Doppo quatte passe
se sentette nu fisco ’e canuscenza.
Nun rispunnette: se facette ’a rasse
ma senza niente perderse ’e prisenza.
Na voce lle dicette c’aspettasse:
— Ron Pascalì... nu poco e cumpiacenza...!
Po’ ’a rint’ ’o scuro, menanno ’o cumpasse,
spuntaie ’o Stuorto... Cammenava ’e renza.
Appriesso ’o Stuorto, n’ ati sse’ perzune
senza manco sciata’ se fanno sotto
cu ’e mmane rint’ ’e ssacche d’ ’e cazune.
— Scusate, giuvino’... na parulella!...
— Manco meza, pe cierti carugnune!...
Chi vo’ parla’, tirasse a livurdella!...
III.
E s’accustava. Ma na botta secca
se sentette p’ ’e vìcule sulagne;
po’ gente che scappava ’a parte ’a Zecca,
e dint’ ’o scuro accumminciai nu lagne.
"Aiuto!... So’ Pascale 'a Pignasecca...
Songo stato... sparato d’ ’e cumpagne..."
’Ntanto n’ommo arrivava int’ ’a Giurecca
e sbatteva ’a purtella appriesso ’e Bagne.
— Nannì, Nannì! — Chi è? Stammo rurmenno!
— Nannì!...— E chi site?...Ma ricite o nomme...
— Rapre, ca Pascalotte... sta murenno!...
Se sentette nu strillo risperato,
e pe mmiezo ’a Giurecca ’e passe ’e st’omme
ca s’ ’a sfelava comm’ a nu dannato!
"’O BELLO GUAGLIONE"
— Mo’ vene Pasca!... Limungella fresca!
Aggio penzato ca vogl’ i’ a fa’ Pasca
a ddu Catarenella int’ ’a Ruchesca!
Tras’ int’ ’o palazziello e faccio ’o fisco.
’A ronna ca nun pava, io n’ ’a capisco!
L’ ommo fiura e ’a nnammurata allasca!
Se sape! Embè, cher’ è, mo vene Pasca,
e pozzo appiccia’ ’o ffuoco senza ll’ esca?
Llà quacche cosa pure me l’ abbusco:
na fumatella int’ ’a na pippa lasca,
’o casatiello, ’o miezo litro nfrisco,
na cinco—lira e... nu poco ’e ventresca!
Catarenella, ’a n’ anno c’ ’a canosco,
sempe e quanto songh’ io, m’ aiza ’a frasca!
Embè, quanne so’ stato a San Francisco
n’ aggio sempre sparato ’o meglio masco?
’O capo—guardiano ’on Peppe Fusco,
chillu bell’ ommo cu ttanto na mosca,
quanno passava, me faceva ’a rasca...
Quant’era scemo, e quant’ ’o cumpiatisco!