'E scugnizze - Gente 'e malavita/'E scugnizze
'E SCUGNIZZE
(1897)
I.
Arravugliate, agliummerute, astrinte,
’e vvide durmi’’a notte a nu puntone.
Chiove? E che fa! Quanno nun stanno rinte
’a meglia casa è sott’a nu bancone.
Passa ’o signore, ’e cconta a diece, a vinte,
’e ccumpiatesce e lle mena ’o mezzone.
Cierte, cu ’e bracce chiene ’e chiaje finte,
cercanno ’a carità fanno cuppone.
Cu ’e scorze ’e pane e ll’osse d’’a munnezza,
màgnano nzieme ’e cane a buon cumpagne;
na streppa ’e nu fenucchio è n’allerezza!
Uno ’e miezo Palazzo, nu ziracchio,
p’ave’ nu soldo, ne faceva lagne!…
Nun l’aveva? Allazzava nu pernacchio.
II.
Attuorno ’o ffuoco, pe ttramente chiove,
cu ’e mmane stese e ’e ffacce appapagnate,
parlano ’a notte d’’e ccanzone nove,
d’’e guardie, d’’e cumpagne carcerate,
’e Schinizze ca tene ’e cape chiuove
e chi sa comme s’avarrà abbuscate,
d’’a tratturia sott’’o Castiello ’e ll’Uove
e de mo che s’aràpono ’e triate.
Arriva uno currenno alleramente,
sguazzarianno dint’all’acqua nera;
se mposta nnanza ’o ffuoco e tene mente.
Po’ strilla: — Santanotte a sti scognizze!
E mena nterra, vicino ’a vrasera,
nu cartucciello ’e curniciune ’e pizze.
III.
Vanno a stènnere ’a mana, e ’o capo ’e ll’uorte
pe cumpetenzia ha da fa’ isso ’a parte!
Primma te nfila na carretta ’e muorte,
po’ caccia ’a dint’’a sacca o’ mazzo ’e carte.
—"L’asso nun magna!" E chi fa l’uocchie stuorte,
perde ’o deritto suio quanno se sparte!
Mmesca, taglia e dispenza. ’O vuo’ da’ tuorte?
Chillo è cchiù gruosso ’e lloro, e sape l’arte.
’A parte ’e ll’asso, chella llà le spetta,
e so’ ddoi parte; e po’ da chella ’e ll’ate,
na retagliella pure ’a pò luva’!
Doppo, se magna. E l’asso guarda e aspetta;
fa sputazzelle cu ll’uocchie nturzate,
e tene na speranza ’e nu chi sa…
IV.
Chella è camorra, e s’hann’’a sta cuiete
pecchè se sape ’o fatto comme va…
Ma quann’è pe dispietto, fanno a pprete,
e chi è sciaccato se fa mmedeca’!
’A fora ’e chesto, ’o core mpont’’e ddete,
ca mmiez’a lloro chesto ccà nce sta!
Tu vai p’’a famma, chillo va p’’a sete,
chi è primmo veve, magna e fa magna’.
È na scuglietta ’e palatine ’e Frangia
fatte pe s’aiuta’ ll’uno cu ll’ato…
’A jurnata nun vene? Embè, s’arrangia!
’A squatra ’e notte fa na spezzione?
Nu scugnizzo va rinte, carcerato?…
Nun parla, pe lliguardo d’’o bettone.
V.
Lesto ’e mana, capace, traseticcio,
busciardo, mpustatore e curaggiuso,
riale e nzisto comm’’o cane riccio,
cammurrestiello ’e nasceta, acciaccuso,
quanno se trova mmiez’a nu pasticcio
sape fila’ deritto comm’’o fuso;
si ’o vuo’ pruva’, miettelo int’a nu mpiccio,
e a dùrice anne è ’o primmo mafiuso.
È geniale, è guappo, è mariuolo;
te leva ’a dint’’a sacca ’o falzuletto,
ca si sultanto ’o vide… è nu cunzuolo!
Si fa ’o pezzente, ’o sape fa’ a duvere:
s’arrogna, tremma, chiagne… ’O zecchinetto
t’’o joca comm’’o primmo cavaliere.
VI.
’A nnammurata è sempe cerinara.
Sfacciatella a diece anne, ’e ccose ’e Dio
’e ssape tuttuquante! È corta e amara.
A isso ’o chiamma ’o nnammurato mio.
P’isso cu ’e ccumpagnelle s’’a richiara,
ll’anduvina int’all’uocchie ogne vulìo,
lle porta ’e solde, e sùbbeto se mpara
chello ca nun sapimmo vuie e io.
Isso ’a vatte. E si vede ca ’e signure,
doppo ca l’hanno puoste ’e solde mmane
ll’accarezzano… embè, lle sape a dure!
’A guarda storta e nun ’a lassa ’e père;
po’ ll’ave a taglio, e a botte ’e mulignane
lle fa chelli braccelle nere nere…
VII.
’E scugnizze d’’o Sciore e d’’e Bbalanze
quanno vonno passa’ meza jurnata,
se strègneno ’a currèa pe tuorno e ppanze
e, cu na cantatella e na siscata,
pìgliano ’a via, cu ’e cchiù guagliune nnanze,
e s’avviano adderitto ’a stessa strata:
fora ’o Ponte se spartono a paranze,
e te fanno ’a pazzia d’’a pretïata.
Ciento, duiciento, treciento guagliune,
spartute ’e faccia a fronte, una filèra,
e ognuno ’e lloro càrreco ’e vricciune,
appena arriva ’o fisco d’’o signale
lànzano ’a preta ’e na tala manera
ca quann’è doppo è astritto nu spitale.
VIII.
’O petriazzante buono, e chillo ’o ssape!
Te mena ’a vreccia, e s’’a sape scanza’!
L’abbasta sulo ca nun l’ave ’ncape!
S’ha da sta attiento ’e nun se fa sciacca’.
"Quann’’o mellone è russo e tu l’arape,
se vede ’o rrusso.... e tanno, che vuo’ fa’?
Perciò, guagliu’, stateve attiente ’e ccape!
Scanzàteve cu ’a meglia abbelità!"
E chi sente ’o cunziglio e guarda ’nciele
pe vede’’a preta addò le po’ cade’,
a chillo ’a preta nun ’o fa michele!
E pe ttramente sèquita ’o scherzetto,
’a folla, ch’è curruta pe vede’,
lle sbatte ’e mmane ’a copp’’o parapetto.
IX.
Quann’’a jurnata è moscia, ’n cumpagnia,
pe se spassa’, disegnano ’e guarriere.
Se mettono accuvate mmiezo ’a via
e fanno ’a folla, e songo artiste overe.
Uno fa nu Gran Turco d’’a Turchia
luongo pe quant’è luongo ’o marciappiere;
n’ato fa ’o scuto e ’a langia ’e ll’Argalìa,
n’ato fa Buovo, e n’ato fa Rizziere.
Po’ si pe ccaso sentono l’addore
de nu sconcecajuoco ’e pulezzia,
che vuo’ acchiappa’! Scappano sempe llore!
Quacche vvota nu turzo, ’a copp’’a mana,
arriva a ’o guardio e ’o tene cumpagnia…
ma ’a rocchia d’’e scugnizze è già luntana.
X.
Hanno mai canusciuto ’e mmamme llore?
Hanno chiammato mai pate a nisciune?
Chi nce l’ha ribbazzate, dint’’o core,
da che so’ nate, ’e vizzie, a une a une?
Tèneno frate, zie? Tèneno sore?
Ne sanno niente, ’e poveri guagliune?
Sguìgliano comm’’e funge, a ciente ll’ore…
Cercano pane, e trovano mezzune.
Ch’hann’’a sape’! Sultante, jenno ’a scola
d’’e cchiù gruosse c’arrobbano, lle pare
ca songo nate pe sta cosa sola,
e s’’a mparano bona. E vanno nnanza,
primma munezzarielle e muzzunare,
po’ mariuncielle, e servono ’a paranza.
XI.
A quinnice anne ’e cchiù scieme so’ nziste,
già pittate p’arruobbe e ferimente;
’e ccancelle ’a “Cuncordia” l’ hanno viste,
e già parlano ’a lengua malamente.
Già penzano ’e cacciarse cammurriste,
e fanno a chi fa meglio ’o spirimente:
e ll’Umirtà già sanno ca cunziste
a chi è cchiù lieggio ’e mane e preputente.
’O riesto ’o ffanno dint’’e ccammarate
d’’o “Carmene” addò trovano ’e cumpagne
ca primm’’e llore stanno carcerate,
e quann’èsceno a luce ’e libbertà
sanno qua’ pane è chello ca se magne
a nomme ’e ll’Annurata Sociatà.
XII.
Scialone, senza pate e senza mamma,
fa pranzo e cena cu nu casatiello.
Sta tutt’allero e zompa a una gamma
quanno ha abbuscato quacche surdacchiello.
Ha fatto ’o patto cu nu cufaniello:
nce dorme ’a dinto, e nun se more ’e famma,
pecchè ’o juorno va a fa’ ’o munezzariello,
e ’a notte ’a passa nzieme ’a picciuttamma.
Comm’’a maruzza trase dint’’a scorza,
isso trase int’’o cuofano e s’addorme.
Nun tene suonno? Attuomo fa na corza…
Runzèa pe nnanz’’e llastre d’’e cafè,
e quanno pò aruna' mezzune a chiorme,
tanno se sonna ch’è nu figlio ’e rre!
XIII.
Zuppinella è n’“alice ’e matenata”,
dorme a spichetto ncopp’’e ssaittère.
Va vennenno cerine int’’a jurnata
ma a fatica’ nisciuno ’a tene père.
Quann’è l’arrivo ’e quacche curazzata
e scènneno ’e pachiochie int’’o Peliere,
lassa ’e cerine e corre p’’a campata,
e mena ’o rangio ca va bella overe!
’A notte ’a vide carrecata ’e mbroglie
tutte arunate int’’o mantesenielle…
Catenelle spezzate e portafoglie.
Va add’’o capo-paranza, aposa e zitto.
Po’ quann’ha avuto ’o ssuio, centesemielle,
s’’e spenne int’’o Pennino a pesce fritto.
XIV.
A Peppeniello ’o figlio d’’a Vaiassa
va trova pecchè ’o chiammano ’o Pichillo!
È nu fruvolo pazzo, è nu muscillo;
’o sanno tuttuquante ’a Porta ’e Massa.
Bellillo, piccerillo piccerillo,
cu na faccella appesa t’arrepassa.
È ghiusto miezo parmo, ma tantillo;
e pe giacchetta porta meza sciassa.
D’’e ddoi code n’ha fatto nu cazone,
e accussì cumbinato, a primma sera,
se va a mena’ sott’a nu lampione.
E stenne ’a mana tanto naturale,
e chiagne buono ’e na tala manera,
ch’a mezanotte conta ’e solde a pale!
XV.
Cchiù fàuzo de nu soldo papalino,
Cicereniello è nu malu carnetta.
Vo’ fa ’o cammurrestiello, ’o malandrino,
e, comme fosse, è ’o capo d’’a scuglietta.
Cu chella bella faccia ’e San Giacchino
se piglia ’o mmeglio quanno nun le spetta;
po’, si s’ha da mena’, se mena nchino,
e dice ch’è baratto e nun aspetta.
Tene nu cane, e l’ha nzignato buone
a zumpa’ ncuollo a chi fa troppo ’o nzisto
o pure ’a parta nun ’a vo’ caccia’…
Fa nu fisco, e fa correre a Lione
c’afferra ’e ggamme pure a Giesù Cristo!
E tutt’’e ddui se fanno rispetta’!
XVI.
Carulinella venne ll’ache inglese
e saglie e scenne ’a copp’’e trammuè.
Quann’abbista ’o cafone d’’o pagghiese
tanto ’o mpapocchia e ’o stona comm’a che,
ca chillo, ch’è venuto pe fa’ spese,
se piglia ll’ache e ’accummencia a vede’:
— Na carta chiena ve dura nu mese,
essa lle fa — pigliatevenne tre!…
Quann’’o cafone scenne ’a copp’’o tramme,
Carulinella ha fatto ciento miglia!
L’ha da tene’ de fierro, chelli ggamme!
E chillo, int’’a lucanna, cu na pena,
sta già screvenno ’a lettera ’a famiglia
ca lle manca ’o brillocco d’’a catena!
XVII.
Mmiezo Palazzo, a ’e quatto e meza ’e notte
l’urdemo lampione s’è stutato;
ll’urdema carruzzella, a ossa rotte
se retira c’’o mantice aizato.
Passo, e tòzzo c’’o pede a nu fangotte…
M’acalo… guardo… "Neh guaglio’! Ch’è stato?"
Me stenne ’a mana, ’o tocco: chillo scotte.
Va trova ’a quanto tiempo n’ha magnato!
Le do’ se’ solde. A stiento isso se sosa.
— E mo addò te ne vai? Che vai facenno?
Viene cu mmico, spiènnete quaccosa!
Isso risponne: — L’aggia purta’ a mamma…
Chella aspetta; signo’, comme m’’e spenno?…
’A puverella pure tene famma!