'E scugnizze - Gente 'e malavita/Pascale 'e bello
PASCALE ’E BELLO
Ron Pascalino ’e Bello, ’o vrennaiuolo
è l’ommo ca cumanna ’a pezza sana.
Quann’era nu scugnizzo ’e copp’’o Muolo
sceppava ’a jurnatella int’’a Rugana.
Po’, comme va? Piglia e pigliai nu vuolo!
Luvaie da ’o peccato ’a Puzzulana,
’a Camorra ’o facette cuntaiuolo,
e mo è tutt’isso, all’Aria Catalana.
Tene ’e cuppè r’affitto, ’e vuzze a mare,
’e ccase ’a Torre, ’e vacche a Margellina,
otto o riece puteche ’e farenare…
E quanno ha da sagli’ nu riputato,
Pascale ’e Bello se sceta matina,
e va a fa ’e patte ncopp’’o Cumitato.