Paggena:'E scugnizze - Gente 'e malavita.djvu/75

'A Wikisource.
Chesta paggena è stata leggiuta du' vote e mo è fernuta.

II.

Pascale ascette. Doppo quatte passe
   se sentette nu fisco ’e canuscenza.
   Nun rispunnette: se facette ’a rasse
   ma senza niente perderse ’e prisenza.

Na voce lle dicette c’aspettasse:
   — Ron Pascalì... nu poco e cumpiacenza...!
   Po’ ’a rint’ ’o scuro, menanno ’o cumpasse,
   spuntaie ’o Stuorto... Cammenava ’e renza.

Appriesso ’o Stuorto, n’ ati sse’ perzune
   senza manco sciata’ se fanno sotto
   cu ’e mmane rint’ ’e ssacche d’ ’e cazune.

— Scusate, giuvino’... na parulella!...
   — Manco meza, pe cierti carugnune!...
   Chi vo’ parla’, tirasse a livurdella!...



73