La Vaiasseide/Canto Quarto
ARGOMIENTO.
|
CANTO QUARTO.
H
Aveva Carmosina tanto à forte
Ca Ciullo non vedea stanno presone,
E commo fosse connanato à morte
Nficcato à lo mandrullo, ò cammarone,
Chiagnenno tozzolava chelle porte
Lebertate cercanno à lo patrone,
Ma isso fino à mo nò l’hà respuosto
Tanto è crodele, e commo vreccia tuosto
E mentre strilla, e se rascagna, e scicca
Vrociola Ciullo dinto na cantina,
E cade assaie chiù auto che na picca
E vrociolanno fà na gran ruina,
Tanto che pe gran iaio essa se ficca,
Sempre strillanno dintro na latrina
Ciullo che vede scuro, e chello hà ntiso,
A lo nfierno se crede essere sciso.
E deceva chiagnenno ò maro mene,
E quanno Carmosina vedarraggio
Se sò caduto à le nfernesche pene,
E chi sà quanno maie da ca sciarraggio
Penzava priesto d’abracciare à tene,
E mo nigro me scuro abbracciarraggio
Pe parte toia, ò Carmosina mia,
O Mecene, ò Protone, ò quarch’Arpia.
Pe lo tufolo steva ausolianno
Carmosina sorresseta, e sbanuta
Zò che deceva Ciullo gualianno,
Ed havenno la voce canosciuta
Subeto scette, e iezese nzeccanno,
Decenno, s’eie Ciullo me saluta;
Ma isso che credea stare à lo ’nfierno
Le parette vedere lo Zifierno.
E tremmanno tremmanno le deceva
O spireto nmarditto fatte arrasso
Penzanno perche tenta la vedeva,
Ch’era pe lo tentare Sautanasso:
Ma essa ch’isso meglio canosceva
Accostata che s’appe nauto passo
Decenno (l’abbracciaie) facce de boia
Zitto ca songo Carmosina toia.
Tanno respose, non me delleggiare
Si Carmosina non me vide acciso,
O fuerze chillo che puozze squagliare
O l’ombra de chill’hommo ch’oie s’è mpiso;
Ed essa, se bè stongo pe crepare
Respose, puro schiattome de riso,
Non me vide, tè, toccame sciaurato,
Viata mè co tale nnammorato.
Voleano dire mò de che manera
L’uno, e l’auto llà dinto se sò ashiate.
Ma li compagne suoie de la varrera,
Che à la desgratia s’erano trovate,
Erano iute tutte de corzera
Facenno no greciglio pe le strate,
Tanto che venne chiù de no parrella
Chi co cuofano, e chi co fonecella.
E subeto calaro à lo pertuso
Chiammanno Ciullo pe ne lo tirare
Lo quale priesto pe no stare nchiuso
Covernamette disse, e po afferrare
Se voze à chella funa, e ire suso,
Ma Carmosina mesese à strillare
Decenno te ne vaie mo tradetore,
E te puorte de me l’arma, e lo core.
Vecco c’hanno la funa già calata
Legate mò fatte tirare susso
Ca me ne vengo co tico abbracciata,
Se non vuoie che te ntommaca sso musso,
Uh Carmosina è commo si arraggiata,
Respose Ciullo, e se facette russo,
Se me vuoie bene lassamenne ire
Ca commo è bruoco te farraggio scire.
E s’attaccaie, e po decette tira,
E l’aisava chiù de no guarzone
Quanno essa se votaie co na granne ira,
Che parze (arrasso sia) fosse scorzone,
Ed à lo naso fecele la nmira
Pe faresenne propio no voccone,
Ma non potenno, le gamme l’afferra,
E dero tutte duie de zuffete nterra.
Ca reiere non potte tanto pisemo
La fonecella ch'era nfracetata
Tanto ch’onne uno havea lo parasisemo,
Ca fò troppo crudele vrocioata,
E decevano ohimè dove nce misemo,
Tiente che bella cocchia stroppiata
Tiente lo premio che nce dace amore,
Presonia, chianto, vrognola, e dolore.
Ntra tanto lo patrone era venuto
De Carmosina, ch’era meza morta,
E dinto li cosciale de velluto
Và cercanno la chiave de la porta,
Ne la trovanno, se fo resoluto
Darela nterra, ch’è la via chiù corta,
E scassata che fù Ciullo trovaie
E de tutto lo fatto lo spiaie.
Ed isso disse patrone mio caro,
Mo conto pe lo filo commo è stato
Se be me trovo commo fele ammaro,
Jo no iuorno venea da lo mercato,
E chiste uocchie co l’uocchie s’affrontaro
De stà cornuta, che m’hà ntommacato
Da donne Ammore, che n’havèa che fare
Me voze co na frezza spertosare.
M’accomenzaie à sbattere lo core,
E perdiette lo suonno, e l'appetito,
Comme fa lo malato quanno more.
E pe golio de l’essere marito
Noratamente faciette l’ammore,
E pagaria pe haverela sto dito,
Mo correnno à stà festa vrociolaie
E cà dinto cod essa me trovaie.
E se besteva tutto mbrognolato
E me doleano l’uffe, e li filiette
Pe farela da vero nnammorato
Commo ch’era essa propio conoscette,
Da pò che m’appe quale speretato
Pe paura ca tenta le vediette,
Le sautaie ncuollo lieggio comm’à grillo
E diezele no vaso à pezzechillo.
Ma non volenno ch’io me ne sagliesse
Quanno tirare ncoppa me vedeva
A le gamme afferrata me se messe
E commo à grancio ò purpo me stregneva
Ma pe lo piso granne, ò se rompesse
La funa, ò ca scappasse à chi teneva
Simmo cadute ed io moro crepato
Se no me schiaffo dinto no crastato.
Che è quanto io te pozzo mo contare
E de lo mio non te nce metto niente
Hora se nce volite perdonare
Ed havere pietà de sti tormiente,
Facitence stà sera ngaudiare
Ca facimmo chiammare li pariente,
E ve restammo schiave, ed obrecate
Propio commo nce havissevo accattate.
Lo gentelommo havennolo sentuto
E canoscenno ca lo verò hà ditto;
Le disse io me so propio ntenneruto
E non te voglio chiù vedere affritto,
Pocca co nore mio nce si venuto
Va pigliatella, e singhe beneditto
E iammoncenne suso, e à sta pedata
Conzertammo pe craie st’auta nmarcata.
Accossì s’abbiaro chiano chiano
Da la cantina a la vota de suso
Tutte alliegre, e contiente pe la mano
Comme è de Zite la costumme, e l’uso
Ma perche steva Ciullo poco sano
Pe la caduta è de sodore nfuso
Lo gentelommo pe compassione
Lo fa corcare ncoppa no saccone.
E disse frate mio pocca nzorato
Te si con chesta ch'è zitella mia,
Voglio che nnanze singhe covernato
Pe te scanzare da na malatia,
Mo mò sarrà lo miedeco chiammato
Azzò quarche remmedio isso te dia
Pe tutte chesse brognola sanare
Ca po craie ve farraggio nguadiare.
E subbeto mannaie lo servetore
A chiammare no cierto metsè tale
Ch’è no miedeco cierto de segnore
Ed hà sfrattato chiù de no spetale,
Venette, e ntiso havenno lo dolore
E còmmo e quanno se facette male
Parlaie toscano, e disse ho ’nteso à pieno
Ecco lo rezettario de Galeno.
Mo vedarrimmo s’à chesta caduta
Pocca eie stata dinto na cantina
E buono ontare co zuco de ruta,
O veramente co cera cetrina,
Chesta arte nostra eie na scienzia futa
Ed è de l'aute scienzie na regina,
Ed à trovato propio pe onne male
Aguiento, nmedecina, e servetiale.
Con chesto revocaie lo leuretiello
E quanno l’appe tanto pò leiuto
Che perzò nce haverria lo cellevriello
Onne auto letterummeco saputo,
Ashiaie che de mortella, e de rosiello
La porva (ò bello miedeco saputo)
Da pò ch’ontato haveva vuoglio rosato
Se semmenava à chello mbrognolato.
Accossi tanno de no cierto Losa
A la poteca no fegliulo iette,
Ed accattaie subbeto onne cosa
Secunno che deceano le lizzette,
Carmosina l’ontaie tutta piatosa
E pò lo pane cuotto le facette:
Conciato ch’era cosa prencepale
Con aglie, ed vuoglio, arecheto, acqua, e sale,
Carmosina perzì se fece ontare
Da n’autra vaiassella peccerella
E la matina se fece trovare
E ncirecìata, e netta, e ianca, e bella,
E tutte quante fece po scetare
Che ancora ncielo nce parea na stella,
Comm’à dicere mo propio à chell’hora,
Che no Toscano decerria l’aurora,
E iero tutte quante à ngaudiare
Accossine nchell’hora mateniello
Ca tiempo non ncè fò d’apparecchíare,
Pè fare festa è quarche banchetiello
A la tornata fece cocenare
Lo patrone doie torza, e no sciosciello,
E po facette à tavola sedere
A canto ad isso Ciullo, e à la moglíere.
Ma Carmosina che stea crepantosa
Ca s’era ngaudiata senza festa
Ieva facenno tanto la schefosa
Che parea che magnasse, ò sorva, ò agresta
Lo patrone le disse stai cianciosa
O Carmosina mia che cosa è chesta
Magna mò figlia mia stà allegramente
C’haie pigliato no giovane valente.
Lo saccio, respose essa, e chesto è chello,
Che me fà stare co sta crepantiglia
Ca ella che pigliaie no guarzonciello
Hà fatto festa, e tante parapiglia,
Ed io ch’aggio pigliato no gioiello
E m’havite chiammato sempre figlia,
So nmaretata senza nmità nullo
Che se dirrà de Carmosina, e Ciullo?
Respose isso te voglio contentare
E farraggio mo mò feste de truono
E no schitto de farence abballare
Ciento cascarde à tiempo de lo suono
Ma na farza perzì farraggio fare
Na mpertecata da no mastro buono
Forze d’ercole, e po li mattacine
E nmetarence tutte le vecine.
A chesta nova tanto se preiaie
La Zita che s’havette à shevolire
Pò commo n’allupata se magnaie
Quanto à tavola ncera da ngorfire,
Ne nce fù arciulo senza devacare,
(Bacco se nciere aiutamello à dire)
Po pe se ntrattenere fi à lo bruoco
Chiammaro ad uno co lo votta fuoco.
Lo quale ieze a lo Zito, e à la Zita
Mmezzanno quarche nova cascardella
Commo Prodenzia, maddamma la Zita,
Cunto de l’uorco, vascia, e serenella,
Deve iea Carmosina tanto ardita,
Iettanno cha è llà sta gamma, e chella
Che parea propio co li chianellette
Cavallo che se nmezza à fa crovette.
Accossì fi à la sera la passaro
Ficche fù l’hora de lo mazzecare
Che se sedero à tavola, e magnaro
Auto auto pe chiù priesto se corcare,
Ma pe parte de doce, ò quanto ammaro
La fortuna à lo lietto fece ashiare,
Pocca d’ammore ntranno à lo steccato
S’adonaie Ciullo d’essere legato.
Perche s’haveva tenuto na guagnina,
(Potta de nnico, e che mala ventura)
Che ieze de corzera à na vecina
E le facette fare na fattura,
Perzò, non potte maie con Carmosina
Fare quanto commanna la Natura,
Ma li scurisse se scolaro tutte
Senza d’ammore cogliere li frutte
Scompetura dello Quarto Canto.