Paggena:La Vaiasseide.pdf/53

45

ARGOMIENTO.

Ciullo se penza ch’è scazzamauriello
Vedenno Carmosina negrecata,
A lo saglire pò lo foneciello
Se rompe, e fanno n’auta vrociolata
Lo patrone, che scassa lo portiello
Ntenne commo la cosa eie accascata,
Conta Ciullo li guaie e catalaie
Ed isso pe pietà lo contentaie.

CANTO QUARTO.

H Aveva Carmosina tanto à forte
Ca Ciullo non vedea stanno presone,
E commo fosse connanato à morte
Nficcato à lo mandrullo, ò cammarone,
Chiagnenno tozzolava chelle porte
Lebertate cercanno à lo patrone,
Ma isso fino à mo nò l’hà respuosto
Tanto è crodele, e commo vreccia tuosto

E mentre strilla, e se rascagna, e scicca
Vrociola Ciullo dinto na cantina,
E cade assaie chiù auto che na picca
E vrociolanno fà na gran ruina,
Tanto che pe gran iaio essa se ficca,
Sempre strillanno dintro na latrina
Ciullo che vede scuro, e chello hà ntiso,
A lo nfierno se crede essere sciso.

E de-