La Vaiasseide/Canto Quinto
ARGOMIENTO.
|
CANTO QUINTO.
G
Ià scena l’Arba co lo mantesino
Zippo de coppetiello, e de papagno
E commo Perne quanto no carimo
Stizze sbruffava ncoppa le campagne,
Già li sturne, e le quaglie ben matino
Stordevano li Vosche, e le Montagne
E de la terra le ventosetate
Cotolavano l’erne defrescate.
Quanno s’era sosuto chiù arraggiato
Che chi vace pe debbero presone
(Ciullo marisso) è stea tanto scornato
Che non mirava nfacce à le perzone,
Pocca mpierdeto s’era affatecato
Senza dare à la zita sfatione,
E perzò se resorve ò de morire
O farene l’ammica arrepentire.
E sotta se mettette no cortiello
E de corzera la ieze à trovare
Perche s’hà puosto propio ncellevriello
Se no lo scioglie llà de la scannare,
Ma perche ieze troppo matiniello
L'abbesognaie la porta tozzolare
Ca se ieva chiù tardo ashiava apierto
E lo designo le resceva cíerto.
Ma chella s’affacciaie a la fenesta
A dove pe le fare quarche male
Abbesognava havere na valesta
E stare arrasso pe quarche aurinale,
E comme ch’era assaie chiappina, e lesta
Essa facette mò de lo fescale,
Gridanno guardia guardia ca m’apposta
Sto tradetore, testemmonia vosta.
Se Ciullo se ntosciai non te lo dico
Ca da te stisso te lo puoie penzare,
Puro fa nfenta de l’essere ammico
Fuerze co chesso lo facesse ntrare,
Ma chella ha ncuorpo lo fauzo nemmico
E se mettette chiù forte a strillare
Perche sapenno chello c’have fatto
A gran paura de no schiaccomatto.
Isso vedenno mò c’havea sgarrato
Chillo triunfo che penzava fare
Se lassaie propio commo desperato
A quanto chiù la potte inciuriare,
Non te curà ienimma de Crastaro
Ca mo propio te faccio ngabellare
Scrofazza pettolella singhe accisa
Ca puerte carta straccia pe cammisa.
Non m’haie legato strega fattocchiara,
Perchiepettola brutta zantragliosa, `
E Carmosina mia scura ed ammara
Faie che co mica stia pe chessa cosa,
Zitto, la burla costaratte cara
Ca vennetta farraggio auta è famosa
Vù se t’havesse mò le mano adduosso
Acciso sia se sano havisse nn’uosso.
Tiente ragazzo, le respose Cenza,
(Ch’accossì la guagnastra era chiammata)
De che te cride stare mpretennenza
Che me la fruscia co la sbraviata,
Và straccia vrache mio ped auta penza
Ca chiù pe te non stongo ammartellata
E s’haie golio d’havere ste bellizze
Va ca n’haie sceca; quanto curre, e mpizze.
A me co felatielle, pane a parte
Guatiaro, zuca vroda, mariuolo,
Tu faie co mico de lo capo parte
E po vorrisse quarche ferraiuolo,
Tu saie ca l’hommo mio è chiù de Marte
E te fa co no cauce ire à lo Muolo,
Squagliamette da nanze stammatina
Se provare non vuoie la tremmentina.
Venga, esca, dov’è chisto smargiassone
Con chisso la vogl’io (Ciullo decette)
Ca se schitto le dò no secozzone,
Con cheste mano mò che songo nette;
Voglio che zompa commo no pallone,
E corra iusto commo le staffette.
Ca io quanno da vero stò nzorsato
Me la piglio co miezo lo mercato.
No havea scomputo ancora isso de dire,
Quanno che Cenza da lo fenestriello
Lo nnamorato suo vedde venire
Che tanno se carcava lo cappiello.
Perche già le pareva de sentire
Parole di chi à male cellevriello,
E gridaie Mase mio viene mò suso
Shiaccamillo da chà sto presentuso.
Ed isso pe lo muro rente rente
Se ne trasette bello zitto zitto,
E pontellaie la porta da valente,
E pò disse da suso bè c’hai ditto,
Te cride fuorze de gliottì la gente
Affè s’à chesta tienemente schitto,
Te voglio fare tale mazziata,
Che n’aterno te scuorde stà iornata.
Me ne rido de chesso, viene à chiazza
Ca vedarimmo pò ssa bravaria
(Decette Ciullo) ca co spata, e mazza
Darraggio cunto de la vita mia,
E voglio propio sta ianara pazza,
Che mò me guasta la fattocchiaria
A despietto de chi la vò faurire
Ca voglio co moglierema comprire.
Tu parle troppo, e si no caca sotta
Saglie chà suso, e vide che te faccio
(Respose Mase) ca co meza botta
Da la capo à li piede te scafaccio,
Ciullo arraggiata mò la porta votta,
E volea proprio scire da ssò mpaccio,
La trova chiusa, e grida apre vaiasso
Se no sta porta co no cauce scasso.
Tanno Mase respose, abbotta puro
Brutto, anchione, pacchiano, marranchino
Schiatta, tozza la capo pe sso muro
Mbriacone fetente, otra de vino,
Và bene mio và corcate à lo scuro
Se n’haie auta cannela, e craie matino
Và vienetenne quanno face iuorno
Ca volimmo secarete no cuorno.
Ne miente pe ssà canna busciardone
(Respose Ciullo) songo hommo norato
E pozzo stare à tutto paragone,
Che tu non nce pueie stare, sbregognato,
Scinne pocca me faie lo smargiassone
A la fenesta, scinne ccà frustato,
Aggio paura ca nce nnevenaie
Ca Mase a sso scostato le nzorfaie.
E con gran zirria le tiraie na mazza
De scopa vecchia, che se le coglieva
Cierto restava nmiezo chella chiazza,
E na mummia ò schepece ne faceva,
A chesso Ciullo commo cosa pazza
Co na preta shiaccare lo voleva,
Quanno che Micco Passaro arrivaie,
E lo remmore subbeto acquetaie.
Che afferraie pe la mano Ciullo, e disse,
Core mio bello non me vide muorto,
Contame commo passano sse risse
Tu saie chi songo; e se me teme Puorto,
Vediste quanno vinne ca s’affisse,
Onn’uno, ma non saccio chi have tuorto,
Perzò lo vero propio vuoie contare
Ca te ’mpromecco mò de v’aggiustare.
Hora Ciullo le disse propio quante
Cose hà passate, pe fi a no puntillo
Onne mbruoglio de Cenza disse nnante
Appriesso pò chell’auto de Masillo,
Micco Passaro ch’era douellante
Ed have ncapo sempre quarche grillo
Disse, besogna pocca è chesso frate,
Che quatto cuorpe nzembra ve tirate.
Chesso aggio à caro (disse Ciullo) e saccio
Ca io lo zollo buono sso potrone,
E me lo zuco commo sanguinaccio,
Perche la spata sale ca vò ragione,
Mo mò te leveraggio da sso mpaccio
Senza che lieve, ne che vaie presone
(Decette Micco) vattenne à magnare
Ca da ccà à n’hora te vengo à pigliare.
Ntra chesto ieze à trovà Mase, Micco,
E le decette ca non hà raggione.
Ed eie cosa de verrillo è sbricco
Fare da suso de lo smargiassone,
S’io dinto de sta casa mo me nficco,
Che paura aggio manco de sanzone,
Non serveno da ccà le sbraviate
Besogna scire, e fare à cortellate.
Hora vattenne fora lo Pertuso,
Ca con tico se vò cortelleiare,
De gratia (isso respose) ma me scuso
Ca lo voglio de botta smafarare,
In chesto Cenza sbalanzaie lo fuso,
E mesese co Micco à sbraviare
Decenno si cardascio de Masillo,
E che s’acciga vuoie co no verrillo.
E tu (respose Micco) non devive
Fare le cose de chillo che squaglia
Accossi st’hommo tuo no lo mettive
A sto remmore, ed à chesta retaglia,
Ma zitto tutte duie sciarranno vive
Pocca io le porto de chesta battaglia
N’havè paura figlia (statte sauda)
Che lo Scrivano, ò Miedeco ne gauda.
Ca pò facimmo subeto la pace
Ma besogna guastare chella cosa,
Azzò quanno à corcare pò se vace
Pozza d’Amore cogliere la rosa,
Se (commo hai ditto) la cosa se face
(Essa respose) io guasto mo la dosa
Ed accossine tutte s’accordaro
E verzo lo Pertuso s’abiaro.
Masillo fù lo primmo che nce iette
Mentre che Micco và Ciullo à chiamare,
Lo quale perche giacco non havette
De carta straccia iezese à nforrare,
E quanno che chiammare se sentette,
Pigliaie na sferra, e po pe no schiantare
A la soa cara, e doce Carmosina
Se ne sfilai quano era à la cocina.
Che quanno s’adonaie ca co la spata
Ciullo era sciuto tutta se sciccaie,
Ma mentre chiagne, e stace desperata
A lo Pertuso Mase Ciullo ashiaie,
E no miglio da rasso appe arrancata
La sferra, ed a lo vraccio arravogliaie
La cappa, e ’nchesto Ciullo da valente
Disse l’haie fatta propio nfammemente.
E mò cca te lo boglio mantenere,
E carcarete buono lo cappiello,
Mase respose non te trattenere
Miette mano, e scompimmo sto doiello;
Se no te mpizzo, ca non pozzo havere
Fremma, ca volle già lo cellevriello,
Ma disse Ciullo adaso, mazza franca
Ca sta spata è arroggiuta, e non s’arranca.
Po quanno mese mano se tiraro
Quatto cuorpe de chiatto, e duie scenniente:
Ma de manera che non se toccaro
Ca ne sarriano tutte duie pezziente,
Micco che pe ste cose era hommo raro
Fermate (disse) giuvene valiente
E ’nmiezo se ficcaie commo no Marte,
E co la spata subeto le sparte.
Dicenno ò figli mieie mo se pò fare
La pace, ca ve site sgoliate,
E nce lo nore vuostro, ca me pare
Ca site tutte duie brave, e forzate,
E se be pò quarcuno chiacchiarare
Decenno comme saude le mazzate,
A chisso dalle nfacce no permone,
E pò respunne siente cannarone.
S’à no sordato ncapo, ò forte, ò chiano
Dà co na mazza co lo fierro mponta
Lo capitanio, chi è chillo pacchiano,
Che dice ch’è bregogna, e ca l’affronta,
Perzò defengo co na picca nmano
Dinto no furno, ò co na mazza aghionta,
Ca non fù niente propio la mazzata
Pocca mponta la scopa bavea mpizzata.
Uh, chi dirria quanto se chiacchieraie
Ncoppa sto fatto, puro s’accordaro
Po Micco la parola ne pigliaie,
E verzo lo cerriglio s’abbiaro
Da pò che l’uno, e l’auto se vasaie,
Llà foro de Giansarvo tavernaro
Servute propio commo tre segnure,
E scompio la taverna sti remmure.
Po comme appero buono mazzecato
Trippa, sambrusche, rosole, ed arrusto,
E mangiaguerra, e lagrema shiosciato,
E de li suone hauto no gran gusto;
Ciullo de la fattura allecordato,
Mase frate (decette) sarria iusto,
Che facisse guastare la fattura
Che Carmosina n’haggia chiù cottura.
Micco decette, Zitto poveriello
Con chi te pienze tu d’havere à fare
Havimmo tutto lo catenacciello
Nnanze che tu nce havisse da penzare,
E puoie rompere cierto lo castiello
Perzò lo veveraggio me puoie fare,
De gratia (Ciullo disse) e pe allegrezza
Le da sei rana dinto de na pezza.
E pò decenno schiavo, e servetore
Ve songo à tutte, se pigliaie la via,
E perche porta à la mogliere ammore
E levare le vò la cardacia,
Corze è tutto azzoppato de sodore
Ionze à la casa, e disse gioia mia,
E scomputo ogne triuolo, e despietto
Dirraggio commo pò dinto lo lietto.
E co na granne festa s’abbracciaro,
Pigliannose (isce bello quanto spasso)
Po co no granne gusto se corcaro,
Ma fecero lo suonno stare arrasso,
Perche la notte à staglio fatecaro,
Che se sentio doie miglia lo fracasso,
E Carmosina stea tanto de vena,
Che chella primma notte scette prena.
Scompetura.
