'O Munasterio
S. di Giacomo
S. DI GIACOMO
'O Munasterio
(SECONDA EDIZIONE)
NAPOLI
MDCCCXCI
__________________________________________________
Tip. Edit. F. Bideri, Costantinopoli 89 - Napoli
a Matteo Schilizzi
Gesù, Giuseppe, Sant'Anna e Maria, v'ar-
raccumanno chest'anema mia!
- Mez’ora dopp'’avummaria
Jettaie stu core mio mmies’a la strata
e ’n’copp’a na muntagna mme ne iette,
e, pe na passïona sfurtunata,
moneco ’e San Francisco mme facette.
–Tuppe, tuppe!
–Chi è?
–Ccà ce stesse uno
ca l'è caduto 'o core mmiez’’a via?
–Bella figlio’, ccà nun ce sta nisciuno,
va, iatevenne cu Giesù e Maria....
Se ne iette cantanno: Ammore, ammore
cchiù nun te vo' zi moneco vicino!..
E p’a muntagna se purtaie stu core,
arravugliato dint’ ’o mantesino...
Angelus Domini nunciavit Mariæ....
Vintiquatt'ore
–Patre priore, dateme 'o permesso,
scengo a fa legna pe sta muntagnella....
–Figlio, a chest'ora?
–Patre, io torno ampresso,
mme sento 'o friddo 'n'cuollo int'a sta cella!
–'O purtinaro è ghiuto a repusà,
ma nun fa niente, figlio, t'aspett'io....
–Patre priò, mes'ora e stonco ccà....
–Va, figlio, va fa legna, a nomm''e Dio.
No, nun so' legne ca vaco truvanno,
fredda nun è sta cammarella mia,
l'aria mme manca, l'aria vaco ascianno
Io voglio risciatà st'aria d''a sera
ca passa e mmurmulea tanta parole,
chiacchiarianno de la Primmavera;
sciure voglio ì cuglienno pe stu monno
e, stiso 'n'terra, tenè mente 'n'coppa
sentenneme na fronna cadé 'n'fronte
Penziere mieie, diciteme, addo' iate?
Mme pare de sta dinto a nu deserto...
Fronne, sciure, parlateme, parlate!...
Figlio, e addò stanno 'e llegne?
Pecchè nun n'aie purtate?
–Patre,.... mme perdunate?...
–A nomm''e Dio, pecchè?
Embè, patre, sentite....
io nun me so' fidato,
stu cuorpo addelurato
nun po' cchiù fatica....
Che so' sti rose?
–Io... l'aggio...
còvete... – P''a Madonna?
–Patre.... – P''o mese 'e maggio?
Va, portancelle.... va.....
Primmo d''o refettorio
È arrivato nu moneco nuviello
e s'ha fatto chiammà fra Libberato,
s'ha fatto benedicere 'o mantiello
e subbeto int''a cella s'è mpessato.
'A cella soia fa nummero trentuno,
'a mia fa trentadoie, stamme vicino;
ma nun se fa vedè quase a nisciuno,
sulamente ogge è sciso a matutino.
A matutino 'n'faccia l'aggio visto,
tene na faccia ca te fa piatà,
na barbetella comme a Giesù Cristo,
e nu felillo 'e voce pe canta.
E, pe ntramente ca steva cantanno,
a l'uffiggio na pagena ha vutata,
e l'ha nchiuso – l'ha nchiuso suspiranno
e na lacrema dinto nce ha nserrata...
’O purtinaro è n’ommo attempatiello
ca monaco a trent’anne se facette,
sempe ca passo, ’a quanno mme vedette,
–Figlio, –mme dice– santo e vicchiariello!
Io dico: – Giesù Cristo sia lodato!
e chillo mme risponne: – Ogge e a tutt’ore!
E da che nasce ’o sole anfì a che more,
sott'’a porta, a penzà, resta assettato.
A che penza? Luntano, a poco a poco,
’o sole scenne arreto a li muntagne,
’n’cielo se spanne nu lenzulo ’e fuoco,
e nu cucù, mmiezo a li fronne, chiagne....
Quatt'ore 'e notte.
Sott''o Castiello 'e ll'Uovo
pescano a purpetielle,
e lampe 'e fuoco vivo,
a poppa 'e paranzielle,
fanno li marenare
pe guardà 'n'funno 'o mare...
Ma 'o mare traditore
nun se fa scanaglià,
ca nun esiste luce
pe sti prufunnità;
e chisto munastero
mme pare 'o mare overo!...
Ca si me voto attuorno
mme veco mmiez'a gente
ca fuie, ca s'annasconne,
ca nun mme dice niente;
e penzo: Ah, sfurtunato!
Addò sì capitato!....
Serata 'e luna.
Santa Lucia, luntana e benedetta,
è nu martirio si mme viene a mente!
quanta suspire dint'a na varchetta,
quanta guardate senza dirce niente!
Frutte 'e mare adduruse, evera 'e mare,
mare, gulio d''a luna ca spuntava,
luna, lanterna de li marenare,
ca dint''o specchio 'e l'acqua se mmirava!
Penzate a me! Nu marenaro er'io,
meglio si a mmare me ieva a ghiettare!
T''o pozze perdunà sultanto Dio
stu desiderio che tengo d''o mare!
E ogne tanto nchiudo l'uocchie,
nnanze a st'uocchie passa 'o mare,
e de sentere mme pare,
quanno canta n'auciello,
na canzona 'e marenare
ncopp'a n'arbero 'e vasciello....
Fra Libberato è n'ommo nchiuso assaie
d'annascoste li ppene se mantene,
meza parola nun 'a dice maie,
va trova dint''o core che ce tene!...
Chello ca tene 'e bello songo l'uocchie
atturniate da na macchia scura...
ma n'ha da tenè chiaie 'n'facc''e denocchie,
se n'ha da fa martirie a carna annura!...
Fratiè, preia a Dio tutta stanotta
-Tutto more, tutto passa,
sulamente Dio nun more!
Beneditto!
Beneditto!
Ogge e sempe e a tutte l'ore!
-Ma murenno ognuno lassa
ncopp''o munno, a piezze 'o core!...
-Statte zitto!
Beneditto!
Ogge e sempe e a tutte l'ore!
Aizanno l'uocchie 'n'cielo,
acalanno l'uocchie 'n'terra,
addò è pace o addò sta guerra.
Dio se trova, Dio ce stà.
E li braccia aperte stenne
pur' a 'o cchiù gran peccatore,
carità ca nun s'arrenne,
benedetta a tutte l'ore!....
. . . . . . . . .
Si Dio nun ce sta? Si Dio nun fosse
ma nu nomme e nient'ato?
Si tanta e tanta vote inutilmente
L'avesse annummenato?
Si l'avesse priato
Pe nun ne caccià niente?
Povera mamma mia ca ce credeva
che a Dio, cantanno, m'arraccummanava
da quanno int'a na cònnela io durmeva,
senza sapè che sciorta m'aspettava!
Vicchiarè, vicchiaré, si pe nu poco
n'ata vota arapisse
st'uocchie nzerrate eternamente, e 'n'faccia
tu me tenisse mente,
quanto te pentarrisse
'e quanno mme dicive: Figlio mio,
figlio, nun t'abbelì, lasse fa Dio!
priava stu Dio sera e matina
pecchè patemo mio nun fosse muorto,
io priava stu Dio pecchè vicina,
sempe vicina a me, dint'a la casa
addò male patenno mme facette,
mammema bella mia fosse rummasa!
E patemo murette
senza n'aiuto, e a mammema nchiudette
l'uocchie, desideruse
d''o figlio suio luntano,
nun già sta mano mia ma n'ata mano.
De li lacreme meie, mmiezo a stu core,
s'arraccugliette comm'a nu pantano,
e dint'a st'acqua scura,
tutta cumposta 'e spaseme e paura,
appena n'ata lacrema cadeva
tutte chell'ati lacreme smuveva.
Spuntaie na vota 'o sole. A poco a poco
s'allargaie, se spannette,
mpietto n'ato calore,
quase na mpressione 'e ragge 'e fuoco,
n'anema nova nova mme sentette...
Si te mannava Dio, comme diciste
e comm'io te credette
tu, ca tutto na vota,
pure tu, scumpariste,
va, ca te maledico!
E maleditto sia
chillu iuorno ca t'aggio canusciuta
e ca mme t'ha nchiuvata
dint'a stu core e dint'a stu penziero...
chillo destino ca me fa campà!
No, ca nun è overo
ca pe nuie ce sta Dio!... Dio nun ce sta!
...........
...Aizanno l'uocchie 'n'cielo,
acalanno l'uocchie 'n'terra,
addò è pace o addò sta guerra
Dio se trova, Dio ce stà!
E li braccia aperte stenne
pur'a 'o cchiù gran peccatore,
carità ca nun s'arrenne,
benedetta ogge e a tutt'ore!
Mo' ch'è passata
n'ata jurnata
d''a vita nosta disgrazziata,
sia ringrazziato
Giesù Signore,
specchio de sole,
luce d'ammore!
Sia beneditto!
Sia beneditto!
Ogge e sempe e a tutte l'ore!
È passata n'at'ora d''a vita nosta!
Fratiè, ringrazziammene a Dio!
Mea culpa! mea culpa
Scenne 'a cielo na voce
dint'a st'anema mia:
-Penza ch'è muorto 'n'croce!
E beneditto sia
Giesù, Giesù Signore!...
no... no... nun me dannà!...
Guarda a stu peccatore,
c''a faccia 'n'terra sta!...
............
Mo mme sento cchiù forte,
mo mme sento cagnato,
e si vene la morte
mme trova appriparato...
Fratiè, l'acqua p''o refettorio!
Mmiezo 'o curtile na cesterna sta,
ognuno 'o cato suio se va a tirà,
ma st'acqua sape 'e sale. Comme va?
Fosse acqua santa pure chesta ccà?
Na chitarra s'io tenesse,
cu sta luna ca ce sta,
a sunà mo mme mettesse,
e accussì vurria cantà:
"La luna nova ncopp'a lu mare
stenne na fascia d'argiento fino,
dint'a la varca lu marenare
quase s'addorme c''a rezza nsino
nun durmì, scètete, oie marenà.
votta sta rezza, penza a vucà!...
Dorme e suspira stu marenare,
se sta sunnanno la nnammurata,
zitto e .......
Tuppe, tuppe!
-Chi è?
-Fratiè, song'io...
Fratiè che buo'?
-Fratiè, ccà nun se canta,
Aggiu pacienzia, chesta è casa santa,
Ccà nun se canta, ccà se preia a Dio.
Chiove..... Tutto na vota
l'aria s'è fatta scura....
'O tiempo se revota.....
Che lampo!.... Che paura!....
Mezanotte.
Fernuto è l'uoglio e lu lume mo more
comme a chi tirà nnanze nun po' cchiù....
cchiù se fa miccio cchiù mme sbatte 'o core,
ah, Giesù Cristo, damme forza tu!
Stonco tremmanno comm'a nu guaglione,
'o sanco dint''e vene s'è gelato.....
curaggio!... chest'è tutta apprenzione..
va... facimmece 'a croce... ah!... s'è stutato!
Avummaria!... Chiagnenno, addenucchiato
pp'a li pprete de sta cella mia,
ca mme sento sulo e abbandunato,
mme t'arraccumanno... Avummaria!....
Si sponta dint'a st'uocchie appassiunate
na lacrema 'e piatà pe tanta gente,
si tiene mente a tanta sfurtunate,
Addelurata mia, tieneme mente!
E o muovete a piatà, mamma d'ammore,
vedenno 'a vita mia nera accussì,
o ca si no tu spezzeme stu core,
Madonna bella mia, famme murì!....
Chiove ancora!...
Stanotte a l'una e meza,
sentenno nu lamiento,
io mme songo scetato....
nun mme pareva 'o viento...
No!... Chi s'allamentava
era fra Libberato...
E aggio ntiso, tremmanno,
c''a recchia 'a mascatura,
quatto o cinche parole...
Ah, Giesù!... Che paura!
c'allibbrezza!... Sapite
chist'ommo disperato
c'ha fatto?... Ha acciso 'o frato!...
'A campana!.. Voce 'e Dio.
Mbon! Mbon!...
-Fratiè, ch'è stato?
-Fratiello, 'a cella nzerra,
fratiello Libberato
nun è cchiù de sta terra.
C''o crucefisso a fianco
l'hanno truvato stiso
mmiez'a na macchia 'e sanco....
e mo sta m'paraviso.
-M'paraviso!...
-Fratiello,
io saccio che buo' dì,
si avette 'o puveriello
'o tiempo 'e se pentì....
Lassa fa Dio ca tene
misericordia assaie,
ca ne patette pene
e pure perdunaie!
Ca si fra Libberato
na vota sulamente
se nc'è raccummannato,
si l'ha priato overo,
c''o core e c''o penziero,
è stato perdunato...
Mbon! Mbon!....
Va, nzerra 'a cella,
nun rummanè a penzà,
'a vita è chesta ccà...
Mbon! Mbon!...
Jammo 'a cappella....
'O funnarale
Abbascio 'a chiesia 'e muonece so' scise
cu na cannela e cu nu libbro mmano,
e attuorno 'a castellana se so' mmise,
quattuordece vicine e seie luntano.
A mano manca 'e l'altare maggiore,
ncopp''a na seggia 'e velluto granate.
murmuleia letanie pur'' priore,
c''o libbro mmano e nu servente allato.
E se moveno e saglieno d''e ccere
sierpe 'e fummo pe l'aria pesante,
e accumpagneno 'n' cielo sti prigghiere
a san Francisco e a tutte l'ati Sante...
E d''e feneste pe li betriate
trase 'o sole e p''a chiesia se spanne,
e vasa 'e scaravattule ndurate,
e se stenne pe terra e ncopp''e scanne...
Luceno 'e frasche, luceno 'e lampiere,
ncopp'a l'altare 'o calice s'appiccia,
e 'a luce rossa de li canneliere
mmiezo 'a luce d''o sole se fa miccia...
Fora 'a chiesia na chiorma d'aucielle
ogne tantillo passa allegramente,
e de na cumpagnia de passarielle
'e strille de priezze 'a chiesia sente...
Doppo fatta 'a funziona
nu pezzullo 'e carta scritto
'o priore ha dispenzato,
e nce ha ditto:
Chesta è 'a prighiera pe fra Libberato.
-In nomine patris et Filii et Spiritui Sancti, amen.
Eterno patre, a st'ommo addeventato
cennera n'ata vota,
a stu verme d''a terra
ca da li stesse vierme
sta p'essere mangiato,
mo c''a morte le nzerra
l'uocchie pe sempe, dint' a lu tavuto
dàlle pace pe sempe,
si tu saie ca chill'uocchie hanno chiagnuto.
Ca si, pe farle perdunà, sta vita
nosta mo ce vulesse,
o ca si scritto stesse
ca quaccheduno 'e nuie
pene amare patesse,
e tu, tutte sti pene
tu fancelle patì,
e tu fance murì!...
Ca tutto chello ca tu faie sta bene!"
Amen!
Tre gloriapatre e n'avummaria,
secondo 'a ntenzione vosta.
Comm'uno ca patesce 'e sbenimente
p''o mmale 'e luna e l'esce 'a scumma rossa
d''a vocca e stregne forte forte 'e diente
e nzerra 'e ddete e nun fa cchiù na mossa,
accussì vedette io fra Libberato
stiso 'n'terra - e, accussì, stu puveriello
paricchie notte mme l'aggio sunnato,
comm'uno acciso a na botta 'e curtiello...
Dopp''offiggio, Vintidoie ore.
Si nu penziero dint''o core vuosto
vuie tenite annascuosto,
e si, tutto na vota,
l'anema vosta sbatte e se revota
ca vurria caccià fora
chello ca ve sentite,
site nu nfamo si l'annascunnite.
Sentite a me: nun c'è cchiù bella cosa
d''a verità. Quanno un è sfurtunato
meglio è ca parla e nun se mette scuorno.
pecchè doppo parlato,
pecchè doppo sfucato,
si pe nu poco isso se vota attuorno
e a l'ati sfurtunate tene mente,
trove 'e stesse dulore,
trove 'e stesse penziere,
mmiez'a tant'ata gente...
E, accussì, na buscia,
si dicesse c'a te nun penzo cchiù,
io certo diciarria;
o si dì nun vulesse
ca pe te sulamente
io sarraggio dannato eternamente!
Pecchè prianno a Dio
nun 'o tengo presente,
e tu, tu sì ca nun m''o faie vedè!...
Pecché sta vocca mia
si dice: Avummaria...
nun 'a dice 'a Madonna - 'a dice a te'.
Ah, si tenesse a mammema
io mo nu' starria ccà!
Ca sulamente mammema
mme putarria sanà!
Chi cchiù d''a mamma tiennero
'o core 'm'pietto tene?
Qua lacreme so' lacreme
si nun so' chelli llà?
Oi ma', chiammeme, scetete!
Si ancora mme vuò bene
d''o campusanto pàrtete
e vieneme a piglià!...
Gente, sentite sti parole meie!
Vuie c'ancora tenite
'a mamma vosta, si nun 'a stimate,
pe vulè bene a n'ata
ca cchiù bene ve vo' vuie ve credite,
gente, o nfama o ngannata,
nun 'e mettite a paragone maie,
ca l'ammore d''a mamma è gruosso assaie!
Na vota ce steva uno
ca pe la nnammurata
tutta 'a furtuna soia dopp'asseccata,
propeto nun sapeva cchiù che fa
p''a putè cuntentà.
-Damme -essa lle diceva-
oro, anielle, brillante!
oro, anielle, brillante isso lle deva...
-Puorte! -e chillo purtava,
E si diceva: arruobbe -isso arrubbava,
E si diceva: accide! -isso accedeva!
-Che buò cchiù? Si' cuntenta?
C'ato t'aggio da dà?
-No, cuntenta nun songo,
nun m'avasta -E tu parla,
dimme, c'ato aggia fa?-
-Ma 'o faie? Giura! -T''o giuro!-
-E si no st'uocchie mieie,
tu cchiù nun vedarraie,
si chello ca voglio io nun me darraie!
Té! Chist'è nu curtiello,
addò mammeta va,
scippele 'o core e portammillo ccà!
E chillo nfamo iette,
e stu curaggio avette!...
Ma c''o stesso curtiello,
(c''a mano scellarata le tremmaie)
sceppanno 'o core 'a mamma,
nu dito se tagliaie......
E sapite sta mamma,
gente, che lle dicette?
Dicette:-Figlio, te si' fatto male?-
E, guardannele 'o dito,
suspiranno, murette.....
Quanno moro io vogli' esse occumpagnato
menanno sciure ncopp''o cuorpo mio,
e a nu pizzo stramane sutterrato,
addò mme vede sulamente Dio.
Sotto a n'arbero a l'ombra e a lu cupierto
accunciateme st'osse addelurate,
e ncopp''o cuorpo mio sbattuto e spierto
menatece nu sciore si passate....
Ma 'n'fino a tanto ca stu pede 'e noce
farrà li fronne ncopp'a sta muntagna,
vuie sentarrate chest'affritta voce
ch'esce da sott'a l'arbero e se lagna.....
Nun arreposo, no!... Vuie ca passate,
ienno cercanno attuorno 'a carità,
fratielle mieie, nun ve maravigliate,
ammore dura pe n'aternità!....
Cuntrora
A nervatura mia cchiù nun m'aiuta,
me se chieieno 'e gamme ogne mumento,
poco ce veco cchiù, poco ce sento,
vi c'ata malatia ca m'è venuta!....
Mme sento int''e denocchie e dint''e mmane
na debulezza curiosa assaie,
e, da che suonno io nun teneva maie,
mo' durmesse 'e ghiurnate sane sane....
-Giesù sia lodato!
-Ogge e sempe!
Dint''o curreturo.
-Comme sta fra Sarvatore?
-Accussì, patre prio'?...
-Arreposa?
-Sissignore,
s'è addurmuto propio mo.
-Ma che tene? Che se sente?
-Patre prio', che v'aggia dì?
Tene tutto e tene niente,
po' sta buono e po' murì....
Sputa sanco.....
-Uh, mamma mia!
Figlio mio, tu che mme dice?
Va, sperammo, e accussì sia,
c''o Signore 'o benedice!...
-Accussì sperammo a Dio!
Ma.... ve dico 'a verità....
-Va dicenno, figlio mio....
-Chillo sta cchiù a llà c'a ccà!...
È chesta 'a morte?
una doce, ca staie de rimpetto
a guardà ca te stonco a guardà,
luna ianca, ca dint'a stu lietto,
chiano chiano mme viene a truvà,
si d''a morte lu suonno cuieto
sarrà chisto ca sto pe durmì,
da stu suonno si cchiù nun mme sceto,
statte, luna, a vederme murì....
Marenaro so' stato a lu munno
ma nu scuoglio la varca rumpette,
quant'è brutto quann'uno va 'n'funno
senza manco na stella vedé!...
L'acqua saglie, te stregne, t'affoca,
tu nun può manco cchiù risciatà...
Luna, lù!... Marenà!... Voca! voca!
Miette... vela... vucammo!... vucà!...
Tu chi sì?... Tu che buò?... Sì Carmela?...
E... che buò?... nun te saccio... va llà!...
voglio 'o mare!... oie cumpà... miette vela...
sponte 'a luna... oie cumpare!... oie cumpà!...
Madonna mia... mamma mia.........
- -Amen, patre prio'!
Albante iuorno.
-Fratiè, scavate 'o fuosso int''o ciardino,
fra Sarvatore l'atterammo llà;
na rosa pastenatece vicino,
e maie nun ve scurdate 'e ll'adacquà...
Ohè, l'ammore è bello! Ohè! ohè!...
Canzona antica
Na dummeneca 'e maggio
arrivaieno stracque a 'o munastero
nu giovene e na giovene;
ca, facenno viaggio
e nun avenno addò s'arrepusà,
se fermaieno llà.
Doppo mangiato pane e na frettata,
ca le fece purtà patre priore,
sta figliola dicette
ca s'era assaie seccata,
e se ne vuleva ì,
ca si pe doie tre ore
avess' avuto rummanè llà dinte
era cosa 'e morì!
-Facite buon viaggio -
rispunnette 'o priore -e, si passate
p''o ciardiniello nuosto,
'e sciure a nomm''e Dio nun 'e tuccate,
e spicialmente chelli rose 'e maggio...
Sotto a sti rose dorme 'n'santa pace
nu servo 'e Dio. Si vuie tuccate 'e sciure
è Dio ca se dispiace!
Dicite a nu guaglione:
-Piccerì, nun fa chesto!
Piccerì, nun ghì llà!
E chillo, mpertinente e dispettuso,
niente, chello vo' fa!
niente, nun se vo' sta!
Propio accusì sta giovene facette
pasanno p''o ciardino,
ncopp'a na fossa, a poco cummigliata,
na bella rosa gialla era schiuppata,
e chella, pe dispietto,
cugliette 'a rosa e s''a mettette 'm'pietto...
Tutt'a notte nu lamiento
p''o ciardino se sentette,
e nu povero auciello
appaura se mettette;
pecchè, nziemm''e figlie suoie,
iusto ncopp''o pede 'e noce
isso steva, e da llà sotto
se senteva chella voce:
"Scellerata! Pure muorto
tu mme viene a ncuità!
Pure 'e sciure 'a copp''a fossa
a stu muorto vuo' sceppà?..."
L'avuciello, appaurato,
mamma e figlie se pigliaie,
e da l'arbero de noce
a n'ato arbero 'e purtaie......
. . . . . . . . . . . .