'A storia nova
’A STORIA NOVA
FERDINANDO RUSSO
'A STORIA NOVA
POEMETTO IN OTTAVA RIMA
ROMA
Casa Editrice « Modernità »
1913
Tutti i diritti riservati a norma delle vigenti leggi.
L’antico Cantastorie napoletano, che fino ad alcuni anni or sono ha cantato sul Molo di Napoli le gesta dei Paladini della Tavola Rotonda, se ricantasse, glorificherebbe le gesta dei nostri soldati in Tripolitania e in Cirenaica. Ed io tento di farne rivivere ora la figura, rinnovellata dal sentimento patriottico, che — nella incolta mente del vecchio popolano — vede lo spirito di Rinaldo di Montalbano guidare alla vittoria i soldati d’Italia, pei quali si apre davvero una « Storia nova ».
’O CANTASTORIE A TRIPOLE
I.
E dicette Linardo: — Anema nera!
Mo’ te faccio fa janca p’ ’a paura!
Addenòcchiate nnanza a sta bannera
primma ca l’aria nun se fa cchiù scura!
Viva l’Italia, vocca ’e cemmenera!
È tiempo ca sta pera s’ammatura!
E, cu na spata sfutarata mmano,
va contra ’e Turche, ’o primmo Cristiano
II.
Stevano 'e Turche tuttuquante armate
mmiezo 'o deserto pe nce portà guerra;
e menavano strille disperate
comme fa ’o cane quanno cchiù se mperra!
Ma Linardo l'ha sempe secutate
e l'ha fatte pe sempe vasà nterra;
e mo’ è turnato, cchiù putente e amico,
spìreto guappo ’e chillo tiempo antico!
III.
Abbascio ’o Turco! E Macometto a morte!
(affatturate allùccano 'e guarriere)
E ognuno corre curaggiuso e forte,
cu ’a gloria 'e tutt’Italia int’ ’o penziere.
Largo a sti palatine! Aprite ’e pporte!
Facitele passà! So’ ’e bersagliere!
E l'accumpagna, cu na spata mmano,
Linardo, il Cavalier di Montalbano!
IV.
Facìtele passà! Chiste so chille
ca fanno ’a guerra contra ’e carugnune!
Vui, mamme e sore, grosse e piccerille,
menate giglie e rose a sti guaglione!
Sguìgliano ’a sottaterra a mille a mille,
e vanno sempe nnanza, a battagliune!
Ah, benedette, pe stu ffuoco ’e core
ca ’e pporta ’ngloria e ca se chiamma Ammore!
V.
Ammore ’e patria, chesta terra bella
addò Linardo ha fatto ’e guapparie!
Addò ca Urlando, cu na mazzarella,
faceva stragge d’ ’e ssupirchiarie!
Ccà stanno ancora! Nun pensate ’a pella!
Stanno cu vui, pe mmiezo ’e ccumpagnie!
Core e curaggio! Sanetà e furtuna!
Sempe vittoria! E morte ’a Mezaluna!
VI.
E Linardo va nnanza! E l’accompagna
co ’a corazza lucente sott’ ’o sole.
S’ ’e pporta p’ ’o deserto e p’ ’a campagna,
e fanno fatte assai, poche parole!
Cade ’o ferito, more, e non se lagna!
È stato d’ ’o coraggio a ciento scole!
’Nzerra l’uocchie e arreposa, oi-beneditto!
L’Italia, ’a mamma, no surriso... e zitto!
VII.
Ched’ è sto frùscio ncielo e stu remmore?
Na màchina che vola!? Ah, tiempo bello!
Tu tuorne overo pe te fa cchiù annore,
e me risponne a suone ’e campaniello.
Stanno pe l’aria (m’ ’o diceva ’o core!)
’o Palatino Astolfo e l’avuciello!
Avevo ragion’ io! Gloria, nun triche!
Turnato è ’o tiempo d’ ’e guarriere antiche!
’E MARENARE
I.
GANO ’e Maganza, nfamo e traditore
nun ’o sape fa cchiù, nu tradimento!
Cerca, se ’nzìnua, ma le tremma ’o core
quanno vede marcià nu reggimento.
S’annasconne int’ ’e ccase, aspetta a ore,
se mena appriesso a na pattuglia, a stiento...
Ma niente cchiù nce po’! Sta pelle è tosta!
E sta terra africana era già nosta!
II.
Era già nosta 'a quanno Roma eterna
jeva e dettava legge a tutt’ ’o munno,
e guvernava, comme mo’ guverna,
sott’a na stella ca nun va mai nfunno!
Viva l’Italia, a Sciara-Sciatte e a Derna
e a tutt’ ’e site ('o ddico chiaro e tunno)
c’hanno visto pe l'aria e ncopp’all'onna
sti guarriere d’ ’a Tavula Rutonna!
III.
Diciteme: chi so’ chell'ombre nere
ca dint’ ’a notte filano p’ ’o mare?
Che pruggetto hanno fatto int’ ’o penziere!
Addò vonno arrivà, st’aneme rare?
Nate d’ ’a stessa razza d’ ’e guarriere,
(Coppola nterra!) songo 'e marenare!
Sott’a metraglia hanno furzato ’o passo!
Farriano guerra pure a Satanasso!
IV.
Embè, ched’è? Mille cannune pronte,
furtezze ’a coppa, mine ’a sotta, e tutto,
e comme va ca po’ ve jammo nfronte
e pe passà ve ntussecammo brutto?
Nun rispunnite? Ve tirate ’e pònte?
E Mametto che fa? Non ce ha distrutto?
Linardo allucca, mmiezo ’e Dardanelle:
"Io ve salute! Carugnune belle!"
V.
S’era tanto stampato e s’era ditto
ca nun era pussibile ’o passaggio;
ca manca na varchetta, dint’ ’o stritto
sarrìa trasuta senza avè dammaggio…
Embè, ched’è? Simme trasute e zitto?
E simme asciute cu ’o stesso curaggio?
Comme se chiamma, chesta guappa mossa?
Viva Linardo! E Orlando alla riscossa!
VI.
Si mo’ tornasse a nascere a Surriento
Torquato Tasso (oh terra affurtunata!)
nce scrivesse int’a n’ora, manco ’o viento,
n’auta Gierusalemma Libberata.
E cumpunesse ciento cante e ciento
pe salutà st’Esèrceto e st’Armata,
e no cchiù, pazzo e fràceto, muresse,
ma vasato ’a Riggine e Principesse.
VII.
Ah, beneditto, addò se trova, sia!
E sia pace a chell’anema scujeta,
mo’ ca pe chesta guerra cu ’a Turchia
ogne figlio ’e l’Italia è nu pueta!
Isso, cu ’e vierze, nce ha nzignato ’a via,
isso, cu ’o core, nce ha signato ’a meta,
e si avesse ’a cuntà cose chiù rare,
cuntasse ’a gloria ’e chisti marenare!
XIII.
Quanto so’ belle! Làssano ’e ffamiglie,
làssano ’e mamme, ’e ssore, ’e nnammurate;
nun songo cchiù nepute e manco figlie!
Tuttuquante vonn’essere mbarcate!
’O sole ’e sferza pe migliare ’e miglie?
’O viento ’e ttaglia ’a faccia? A chi ’o ccuntate
Una parola ’e ssiente dì’: — Vittoria!
Po’ vide scappà ’e Turche… É scritta ’a Storia!
’A CARAVANA
II.
Pigliatevillo! Non sarrà na rosa,
nun sarrà no carofano schiavone,
non sarrà na camèlia prezziosa,
ma sarrà sempre chino ’e spressione!
È comm’ ’a Musa mia: Musa scornosa
ca s’annasconne senza cante e suone,
ma sente ’npietto fuoco ’e vero ammore:
si è brutta ’e faccia tene bello ’o core….
III.
Accompagna ’e soldate, tale e quale
comm’ ’e scugnizze appriesso ’e reggimente,
nnanz’ ’a fanfarra, attuorno ’e capurale,
facenno capriole a ciente a ciente…
Lloro, pe ncopp’ 'o Campo e p’ ’e Casale,
io, nfino a mmiezo ’e Turche, ore e mumente,
e veco ’e frate miei ca fanno ’a guerra
e ’a Mezaluna scarpesata nterra!
IV.
E veco sempe ’o Palatino bello
co ’a Croce mmiezo ’o llustro d’'a corazza,
c’avota ’a spata, e fa no muleniello
p’ ammacca l'osse a chella brutta razza!
Guardate Ameglio!? Che sicilianiello!
L’ha misa a posto, a chella folla pazza!
Vedite a Fara, a Millo, a tutte ll’ate?
Songo tanta Linarde, sti suldate!
V.
Po’ veco… Ma che reco? È scesa ’a notte…
Nterra, cavalle muorte, uommene stise…
Luntano, stracquo, no remmore ’e bòtte…
Arabe e turche stravisate e accise…
Facce tagliate, gamme e cape rotte...
Po' squilla ’a tromba. All'erta! ’E Maganzise!
N'ata tromba risponne, ma luntana…
Passa, annascuosto ’e nui, na caravana…
VI.
Passa?! E mo’ vide si s’ ’a passa bona!
Ah! Figlie ’e cane!... Piglia ’a carabbina!
Me pare ancora ’e sentere ’a canzona
ca m’addurmeva, cu mammà vicina:
— All’arme! All’arme! La campana sona!
Li Turche so’ arrivate a la Marina!
Chi m’ ’oddiceva, ca sti nnonna-nonne
s’avveràvano overo, ’a fora ’e suonne?!
VII.
Chi m’ ’oddiceva a me, — quanno guaglione
disignavo cu ’o gesso ’e pupazzielle
e p’ ogne pizzo ’e strata, ogne puntone
mmiez’a na folla allegra ’e cumpagnielle
screvevo sott’ a uno: « Il Gran Milone »
e sott’ ’e Turche: « So’ ’e mmulignanelle »
ca, fatto gruosso, overo ’a vedarrìa,
sta guerra santa pe l’Italia mia?!
VIII.
E ghiammo nnanza! ’A caravana passa!
Porta fucile e robba a sti nemice!
Guagliù facimme 'a corsa a chi l’appassa!
E si morimmo, Dio nce benedice!
— Sotto, ragazzi! E vene ’o scassa-scassa
Signor tenente, è inutile c’ ’o dice!
Viva l’Italia! L’arrivammo certo!
E bajonetta in canna, p’ ’o deserto!
IX.
— Sotto, ragazzi! Sotto!... E nui currimmo!
Zòmpa, cavallo mio! Zòmpa, cavallo!
Zumpamm nzieme quanto cchiù putimmo!
E n’ata vota s’accummencia ’o ballo!
So’ strille e scuppettate, e nui redimmo!
A chesti ccose avimmo fatto ’o callo!
— Avanti! Avanti! P’ ’a vittoria bella!
Ma... So’ sparite ’a reto ’a muntagnella!
X.
Nun mporta! Curre ancora! Appassa, Appassa!
— Se so’ fermate e sparano!... Guardate!
— Fuoco! — Gesù! Sti palle vanno ’a rassa!
— Carugnò, nun sbaglia! Spara chell’ate!...
— Bravi, ragazzi! Fuoco!... In quella massa!...
Voi! Giù la testa, voi! Non v’arrischiate!...
— Signor tenente! E lei?... Perchè s’arrischia?...
— Zitto, testone!... É già passata!... Fischia...
XI.
Simmo arrivate! Stammo a piette a piette...
Ogne pistola, ogne scuppetta canta!
Chiòveno ’e ppalle, e pareno cunfiette!
Lloro songo treciento e nui cinquanta!
Ma ched’è?... So’ scappate, sti Mamette?!
Addò so’ ghiute?! - Dio! Madonna santa! -
Signor tenente! Cristo!... Attiento a vuie!...
...E cadono abbracciate tutt’ ’e duie...
. . . . . . . . . . . . . . .
XII.
E chiste songo l’uommene d’ ’a guerra,
e ’o Generale è frato d’ ’o cuscritto!
Chiste, so’ 'e figlie ’e sta fatata terra;
e senza c’ ’o ddich’io, ncielo sta scritto!
Da tutt’ ’e piette ’a tennerezza sferra,
ogne core ca pàlpeta l’ha ditto...
E tu, ca meglio nun ’o ssai cuntà,
povera Musa mia, c’ ’o ccunte a fa’?!...
’A MAMMA
I.
FIGLIO mio d’oro! Figlio mio d’ammore!
Fa chello che vuò tu... Che t’aggia dì?
Vuò partì?... Parte... Fatte sempe onore...
No, no... nun sto chiagnenno, Pascalì!...
Te benedico!... Va!... Tièneme ncore...
Scriverne sempe!... Te so’ mamma, sì,
ma è mamma pure ’a Patria! É mamma a tutte!
Me guarde ll’uocchie?... E no! Ca songo asciutte!
II.
Damme nu vase… Sì! Dammine n’ato!
Strigneme ’npietto forte forte… e va!
Tenevo sulo a te… ma sì suldato!…
’A Madonna te pozza accompagnà!
Puozze tornà tenente e decurato!
Vàseme ancora!… Mamma aspettarrà!…
Tutt’e mmattine,quanno sponta ’o sole,
Te manno nu saluto e doi parole…
III.
E tu pure! E tu pure, (’o saccio ’o saccio!)
penzarrai sempe a chesta vicchiarella!
Nnanz’a Sant’Anna mia nu vuto faccio:
ca tu farrai felice a mammarella!
Sì, figlio d’oro! T’aggia tenè mbraccio,
quanno rituorne cu ’a vittoria bella!
Voglio alluccà pe tutt’ ’o vicenato:
« Guardate ’o figlio mio, mò ch’è turnato! »
IV.
« Guardatelo! ’O vedite, ’o figlio mio?
« Tene ’a medaglia ’npietto! Ha cumbattuto!
« Mmiezo ’e desierte l’ha guardato Dio!
« L’ammore ’e mamma soia l’ha dato aiuto!
« Appriesso a isso, sempe, so’ stat’io!
« ’A notte, ’npietto a me, l'aggio addurmuto,
« cantànnole ’a luntano ’a canzuncella:
« E nonna-nonna... E nonna nunnarella!.. »
V.
« Tutt’ ’e llacreme meie ’ncielo so ghiute!
« Tutt’ ’e suspire miei l’hanno salvato!
« Attuorno a isso, ’e Turche so’ fuiute
« pecche l’ammore mio l’ha riguardato!
« Turmiente ’e mamma nun so’ mai perdute!
« E cu ’o ritorno, Dio m’ha cunzulato!
« Guardatelo! ’O vedite, quant’è bello?
« Vene d’ ’a guerra, chisto soldatiello! »
. . . . . . . . . . . . . . .
VI.
... È notte. Mmiezo ’e ppalme nere nere,
na luna rossa fa na macchia ’e sanco.
Sè combattuto pe diece ore, ajere,
e s’è vinciuto! Ma ’o suldato è stanco...
Sta ’nsentinella, a fora d’ ’e ttrincere,
e penza ’a mamma. Ah, nu capillo janco
d’ ’a vicchiarella, quanto ’o pagarrìa!
E canta: « Oi suonno caro ’e mamma mia! »
VII.
Tutto è silenzio attuorno, e dorme 'o viento
Dòrmeno ’e ffronne, e nun se sente n’a...
Ma chi striscia pe terra a tradimento?
Chi cerca, zitto zitto, ’e s’accusta?...
Ah, mamma santa! Scanze stu mumento!
Figlieto canta... penza a te... sta llà...
E nun vede, e nun sente e nun s’addona...
Dio beneditto!... Mannancella bona!...
VIII.
Ma nu strillo, nu strillo disperato
vene ’a lontano, e smove a sto guaglione!
È ’a mamma! E ’o chiamma, ca se l'ha sunnato
muorto, e menato dint’ a nu vallone!...
Se vota a tiempo... mmira... Ha già sparato...
Ha già scetato tutt’ 'o battaglione...
È salvo!... È salvo! Italia!... Viva ’o Re!
. . . . . . . . . . . . . . .
« E tu, mammella mia, duorme pe me!... »
’O DISERTORE
I.
SCIORE d’ ’a giuventù d’ ’a terra nosta!
Core d’acciaro! Vui stìveve ajere
sott’ a nu sole ca de luglio arrosta,
o senza manco a luna, juorne e sere,
faticanno ’ncampagna o ’nponta ’a costa,
piscature, massare, carrettiere,
quann’a tromba è sunata! ’A Patria chiamma.
Have abbesuogno ’e chisti figli ’e mamma.
II.
Lassa ’a fèscena ’nterra e lassa ’a sporta,
e lassa ’a zappa e ’a lenza, ’a rezza e ’o tino!
Lassa ’o pantano, ’o fuosso e l’acqua morta,
addò tu muore maceranno ’o llino!
Lassa ’a montagna e ’o mare; e p’ ’a cchiù corta
strata tu curre, e magnate ’o cammino!
E dice, primma ancora d’arrivà:
— Simme figlie ’e ll’Italia! Stammo ccà!
III.
E tu, ca jive spierto e disertore
p’ ’a nnammurata o pe na vecchia mamma,
tu tuorne arreto pe turnà all’annore,
sott’ ’a voce d’ ’a Patria ca te chiamma!
Da ’o core t’è passato ogne rancore,
’npietto t’abbrucia na smargiassa sciamma!
Vuò partì, vuò cumbattere, si’ forte!
E si p’ ’a Patria muore, è doce, ’a Morte!
IV.
Và, figlio mio! Va, frato mio carnale!
All’uocchie miei tu quanto si’ cchiù bello!
E tale si’, pecche capenno o’ mmale,
mo’ curre a reparà stu peccatiello!
Va frato mio! E prova quanto vale
’o core ’mpietto a nu paisaniello
ca da nu brutto suonno s’è scetato
e prega e smánia pe partì suldato!
V.
Vicino a te sta ’o princepe, ’o signore;
tèneno tuttuquante unu penziere!
So’ mille core, e formano unu core!
So’ cientumila! Erano mille ajere!
Sona ’a partenza... è lesto nu vapore...
— ’O popolo sta ccà, nnanz’ ’o Quartiere,
e aspetta, e chiamma, e strilla: « Ebbive! Ebbive! »
E ’a Storia, pronta, piglia ’a penna e scrive!
VI.
Tu stai scritto llá dinto! E chisto nomme
pure si more ’o cuorpo, è fatto eterno!
E sott’ a isso porta ’o qquanto e ’o comme
mannaste Turche e Arabe all’inferno!
Che carnevale ’e scuppettate e mbomme!
Che cannonate revacate ’npierno!
E vide c’addeventa, sta canaglia,
sott’ a chelli semmente d’ ’a metraglia!
VII.
E vide chella nave, ’a miez’ ’o mare
comm’accumpagna ’e mosse ’e chesta guerra!
Vide ’o cannone, quanno pònta e spare,
che caruòfene russe manne nterra!
Songo freselle ’e dùdece a cantàre!
E ’o Cumannante, cu ’o bunetto ’a sgherra,
se fa na resatella malandrina
e guarda, int’ ’o binocolo, ’a cullina...
VIII.
Tu che facive? ’A nnammurata toia
te poteva sapè desierto e vivo,
ma te penzava, dint’ ’a smania soia,
vile, senza na patria e fujetivo!
Mo’ sulamente, tu l’ ’e dato ’a gioia!
Mo’ te canosco overamente, e scrivo!
Perciò cchiù bello ’o core mio te sonna!
Stai nprimma fila! Pare na culonna!
IX.
E mo’, viene a guarda chill’artigliere!
Te sbagliàsseno mai na puntarìa!
Tèneno l’uocchio acuto d’ ’o spruviere!
Nun dànno tiempo ’e di: « Madonna mia! »
Ma che mbruoglio me vene int’ ’o penziere?!
Madonna, mocca ’e Turche d’ ’a Turchia?!
Vasate sempe nterra, àneme sfatte!
Madonna ’a Mala Pasca ca ve vatte!
X.
Ccè ve vattimmo nui cu 'a Pasca bona
e cu ’o nomme ’e l’Italia dint’ ’o pietto,
comme sempe, a sta razza marpiona
ca s’addenocchia nnanz’ ’a Macumetto!
« Ecco Linardo! » É 'a solita canzona!
E addò sta isso, non c’ 'e cchiù arricietto!
E ognuno ’e nui ca scenne mo’ ncampagna
« caccia na spata e taglia na montagna! »
.jpg)
’O TURCHICIELLO
I.
SPONTA nu sole 'e porpora. E’ matina.
'O mare, sott’ 'e ragge, è nu tesoro.
'A sveglia sona. Io penzo a Carulina:
uocchie 'e velluto e ricciulille d'oro!
« Pecchè non te potesse sta vicina? »
me dicette partenno. E me n’accoro…
Sulo pe causa ’e chisti chiappe ’e mpise,
l'aggio scritta doi vote, 'a quatto mise!
II.
’A penna? ’A carta? Chi t’ ’è ddà! Sceppammo!
Pe tramente nce pienze, nu signale!
Lassammo tutto llà… Nce alliniammo…
Ma che vo’, chesta razza d’animale?
Nu cumando e se parte! E nui marciammo…
Addò? Chi ’o ssape! Piglia zappe e pale,
’a pistola, ’a scuppetta, e jammo nnanza!
A macàro tenesse na speranza!
III.
Tenesse na speranza ’e ne nfilà
na quarantina, comme vuless’ i’,
uno int’ all’ ato, p’ 'e vedè abballà
nfi’ a quanno nun se stancano ’e suffrì!
A macàro ’e pputesse secutà
sulo p’ 'o sfizzio d’ 'e vvedè sparì!
Doppo, scrivesse a Carulina mia:
« Carulì, che nzalata, sta Turchia! »
IV.
Ajere è stato ’o juorno d’ ’o cannone!
Avimmo faticato anfino ’a sera!
Sparàimo sempre! Tutt’ ’o battaglione
se nc’era miso, ma de che manera!
Chesta me pare ’a guerra c' ’o Mammone
Sconta ogni tanto na scarrafunera!
T' 'e vvide nnanz’ allucchie ogne vutata
E’ ’o tradimento ’nponta ’a scuppettata!
V.
Càcciale ’a nu villaggio! E’ na parola!
Nce sta sempe quaccuno annascunnuto!
Nun vide mai spuntà na capa sola,
ma po’ nun stai sicuro nu minuto!
Sarrà o Demmònio, ca l'ha fatto ’a scola!
Pe ttramente te cride zitto e muto
vene nu fummo janco da luntano,
porta na palla… e còglie ’o Capitano!
VI.
Vide a nu muorto ’nterra, e nun è muorto!
Tu vaie p’ ’o sutterrà, chillo t’afferra!
Na faccia ’e ggravunaro, nuocchio stuorto,
e ’o vraccio niro che manea na sferra…
Pe ttramente te cride ’e trasì npuorto,
n’ata tempesta! ’O core te se nzerra!
E jammo nnanza! Ogge, dimane, ajere…
Vèneno n’ati cciente priggiuniere…
VII.
Femmene gialle, nere, pavunazze,
secche e stentate comm’ ’e ssarcenelle…
Na puzza ’ncuollo… cierti facce pazze…
Una mappata, stracce e medagliette…
Cane, guagliune, scumma ’e tutt’ ’e razze,
viecchie cu cierti bbarbe ’e guartatelle…
Arrestate ca so’, tornano vile!
Salùtano e cunzegnano ’o fucile…
VIII.
Uno fa segno ca se more ’e famma,
n’ato fa segno ca te vo’ vasà…
Sciù, pe la faccia vosta! Allonga ’a gamma!
Chisto Mametto a chi vo’ vavià?!
Tre guagliune s’afferrano a na mamma....
E chella vecchia? Ma che mosse fa?
Che vo’? Che dice, quann’aìza ’a mano?
Ah!… Sta dicenno: « Bono… taliano…»
IX.
Bono?… Pure si figlieto m’accrasta
e me tira na palla a tradimento?!
Nun ’mporta! Vuo’ magna? Chesto t’abbasta?
Gallette e carne… Io resto senza niente…
(Stanno diune!… ’O sango me se guasta…
Facimmole sfamà… Povera gente…)
Embè?!… Tutt’ ’a fermezza ’mè passata?!
Io ca vulevo farne na nzalata?!
X.
Chi è, che chiagne ’a reto a stu murillo?
Corro, e veco ’e tremmà nu turchiciello!
’O piglio mbraccio… É propio piccerillo…
Palpeta e strilla comm’ a n’avuciello!…
Neh, neh, guardate cca!… Quant’è bellillo!
A chi appartene, chisto lazzariello?
Me vòto attuorno, ma nisciuno ’o chiamma,
nisciuno ’o cerca… Avrà perduta ’a mamma…
XI.
— « Zitto! N’ave’ paura!… N’alluccà!
« Che vuo’ da me? Tanto ’mperruso si’?!
« M’ha afferrato nu dito!… E che vuo’ fa?
« Vuo’ fa tu pure ’a guerra, neh, Tetì?
« Mo’ vùtte cauce? Te ne vuo’ scappà?
« Zitto, bello 'e papà! Nun fa accussì!
« Ma guardàte che forza!… E chi nce po’?
« M’ ’o vuo’ lassà, stu dito?… Si, o no?! »
XII.
E corrono ’e cumpagne. — Uh, quant’è bello!
Addò steva? Addò steva… — Abbandunato…
— Uh, povero Tetillo! Uh, puveriello!…
— Mo’ resta senza mamma e senza pato…!
— E chi l’ha ditto? ’O faccio crestianiello!
Figlio ’e nisciuno? Figlio d’ ’o suldato!
Nun è cchiù solo, ’o povero guaglione,
pecchè ’o vo’ bene tutt’ ’o battaglione!
. . . . . . . . . . . . . . .
XIII.
E ’o juorno doppo, appena sponta ’o sole
pe Napole na lettera s’avvia:
« Mia cara amanda, in queste tre parole,
« benzì che tu non prendi gelosia,
« ti fo assapere che, come Dio vuole,
« ho avuto un figlio in mezzo alla Turchia;
« stava sotto un murillo abbandonato
« che mi ho sentuto il core mio squartato! »
XIV.
« Perciò, se mo’ nessuno lo domanda,
« è figlio a tuttoquanto il reggimento.
« Lo facciamo addormire sulla branda,
« e lui dà morsi a tutti ed è contento.
« Ieri facemmo una battaglia granda
« che sui giornali avrai lo svolgimento.
« Saluti e baci a tutti. Altro non dico.
« Tuo per la vita: Mazza Federico ».
’O CANNONE
I.
V’ ’o vulite piglià?… Pigliatevillo!
Nun ce vo’ proprio niente, ’a verità!
Accustateve ccà nu pucurillo!
Vedimmo si sit’uommene d’ ’o ffà!
Guardate comm’è liscio e tunnulillo!
Pare ammentato pe ce pazzià…
Revàca fuoco?… E a nui che ce ne mporta?!
Ccà, pazziammo, arresecammo ’a Morta!
II.
È lustro lustro comm'a nu brillante…
Nun parla, nun se move… E serio serio…
Ma quanno ha da servì… quant’è birbante!
'O scètano… e pe vui non c’è remmerio!
Addeventa cchiù gruosso ’e nu gigante!
Sputa palle d’acciaro… È nu streverio!
Manco San Giorgio ’o venge, a stu dragone!
Tene 'a voce ’e Tamagno! È nu cannone!
III.
Teh, teh, che vocca, beneditto Dio!
E comme ntona, cu na nota sola!
Aggiusta ’o tiro, e santanotte addio!
Nun perde tiempo a scegliere ’a parola
Te lanza na purpetta, amico mio,
ca sape addò te coglie, e fisca, e vola…
Guardate!… Arriva!… E ch’è? Ve ne fuite?
E ’o tiempo, chi v’ ’o dà? Jammo! Murite!
IV.
’E cumannante vuoste, ch’anno ditto?
(Cose che fanno ridere a selluzzo!)
Ca si n’afferrat’uno, già sta scritto
c'Allah v’ajuta e ve fa grazzie a muzzo?!
Via jatevenne! Allah se stesse zitto!
Nun v’accattate ’a luna dint’ ’o puzzo!
Chisto è sultanto suonno, e nun cumbina!
Nuie ’o chiamammo: tenta carmosina.
V.
C’avite fatto, quanno, mbriacate
da ciento fantasie dint’ ’o penziero,
tanto nnanza ve site arresecate
ca ve l’avite vista brutta overo?
Site state distrutte e massacrate
pecche ’o cannone ve sparava a zero!
E sempe c’arrivate a piette a piette
ve ricevimmo ’mponta ’e bbajunette!
VI.
Ah, che battaglia e che stermìnio è stato!
Ccà cumbattimmo e v’abbuffammo ’e guai!
’O cannone è pe nui comm’a nu frato!
Murimmo, sì, ma n’ ’o lassammo mai!
Nce l’avimmo vasato e po’ abbracciato,
ma po’… v’avimmo assecutate assai!
Perciò ve l’avvisammo a mille vocche!
Schiaffatevello buono dint’ ’e cchiocche!
VII.
Muorte, ferite, spierte p’ ’o deserto,
Scappate sempe, e chesta è ’a sorta vosta!
Jastemme e cannonate, unu cuncierto!
Ogne combattimento na batosta!
Attuorno a vui, nu fuculare apierto,
ma ncopp’a tutto, sta ’a bannera nosta,
verde 'e speranza, svulazzanno a ’o viento,
rossa ’e coraggio e janca ’e sentimento!
VIII.
Canta, canzona mia! Canta sta storia,
ca nisciuno te chiamma temeraria!
Spànnela a tutt’ ’o munno, chesta gloria!
Va p’ogne pizzo ’e terra sulitaria!
Canta sta guerra e canta sta vittoria!
Falla sentì p’ ’o cielo, ’o mare e l’aria
So’ fatte, ca tu cunte, e no parole!
Viva l’Italia!… Te saluta ’o Sole!
INDICE