Paggena:Viaggio di Parnaso 1666.djvu/22

'A Wikisource.
Chesta paggena è stata leggiuta du' vote e mo è fernuta.
22
CANTO

E che no iuorno stea co lo Boscano
Iocanno, e che le deze schiacco matto,
Chillo pe sdigno bello auza la mano,
Tuffe no scoppolone tunno, e chiatto,
Torna à ghiocare, e mentre have pe mano
(Se ferma) n’autro bello, e digno tratto
Le tene mente, e stace pauruso,
E mettece la mano a lo caruso.
Fù d’Apollo, e de l’autre che bedero
Tale lo riso ch’adesa creparo,
Ed’accossi redenno se ne iero,
E lo Gattomaimone assaie laudato;
N fine lo riesto de lo munno è zero,
Quanno non have lo Parnaso à paro,
Dove nò schitto l’hommo sape, e ntenne,
Ma n’Aseno perzì scorre, e comprenne.
Pò camminanno no poco cchiù nnante,
Vedenno Apollo se l’addenocchiaie
L’animale, che chiammano Alifante,
E fù chillo che Alcippe già figliaie,
Apollo pò pigliaie, ma cò li guante
No serpe, che li piede le vasaie,
Lo serpe, ch’à le guerre Marsiane
Figliaie na Vaiassella de Romane.
No Leparo pò venne, ch’à la guerra
De Serse havea figliato na Iommenta,
E pè la coda chillo serpe afferra,
E commattere nzieme fanno nfenta,
Ch’ogn’animale, che stace llà nterra,
Pe lo gusto d’Apollo suda, e stenta;
Pò na Ciaccona na Lopa abballaie,
E fù chella che Romolo allattaie.

Cchiù