Concetta
(c. s.)
Giesù! Mo stive accussì bello...
Raffaele
(sempre più acceso)
Mme vevo ’o vino, sì, sì, mme vevo ’o vino!... Pecché mme voglio pure scurdà ’e tanta cose! Io mme voglio scurdà ’e sta pezzentaria ca ce roseca juorno pe gghiuorno e mme fa fa tutte sti bbrutti ffigure ca vaco facenno, tutte sti llemmòsene ca vaco cercanno, tutte sti bbuscie c’accocchio pe fforza, pe nu muorzo ’e pane!... (S’esalta sempre più) Te’! Chisto é ’o capulavoro! (Afferra il copione e lo mostra) Aggio ditto ch’era bello, ch’era originale, ch’era nuovo! E nuovo è! Nuovo è! Un padre buono, un padre onesto, ca tene na figlia, una figlia!... E s’ ’a vede mancá! Soggetto moderno! trattato alla moderna!... E io mm’aggia avuto sentì leggere sti ppurcarie ’a nu cocò cu nu fiore m ’pietto, nu guaglione ’e vintitré vintiquatt’anne, c’ha fatto pure ’a scena madre, alla moderno, c’ ’o pate e ’a figlia faccia a faccia, ca se diceno ca tutto é naturale e ca tuttuquante ncopp’a sta schifosa terra simmo ’e carne! Tuttuquante! Fisiologia! Pate, figlie, mugliere!... Tuttuquante!... (A Silvia, che non si move dalla sua seggiola, e che lo guarda, spaventata) ’E’ capito? Mpàrete!...
