Chesta paggena è stata leggiuta du' vote e mo è fernuta.
99
UN ATTO
PULCINELLA
(dimenandosi tutto, grottescamente:)
Uh, scasato me, e che ssento!…
COLOMBINA
Si sapisse!… L’uommene non sanno fa’ manco cchiù ammore!… Addò stanno cchiù chilli ciance, chelli nzierie, chilli squase, chill’appicceche ’e ’na vota? Chi sape dicere cchiù, bello e azzeccuso, comm’’o ddicive tu: ”Te voglio bene!…„?
PULCINELLA
(mettendosi il feltro a sghimbescio:)
E nient’ato te sapeva dicere Pulicenella tuio? Siente che mm’esce ’a vocca, — siente che puvisia!…
(con accento declamatorio.)
”Stella Diana mia!„.
COLOMBINA
”Masculo bello!„.
PULCINELLA
”Ntrita rusecarella e perciacore!…„
COLOMBINA
”Carofano schiavone de ’sta chiocca!„
