Chesta paggena nun è stata leggiuta.
Ninuccio (sarcastico:) — E pe chesto te si' fatto monaco?
Fantasia. — Mme so' fatto remita, pe nicessità. (Rassegnatamente:) L'albero pecca e 'o rammaglio secca!... 'A vulevo bene. E chella mme lassaie, bello e buono, accussì. Po' turnaie, doppo nove mise, cu na criatura a pietto. E io mme ll'accugliette a braccia aperte. Ma na bella matina — ched'è? che nun è? — scumparette n'ata vota. (Con vivo rimpianto:) E nun è turnata cchiù!
Michele (intento, come ad una sottile indagine:) — E... si turnasse?
Fantasia. — Vulesse Giesucristo! A braccia aperte, n'ata vota! (Cupido, come rivolgendo la parola al suo amore ricuperato:) Ben turnata! Ben turnata! E chesta è 'a casa. E chisto è 'o lietto. E cca sta zi' monaco, tutto pe te!
Ninuccio. — Mo va 'nfantasia Fantasia!
Fantasia (con serenità sorridente:) — Io dico accussì: 'A vuluntà è libera e 'a passione nun è na catena. Ogge, cu mmico. Dimane, cu n'ato. Doppedimane, punto e da capo, cu mmico. E io so' cuntento. Mangio ogge e mangio doppedimane...
Ninuccio. — Ma dimane staie diuno.
Fantasia. — Mme rassegno. Si no, sto' diuno dimane e sempe. (E ride. Poi, a Ninuccio:) Fatte capace, patriò: 'a vunnella nun te porta maie 'o priatòrio: te dà l'inferno e 'o paraviso: mmità e mmità. Peggio pe te, si ricuse 'o paraviso pecchè 'o fuoco t'ha scuttato.
Michele (a Cenzeniello, sbuffando:) — Tu te spicce, o no?
Cenzeniello (indispettito, senza interrompere la sua occupazione:) — E mo! E mo! Sta canna è fràceta! Mannaggia!
Michele. — Chiamme a fràteto, e spicciàteve, ca è tarde.
