Ermelinda — Si. Là tene ’o zio che sta ricco.
Ciccillo — Appunto. E vede si Ile po’ dda’ quacche[1] impiego, p’ ’o fa’ sistema’.
Ermelinda — E si nun ce riesce? Io resto accussi? E che fine farraggio[2]?
Ciccillo — No! Vittorio nun è giovane ’e chesto. Torna, e farrà ’o duvere suio.
Ermelinda (Guarda il piroscafo. È come smarrita. Canta)
Chisto è ’o vapore,
ca purtarrà a Vittorio mio luntano.
Chisto è ’o vapore,
ca perdarraggio[3] ’e vista chianu chiane
Chisto è ’o vapore
ca jennesenno[4] pazza me rummane[5],
Spezza duie core,
sparte[6] ddoie vocche, sciugliarrà ddoie mane.
E ccà me restarrà[7]: ’n terra ’a banchina,
malata ’e pecundria[8],
senza tene’ cchiù n’anema vicina,
sola, comme a Maria.
L’ammore mio m’ha ditto: «Vaco llà
pe’ fa’ fortuna, e te pute’ spusa’».
Ma chi sa’, si jenne fore, nun se cagnarrà.
(Si abbandona sulla spalla di Ciccillo).
Spezza la musica
Gesummina (Ricompare) — Gué!
Il domestico (che stava seduto sulla passerella, ha un sobbalzo) — Puozze passa’ nu guaio!
Gesummina — Dà na voce a Mincuccio!
Il maestro di casa (Seccato) — Ah!
Gesummina (Si ritrae).
Il domestico — Va’, va’. Mo te scamazzo[9] comme a nu police!
Il facchino — Uh, l’ha fatto addiventa’ n’arca ’e Noè (E gli batte forte sulla spalla, in tono volgarmente scherzoso).
Il domestico — Gué! T’hé ’a sta’ cuieto! Io nun me fido! (E cerca di raddrizzarsi a fatica).
