Colantonio — E se nun me la dà?! (Indi al domestico) E addo’ me mette ’o machinista pe’ mme fa’ parti’ intestinamente?
Il domestico — Clandestinamente, di nascosto! Ha ditto ca te mette dint’ ’a caldaia.
Colantonio — E io po’ moro scaurato[1]?
Il domestico — E che vuo’? (Pausa) Va buo’: dico a ’o fuchista ca te menasse dinto ’e ggravune.
Colantonio (scallando) — No, famme mettere dinto ’o cesso!
Il domestico — E addo’ vuo’i’?
Colantonio — Te sputo ’n faccia a tte, tracchiu’[2]! Te sputo ’n faccia!
Il domestico (Ridacchia).
Gesummina (Indignata, a Colantonio) — E pecché ce l’hai data, la cinque lire?
Colantonio (con un grido) — Pe’ ll’uocchie, pe’ ll’uocchie de la Madonna! (E mostra gli occhi malati di tracoma; quindi corre dal maestro di casa chiedendogli assicurazione circa le sue difficoltà per la partenza).
Il maestro di casa (Lo rassicura).
Il domestico (A Pascarella) — Tu po’ m’hé ’a da’ ancora quindici lire p’ ’a butteglia ’e Vermutte!
Pascarella (Sbalordita) — Quindici lire?
Nicola — A lu paese sta due lire!
Il domestico — Ah! A lu paese? Ma chesto è p’ ’o disturbo ’e stommaco, e mantiene le viscere ubbidiente…
Peppenone — Mamma mia e che ’mbruglione che è chisto!
Lucrezia — Gente senza cuscienza!
Gesummina — Tra la lucanda e lu mangiare ce hanno levato li ppelle da cuollo[3]!
Sabatiello — E meno male, che avevamo fatto li bigliette.
Savariella — Si no ’n terra rummanévamo[4]!
Colantonio È inutile, compagni! Mettetevelo in testa! Simmo cafune? E ce fregano: gnà!
Musica
Il domestico — Beh! Zaino in ispalla.
Colantonio (al facchino) — Pascale nun è venuto ancora?
Il facchino — Mo vene… mo vene…
Colantonio — ’O frego io, a Pascale, mo che torno dall’America.
Gesummina (al domestico) — E Mencuccio?
Il domestico — Vene appriesso[5]. In avanti, marche.
Il facchino — Mo ’e cummanna ’e esercizie!
