Paggena:Pulicenella pulezza stivale.djvu/14

'A Wikisource.
Chesta paggena è stata leggiuta du' vote e mo è fernuta.
— 14 —

Cuo. Ma io, però, l’aggio ditto tu a chiella t’àia piglià, pecchè l’hè dato ’a parola e li ià mantenè.

Cat. E isso?

Cuo. E isso s’è capacitato, e ha ditto ch’è cuutento ’e stu matremmonio.

Ros. Hè visto, Catarì? e tu ampressa ampressa t’ire avveluta.

Cat. Ah! vuie m’avite data n’ata vota ’a vita.

Cuo. Essì, chiesto ce vuleva ca isso avarria travato quacche difficoltà... me l’avarria miso sotto, e l’avarria fatto ’a faccia cumm’a nu pallone...

Ros. (guardando v. d.) Uh! bene mio! sta venenno Pulicenella tutto sbattuto ’a chiesta parte...

Cat. Uh! overamente! vene muorto muorto.

Ros. Bene mio! e che sarrà?

Cat. Pulicenè, Pulicenè...

Pul. Bene mio, so’ muorto, so’ muorto... priesto, apparichiateme nu tavulo e mannateme atterrà.

Ros. Ma ch’è stato?

Cat. Parla, Pulicenè.

Cuo. Iammo, fa ampressa.

Pul. So’ muorto, so’ muorto.

Cuo. Ma vuò dì che t’è succieso;

Pul. Udite, udite che cosa mi succede! So’ ghiuto a d’ ’o pustiere pe’ pigliarme ’e denare... oh rimembranze funeste!..

Ros. (smaniosa) Ma ch’è stato?

Cat. Contace, Pulicenè.

Cuo. Ma ca tu t’arragge, che ne cacce?

Pul. Chill’acciso d’ ’o pustiere mmece ’e 21, cumm’a nu turzo ’e cavolifiore m’ha fatto...

Tutti Che cosa?

Pul. Nu 31, e ’o terno se ll’è ghiuto a ffà squartà.

Ros. Ah! ca io mo moro... (sviene)

Pul. Ah! ca io sono già sotterrato...

Cuo. Che disgrazia, cheste sì ca se chiammano disgrazie!... Ah! mannaggia... seh, e po’ che ne caccio?...

IV. Giovanniello, indi facchini con mobili, poi Anselmo

Gio. Catarì, io sto ccà... Neh, Pulicenè, ch’è succieso?