Paggena:Pulcinella - Dramma in un atto.djvu/12

'A Wikisource.
Vai alla navigazione Vai alla ricerca
Chesta paggena è stata leggiuta.
10
PULCINELLA

Rachele — E nuie ’a facimmo! Fiàt vuluntà tua!… (Continua ad agucchiare. Un silenzio).

Rosa — (Parla sempre a tono piuttosto basso di voce) ’O piccerillo sta meglio?

Rachele — Tene sempe a freva… S’è addubbechiato nu poco… Chella faccella ’e cera fa ’na pietà… (Smette di lavorare. Si alza. S’avvicina, in punta di piedi, al fanciullo. Gli è ora vicino. Lo contempla silenziosamente. Deterge dalla guancia una lacrima. Sospira. Ritorna avanti. Risiede. Riprende il lavoro)

Rosa — E nun ve mettite apprenzione… Alla fine se ne so’ viste miracule! E ccriature so’ comme ’e gatte… Teneno e sette spirite! Mo’ pareno ca morono e mo’ ’e vedite zumpà, alluccà, arrevutà nu curtile.. Jammo! Nun voglio vedè chella faccia appesa!…

Rachele — È ca io penzo a chillu povero Rafele!… Nun vuleva ascì…Ma cu vuie se pò parla…ccà si nun se fatica nun se magna…’O ppoco ’e bevandella… ’O ppoco ’e latte…chello ca nce vo p’’o piccerillo nce vo’!… Po’ nuie… (Fa una spallata) ’O panettiere nun ce vo dà niente cchiù…Accussì pure ’o casadduoglio.. L’ebbreca è triste! Pulecenella, na vota, ’o venevano a cercà… Mo ’ce stanno ’e cinematografe!… Ce stanno e canzunettiste!… ’E belli tiempe ’e San Carlino chi v’’e ddà cchiù? Na recita arremmediata ogge, una dimane… Diece juorne a spasso… Se passea pe’ dint ’a Gallaria… Po’ è venuta ’a malatia ’e Giacumino!… Pe furtuna, aiere se cumbinaieno sti cinche recite ca è ghiuto ogge a fa’ Rafele… Poche lire.. Diatelo vuie: puteva mancà?… ’O mpresario nun dicette ato: — Avisseve manca, mo?!…

Rosa — Avite raggione… E l’avite dato ’o latte a Giacumino?

Rachele — Aspetto ca se sceta… Lle dongo ’o ffrisco ca m’ha purtato ’o craparo… (Mostra il bicchiere, che è stato da lei adagiato sul lavandino) E me n’ha dato pure nu dito suvierchio… A verità, nun me pozzo lagnà!…