Paggena:Pulcinella - Dramma in un atto.djvu/13

'A Wikisource.
Vai alla navigazione Vai alla ricerca
Chesta paggena è stata leggiuta.
11
ATTO UNICO

Rosa — Che v’aggio ’a dicere, cummara mia… Quanno uno capita mmano ’e miedece, ha passato ’o guaio! Pure io cu maritemo! Sette mise… Uno crepà ’ncuorpo!… Mo’ sta meglio… Dimane passa ’e pericule… E chesta è n’ata ricetta… E pruvammo chest’ato…E se ne passaieno sette mise! Alla fine, io sfastidiaie… Licenziaie ’e miedeco e maritemo stette buono! Pure ’o latte da furmicula l’avesse accattato a chillu ricco ommo… si ’o miedeco l’avesse ditto… Ma chillo m’o faceva cadè ’ndebulezza… Latte sulo! Dieta! S’io nun faceva chella penzata… Aniello mo’ starria a Puceriale.. Ah! Io truvaie nu sicritista ca mme dette ciert’erbe, e ce ne faceva nu dicotto. (Dietro la vetriata, ora, passa Aniello, che tamburella sui vetri per invitare ad aprirgli. Ella si volge e gli fa cenno d’aspettare un momento). ’O metteva a’ serena a’ sera, e a matina ’o ppassava pe’ nu panno…e maritemo s’o veveva. Levate ’a miezo ’o latte! Maccarune cu ’e pummarole e carne! Facite pure vuie accussì pe’ Giacumino vuosto!

Rachele — Chillo ’o guaglione nun vo’ niente… Ha schifato tutto!…

Rosa — Se capisce! L’hanno addebulito ’o stommaco! Povera criatura… Datele a magnà, sentite a me!… (Si sente suonare con le nocche delle dita dietro l’uscio a vetri. Si volge. Vede Aniello che si è fermato ed ha così annunziata la sua venuta) È maritemo… ’A verità, nun pecchè m’appartiene, è accrianzato… Aniello ’o vo’ bene a Giacumino… (Ha fatto segno al marito di aspettare tranquillo, dietra l’uscio comune. Si è alzata per andargli ad aprire) Chesto mme diceva aiere: ’O piccerillo mme ne fa nu tuorto si nun ce vaco… Nce tene n’affezione!… Figurateve sti juorne comme è stato!… (Parlando ha fatto sempre le mosse di andare verso la comune per fare entrare il marito. Ma ha fatto un passo innanzi e due indietro. Aniello ha dato segni d’impazienza. Finalmente si decide e va ad aprire ad Aniello).

Aniello — E quanno?… (Entra).