Chesta paggena è stata leggiuta.
154
poemetti del cuore
Si tu sapisse ’o male ca m’ ’e fatto,
nun t’ abbastasse a chiagnere, nu mare!
Ma mo’ chill’ uocchie tuoi lucente e care
nun songo niente, niente cchiù, pe me!
E chisto core, abbandunato e tristo,
chino d’affanne e di ricuorde amare,
porta na croce comm’ a Giesù Cristo
e saglie nu Calvario, appriesso a te.
Saglie. ’A muntagna nun fernesce mai
pecchè mai fernarrà chisto delore!
Quanno veniste, s’ arapette ’o core
nnanza all’ ammore che lle dive tu...
Ma quanno me lassaste e te ne jiste
senza ’o cunzuolo manco ’e na parola,
st’ anema sperta, abbandunata e sola,
manco ’a speranza ’a sustenette cchiù!
