Chesta paggena è stata leggiuta.
116
poemetti del cuore
Mmocca, pe te, me tremmanno
tutt' 'e pparole c’aggio murmurate
quanno stu core e st’anema
se turcèvano, strutte e nzanguinate;
e tòrnano. E me pareno
sciure adduruse, scelle ’e palummella,
stelle filante ca p' ’o cielo saglieno,
mutive antiche 'e na canzona bella...
Guarda che luce! Luceno
tutte l' uocchie d’ ’a gente, attuorno a me!
So' belle, ma n'appàssano
chist' uocchie miei ca luceno pe te!
Accussì canta, chisto core! E palpeta,
e sonna 'o suonno d' 'a Felicità...
Ma n' ata voce, trista, 'a dint' all' anema,
se sceta e dice: — Quanto durrarà?..
