Paggena:Poesie - Salvatore di Giacomo.djvu/310

'A Wikisource.
Vai alla navigazione Vai alla ricerca
Chesta paggena nun è stata leggiuta.
306
ariette e sunette

Che nuttata ! A ciento a ciento
comm a tante lucernelle,
stanno ncielo ’e stelle ’argiento
mmiez’ ’o cielo ’a luna sta...

E io rummnano a tavulino
c’ ’a fenesta aperta nfaccia,
c’ ’a ceroggena vicino,
comm a seie sett’anne fa.

Ll’una sona. E i' sto aspettanno
ca stu core, n’ata vota,
mme parlasse comm a tanno:
ma parlà nn' 'o sento cchiù...

Ncopp' 'a carta, pe tramente,
veco lucere quaccosa,
e doie lacreme cucente
sento ’a st’uocchie mieie cadé...

Che nuttata! A ciento a ciento,
comm a ttante lucernelle,
stanno ncielo ’e stelle argiento,
mmiez’ ’o cielo ’a luna sta...