Assunta. ’A cazettara.
Gnesella. Arta liggiera!…
Taniello. ’E ssiente quante ne stanno dicenno?..
Carmeniello. Lassa ’e dì, che te ne mporta!… A stu paese, ’e ’a penzà na cosa, accussì s’ausa… ’O cetrangolo spremmuto ce se dà nu caucio ’a coppa…
Taniello. (trattenuto da Carmeniello). Ma io…
Carmeniello. Ch’ ’e perzo ’a capa?… Lassa ’e dì!… (Taniello parla concitato con l’amico).
Gnesella. (ad Assunta) E vulite fernì ’e ce cuntà ’o fatto?…
Assunta. Sempe pe sentì dì, sora mia, ca po’ ’a verità ’a sape Dio!…
Nunziatina. E dicite chello che sapite.
Assunta. Sempe ’a stessa storia! Nu giovane chiammato Taniello, tanto tiempo fa, faceva ’ammore cu Rusella e, comme succede spisso e vulentiere, sta povera figliola cadette… Vuie mme capite… ’E prumesse d’ ’o nammurato…… Po’, ncapo a na settimana, fuie abbandunata.
Nunziatina. L’uommene fanno tutte accussì!
Gnesella. Faccio buono i’, ca ’e faccio spantecà!…
Assunta. Rusella, però, nun se perdette ’e curaggio, e doppo poco tiempo se truvaie Aniello, ca se n’annammuraie comme a nu pazzo.
Mimì. Mo’ accumencio a capì, ’o bi’!…
