D. Vito. Povera femmena!… E isso, povero guaglione, che ha appezzato ’a pelle!…
Forturella. Don Vi, ’o canusciveve?…
D. Vito. Comme! Eremo amice.
Tore. Mannaggia ’e ffemmene e chi ’e ccrede!… Se ne pozza perdere ’a semmenta!…
Gnesella. Schiavo ’o scellenza! Vuie ate uommene pure site na bella mercanzia…
Assunta. Aspé! Si vulimmo, ave ragione Tore: nun è sempe pe’ causa vosta ca succedono tanta guaie?…
Biase. Se capisce!
Mimì. ’A verità, Aniello ne puteva fa’ a meno ’e ne piglià na malatia… Nun ce steveno cchiù femmene a Napule?…
D. Vito. E già! ’O ragiunamento d’’o ciuccio!…
Mimì. Pecchè?…
D. Vito. Pecchè è bello chello ca ’o core piace… E a Aniello le piaceva Russella, e ’a vuleva overamente bene.
Assunta. Comme no!… L’avisseve avuto ’a vedè quanno Aniello sapette ca Rusella era stata disgraziata…..
Biase. E chi ce ’o dicette?…
Assunta. Chillo stesso ca aveva fatto ’o guaio.
Gnesella. Che nfamità!… E vuie ’a cunuscite a sta Rusella?…
Assunta. Comme!… Nun disprezzano, è na bella figliola overo…..
Mimì. E ch’arta faceva?…
