Paggena:Miseria e nobiltà.djvu/32

'A Wikisource.
Chesta paggena è stata leggiuta.
26
eduardo scarpetta

Conc. Lu soprabito tuio cu doie lenzole... Sta ancora la mappata intoppa a lu lietto»
Pasc.(prende l’ involto e si avvicina a Felice) Feliciè?
Fel. Aggio capito, aggio capito, e chesto stamme facenno ogne ghiuorno.
Pasc.Va da lu putecaro a la cantonata.
Fel. Quà cantonata?
Pasc.Da lu putecaro che sta a lu puntone.
Fel. E dì a lu puntone! Tu te ne viene cu la cantonata.
Pasc.Te faie dà nu chilo e mmiezo de lengue de passere, nun te fa dà li maccaruncielle pecchè io nun ne mangio.
Fel. Pascà cu sta famme che tiene, vaie penzanno pure a la qualità de la pasta?
Pasc.No, pecchè li maccaruncielle me fanno peso a lu stommeco.
Fel. Tu cu sta famme che tiene, te mungiarrisse pure li corde!
Pasc.Po’ te faie dà miezo quarto de nzogna buona... E lu zucchillo comme lu facimmo? Te faie dà miezo chilo de sacicce, e na buatta de pomidoro... Fatte dà na buatta grande, bona, pecchè io li maccarune li magno nquacchiate nquacchiate. Po’ rimmanimme asciutte asciutte?.. Te faie dà diece ova, doie ova pedono. Tu li doie ova toie te li magne? (Felice fa segno di sì). Te faie dà miezo chilo de mozzarella, pecchè io ova assolute nun l’aggio mangiato maie... Sempe ova e muzzarella! Te faie dà nu panetto de burro frisco, pecchè ll’ova e muzzarella se fanno cu lu burro, mai con la sugna. Te faie dà doie palate de pane e quatte frutte sicche, noci e