Chesta paggena è stata leggiuta.
24
eduardo scarpetta
me vo’ bene, e ccà nun nce vengo cchiù!.. Maie cchiù!.. (quasi piangendo va via di corsa).
Conc. (piangendo) Povero guaglione!
Pasc.(piangendo) Povera criatura!
Fel. Pascà, tu si brutto assaie’!.. Me pare na capa de morte!
Pasc.Chiammatelo! Chesto che cos’è?.. (va alla finestra e chiama) Peppeniè!.. Peppeniè!... Eh! chillo sta currenno de chella manera!..
Conc. Ha fatto buono che se n’è ghiuto!.. Povero piccerillo! Sempe maltrattato...
Luis. Vuie ntricateve de li fatto vuoste. Chiste songo affare che nun v’appartenene!
Conc. A me?!.. E chi nce risponne! È stato pecchè m’ha fatto cumpassione.
Luis. Iatevenne! Cumpassione?.. Viate chi ave cumpassione de vuie!
Conc. Luisè, mò accummience n’ata vota?.. Vi’ si la vuò fernì!
Luis. E vi’si la vuo fernì tu!.. Da stammatina me staie mettenno cu li spalle nfaccia a lu muro, tu e stu mamozio do mariteto!
Pasc.Ched’è, mò so’ mamozio?
Luis. (a Felice) Guè, sa che te dico! Dimane vide de trova na cammera, na puteca, pure nu suppigno, basta che ncè ne jammo da ccà.
Conc. E lu stesso dico pure a te! (urtando Pasquale cade addosso a Felice).
Fel. Va bene, dimane se ne parla, chesto che cos’è?.. Avite da fa sempe chiacchiere!
Pasc.A la fine non è stata na gran cosa, avimmo avuto dispiacere che se n’è ghiuto lu guaglione.
