Chesta paggena è stata leggiuta du' vote e mo è fernuta.
18
eduardo scarpetta
Conc. Tu che dice!.. E comme se fa ogge cu sta povera guagliona?.. Chella tene famma.
Pasc. E che aggio da fa? Anze, io me credeva che me faciveve truvà quatte maccarune.
Conc. E comme te lì faceva truvà?... Che m’è rimasto quacche cosa stammatina?
Pasc. Nun t’aggio rimasto niente, ma tu vedenno che s’era fatte tarde, putive fa nu pignetiello.
Conc. E nce vuleva che me lu dicive tu!... So’ ghiuta e aggio truvata l’agenzìa chiusa (Luisella ride).
Pup. Mammà, chella ride, la vedite?
Conc. Eh, se capisce!.. Mo’ D.a Luisella ave ragione de ridere, pecchè tu aspettave a pateto pe magnà, e io aspettava a maritemo, senza penzà che chisto nun è stato maie nè padre, nè marito.... È stato sempe nu sfaticato!
Pasc. Sà! si avimmo accummincià la solita storia, io aizo ncuollo e me ne vaco, pecchè bastantamente la vita che sto facenno!.. Po’ D. Luisella ne putarria fa lu meno de ridere... Quanno stammo a ridere... nuie putimmo ridere assaie ncoppa a li spalle soie!
Luis. Redite ncoppa a li spalle meie? Jatevenne, pezzentune!
Pasc. Pezzentune sì, ma onesti!... chello che nun songo ll’aute!
Luis. D. Pascà, parle comme haje da parlà, pecchè si no chello che nun aggio fatto a mugliereta, lu faccio a te!
Pasc. Già, tu si’ femmena, figlia mia, e cu te nun me pozzo mettere.
Conc. Te li buò sentere tu sti parole, pe la capa
