Chesta paggena è stata leggiuta.
miseria e nobiltà
Conc. No, lu guaio lu passo io!
Luis. No, lu passo io lu guaio!
Conc. No, io!
Luis. No, io!
Giac. No, lu guaio l'aggio passato io! (gridando) Vi’ che bello affitto che facette!
Conc. D. Giacchi', scusate che facimmo sti chiacchiere nnanze a buie?
Giac. Che me ne preme a me de li fatte vuoste! Io vengo per essere pagato, e non voglio chiù aspettà, chesta è l’ultima vota che so’ venuto, mò m’assetto ccà, e ccà faccio scurà notte. Quanno vèneno m'hanno da dicere chi ha da pagà, altrimenti mi avvalgo dei dritti che mi accorda la legge: prima e seconda citazione, poi sentenza, e poi sequestro! (guarda intorno). Eh!... E che sequestro ccà?! Chiste stanne cumbinate de chesta manera, nce so’ ancappato justo io! (siede). Che porcheria! Vintidoie lire a lu mese... Unnece lire pedono! Duie uommene che nun ponno caccià unnece lire a lu mese!.. E nun vulimmo pagà li doie lire a lu guardaporta—e nonsignore non le pagate. Nun vulimmo caccià nu soldo la sera pe lu lampione—e nun lu cacciate. Doie lire a lu mese nun li putimmo caccià pe l’acqua de Serino, nce jammo a tirà l’acqua dinto a lu palazzo derimpetto—fate come volete, nun cacciate manco sti doie lire, e ve facette chiudere lu rubinetto. Che altro doveva fare?.. So’ proprio truffatori... nun vonno pagà!
Luis. D.a Concè, quanno vene lu marito vuosto, m'avite fa spiegà che vonno di’ chelli parole che m'avite ditto.
