Chesta paggena è stata leggiuta.
8
eduardo scarpetta
Conc. Va bene, ve li facimmo spiegà.
Luis. Pecchè, capite, vuie site vecchia, e una cu buie nun se po’ mettere.
Conc. No, nun mporta che so' vecchia, quanno vuò parlà, parlammo.
Luis. E va bene, stasera parlammo, e si chillu turzo de mariteto se mette pe lu miezo, lu scommo de sango! (via).
Conc. Vattenne, scumme de sango!... Tu nun haje fatto maje niente... nun fa la ricca de vocca!
Pup. Va buono, mammà, fernitela mo’! (va alla finestra ).
Conc. Vedite chi ave lu coraggio de parlà... Na povera criatura de otto anne che la fa sta senza cammisa!... Chella, essa, nun l’è mugliera a D. Felice... la vera mugliera nun l’ è morta.... Stanno spartute da seie anne!... (a Gioacchino).
Giac. D.a Concè, a me chesto nun me preme, io sto penzanno a li cinche mesate, lassateme sta!
Pup. E papà nun se vede! Mammà, io tengo famma, io tengo famma!
Conc. Haje ragione, figlia mia, ma comme faccio?... D. Giacchi, mprestateme cinche lire, dimane ve li dongo.
Giac. Niente, D.a Concetta mia!! So’ asciuto cu duie centeserne dinta a la sacca.
Conc. E va bene, isso non se ritira, e io mò vaco a fa n’ auto pigno (apre il tiretto del comò). Stu soprabito niro e sti doie lenzole (fa un involto col fazzoletto). Pupè, io mò vengo lesto lesto, porto miezo ruotolo de maccarune pe nuie sole, doie custate, una a te e una a me, e nce magnammo tutte cose a la faccia lloro!
