Chesta paggena è stata leggiuta du' vote e mo è fernuta.
6
eduardo scarpetta
Conc. Eh! nun nc’ è male.
Giac. D. Pascale nun c’è?
Conc. Nonsignore, ancora s’ ha da ritirà.
Giac. Mò so’ li cinche manco nu quarto e ancora s’ha da ritirà?
Conc. Ancora s’ha da ritirà.
Giac. (a Luisella.) E D. Felice manco nce sta?
Luis. Nonsignore.
Giac. Eh! ma sapete, io nun pozzo jì e venì continuatamente, io tengo gli affari miei! Dite ai mariti vostri che me pagassero, si no nce ncuitammo seriamente, io avanzo cinque mesi di pigione, e non posso aspettare più.
Luis. Queste sono cose che a noi non ci riguardano, rivolgetevi a chi ha firmato l’affitto.
Giac. Va, bene, l’ affitto l’ ha firmato D. Pasquale, ma vuie abitate cu isso?
Luis. Che c’entra? Sempe D. Pascale ha da pagà.
Giac. D.a Concè, vuie sentite?
Conc. V’avarria da pagà D. Pascale sempe che vuie avisseve avuto fiducia de isso, ma vuie vulisteve lu garante, e per conseguenza il garante paga.
Luis. Lu garante ha da penzà pe’ me, e pe’ nu figlio che tene.
Conc. Caspita! E tu lu cure assaie chillu guaglione, lu faie jì senza cammisa!
Luis. E che nce aggio da penzà io?! Nce ha da penzà lu padre. Bastantamente chello che l’aggio fatto. A la fine po’ nun m’è figlio a me, è figlio a la primma mugliera.
Conc. Osia, osia, a la vera mugliera!
Luis. D.ª Concè, statte zitta, si no me faie passà nu guaio!
