Paggena:Lo cunto de li cunte - Tomo I.djvu/242

242

Trattenimiento X.

tolo de farina ashiorata, e no buono fiasco de mangiaguerra. E, tornato a la casa, mentre la mogliere, tutta affacennata, fece na bella pizza, isso frejette l’anguilla. Ed, essenno ogne cosa all’ordene, se sedettero a tavola; ma non foro accossì priesto sedute, che veccote lo pascono de lo compare a tozzolare la porta. Ed, afiacciatose Masella, e visto lo sconcecajuoco de li contiente loro, disse a lo marito: Cola Jacovo mio, mai s’appe ruotuolo de carne a la chianca de li guste umane, che non ce fosse la jonta dell’uosso de lo dispiacere; mai se dormette a lenzola janche de sfazione, senza quarche cemmece de travaglio; maje se fece colata de gusto, se non ce mattesse chioppeta de mala sfazione! Eccote nzoccato st’amaro muorzo, eccote annozzato ncanna sto magnare cacato! A la quale Cola Jacovo respose: Stipa ste cose, che stanno ntavola, squagliale, sporchiale, ncaforchiale, che non parano, e, pò, apre la porta, ca, trovanno sacchejato lo casale, fuorze averrà descrezzione de partirese priesto, e nce darrà luoco da strafocarence co sto poco de tuosseco! Masella, mentre lo compare sonava ad arme, e scampaniava a grolia, mpizzaje l’anguilla dereto a no repuosto, lo fiasco sotta lo lietto, e la pizza fra li matarazze. E Cola Jacovo se schiaffaje sotta la tavola, tenenno mente pe no pertuso de lo trappito, che pennoliava fi nterra. Lo compare, pe la chiavatura de la porta, vedde tutto sto trafeco; comme fu apierto, co na bella rasa, tutto sbagottuto e sorriesseto, trasette drinto; e, demannato da Masella, che l’era socciesso, disse: Mentre m’hai fatto stennerire cotanto spromiento e penzeniamiento fore