Paggena:Lo cunto de li cunte - Tomo I.djvu/241

241

Jornata II.

covernamette; date de mano a n’arciulo, e shioshiatolo, zorlatolo, devacatolo, trincatolo, e scolatolo tutto a no sbiato, fi che ne vedeva lo funno, se ne pigliava la strata a fare li fatte suoje, lassanno Cola Jacovo e Masella co no pai’mo de naso! Li quale, vedenno la poca descrezzione de lo compare, che, comme a sacco scosuto, se norcava, cannariava, ciancolava, ngorfeva, gliotteva, devacava, scervecchiava, piuzziava, arravogliava, scrofoniava, schianava, pettenava, sbatteva, smorfeva, ed arresediava quanto ne’ era a la tavola, non sapevano che fare, pe scrastarese da tuorno sta sangozuca, sta pittema cordiale, sto nfettamiento de vrache, sta cura d’agusto, sta mosca ntista, sta zecca fresa, sta susta -, sto sopra-uosso, sto pesone, sto cienzo perpetuo, sto purpo, sta sasina, sto pisemo, sta doglia de capo! E no vedevano mai cheli’ ora, na vota, magnare sciamprate, senza st’ajuto de costa, senza sta grassa de suvero Tanto che na mattina, avenno saputo ca lo compare era juto pe spalla de no commissario fora la terra. Cola Jacovo disse: che sia lau- dato lo solo lione, ca na vota, ncapo de ciento anne, ne’ è toccato de menare le masche, de dare lo portante a le ganasse, e de mettere sotta lo naso, senza tanto frusciamiento de tafanario; perzò, la corte me vo sfare, io sfare me voglio! Da sto munno de merda, tanto n’hai, quanto scippe co li diente! Priesto, allumma lo fuoco, che mo, che avimmo mazza franca da farece na bona pettenata, nce volimmo sgoliare de quarche cosa de gusto, e de quarche muorzo gliutto! Cossì decenno, corze ad accattare na bona anguilla de pantano, no ruo-