Paggena:Lo cunto de li cunte - Tomo I.djvu/218

218

Trattenimiento VII.

mardecenno la fortuna soja, che l’aveva strascinato a sto male passo! Filadoro, dall’autra parte, lo consolava, decennole, che stesse de buono armo, ca essa noe averria puosto lo propio sango pe l’ajutare, e che non deverà chiammare marvasa la sciorte, che l’aveva connutto a chella casa, dove era cossì sbisciolatamente da essa amato, e che mostrava poco scagno a l’ammore sujo, mentre stava accossì desperato de sto socciesso. A la quale respondette lo prencepe: No me spiace l’essere sciso da lo cavallo all’aseno, né l’avere cagnato lo palazzo riale co sto cafuorchio, li banchotte vannute co no tuozzo de pane, lo cortiggio de serveture co servire a staglio, lo scettro co na zappa, lo fare atterrire l’asserzete, co vedereme atterrato da na brutta cajorda ; perchè tutte le desgrazie meje stimarria a ventura co starece tu presente, e schiuderete co st’occhie. Ma chello, che me spercia lo core, è che aggio da zappare, e sputareme ciento vote le mano, dove sdegnava de sputareme na petinia, e, cot-pejo, aggio da fare tanto, che non ce vastarria tutto no juorno no paro de vuoje; e, si no scompo sta sera lo fatte festa, sarraggio cannariato da mammata; ed io non tanto averraggio tormiento de scrastareme da sto nigro cuorpo, quanto de scantoniareme da ssa bella perzona! Cossì dicendo, jettava li selluzze a cuofano, e le lagreme a botta fascio. Ma Filadoro, asciucannole l’uocchie, le disse: Non credere, vita mia, ch’aggo da lavorare autro territorio, che l’uorto d’ammore, né dobotare che mammama te tocche no pilo schitto de ssa persona! Agge Eiladoro, e non dubitare; ca, si no lo saje, io so