Paggena:Lo cunto de li cunte - Tomo I.djvu/217

217

Jornata II.

tiello de la paura, che sbennegnava li piette; l’uocchie erano comete, che predecevano tremmolicce de gamme, vermenare de core, jajo de spirete, filatorie d’arme, e cacarelle de cuorpo; pecca portava lo terrore ne la facce, lo spaviento ne l’occhiatura, lo schianto ne li passe, la cacavessa ne le parole; era la vocca sannuta com’a puorco, granne comm’a scorfano, steva comm’a chi pate de descenzo, vavosa comm’a mula; nsomma, da la capo a lo pede vedive no destellato de bruttezza, no spetale de struppie! Tanto che lo prencepe doveva cierto portare quarche storia de Marco e Shiorella cosute a lo jeppone, che no spiretaje a sta vista. La quale, dato de mano a lo corzetto de Nardo Aniello, disse: Auza la corte, auciello, auciello. maneca de fierro! Testemmonia vosta!, — respose lo prencepe — ; arreto canaglia!; e voze mettere mano a la spata, ch’era na lopa vecchia. Ma restaje comm’a na pecora, quanno ha visto lo lupo, che non se potte movere, né pipitare; de manera che fu carriato, coram’aseno pe capezza, a la casa dell’orca. La quale, subbeto che fu arrevata, le disse: Attienne buono a faticare, comm’a no cane, si non vuoje morire comm’a no puorco! E, pe lo primmo servizio, fa che, pe tutt’oje, sia zappato e semmenato sto muojo de terreno nchiano de sta cammera; e sta ncellevriello, ca, si torno sta sera, e non trovo fornuto lo lavoro, io me te gliotto! E, ditto a la figlia, che attennesse a la casa, se ne jette a scommerzione co l’autre orche drinto a lo vosco. Nardo Aniello, che se vedde arreddutto a sto male termene, commenzaje ad allavaniarese lo pietto de chianto,