Paggena:Lo cunto de li cunte - Tomo I.djvu/219

219

Jornata II.

fatata, e pozzo quagliare l’acqua, e scurare lo sole. Vasta e suffece!; perzò, stamme allegramente, ca sta sera se trovarrà zappato e semmenato lo terreno, senza che nce dinghe no cuorpo! Sentenno chesto Nardo Aniello, disse: Si tu si fatata, comme dice, o bellezza de lo munno, perchè non ce ne sfrattammo da sto pajese, ca te voglio tenere comme naregina a la casa de patremo? E Filadoro respose: Na certa chelleta de stelle sconceca" sto juoco; ma passerrà fra poco sto nfruscio, e starrimmo felice. Tra chiste mille autre duce ragionamiente, passaje lo juorno; e, venenno l’orca de fora, chiammaje da la strata la figlia, decenno: Filadoro, cala sti capille!; perchè, essendo senza scala la casa, sempre se ne saglieva pe le trezze de la figlia. E Filadoro, sentuto la voce de la mamma, guastannose la capo, calaje li capille, facenno scala d’oro ano core de fierro; che, subeto sagliuta ncoppa, corze all’uorto, e, trovatolo covernato, restajo fora de li panne, parennole mpossibele, che no giovane dellecato avesse fatto sta fatica de cane. Ma non fa cossì priesto l’autra matina scinto lo sole a sciauriarese pe l’umeto pigliato a lo shiummo dell’Innia, che la vecchia tornaje a scenneresenne, lassanno ditto ad Antoniello, che le facesse trovare la sera spaccate sei canne de legna a quatto pe piezzo, ch’erano drinto a no cammarone; si no, l’averria adacciato comm’a lardo, e fattone no piccatiglio (pe collazione la sera. Lo nigro prencepe, sentuto sta ntimazione de decreto, appe a morire spantecato; e Filadoro, vedennolo muorto e spalleto, le disse: Comme sì cacasotta!, ben aggia