Paggena:Lo cunto de li cunte - Tomo I.djvu/216

'A Wikisource.
Chesta paggena nun è stata leggiuta.
216
Trattenimiento VII.

laude, che m’avite dato; ca io so femmena, che me mesuro, né voglio ch’antro me serva de mezacanna! Ma, tale quale songo, bella brutta, nizzola o janca, o sfrisata o chiantuta, pueceta o petosa, o cernia o fata, o pipatella o votracone, io songo tutta a lo commanno vuostro; pecca sso bello taglio d’ommo m’ha follato lo core, ssa bella cera de conte m’ha passato dall’uno all’antro canto, e me te do pe schiavottela ncatenata, da mo pe sempre! Non foro parole cheste, ma sonata de trommetta, che chiammaje lo prencepe tutte a tavola de li contiente amoruse, anze lo scetaje co no tutte a cavallo a la vattaglia d’ammore. E, vedennose dato no dito d’amorosanza, se pigliaje la mano, vasanno la vorpara d’avolio, che l’aveva ncroccato lo core. Filadoro, a sta zeremonia de prencepe, fece na facce de marchesa, anze fece na facce de tavolozza de pettore; dove se vedde na mesca de minio de vregogna, de ceraso de paura, de verderame de speranze, de cenabrio de desiderio. Ma, tanno voleva Nardo Aniello asseconnare, quanno le fu nzoccato lo dire, perchè a sta negra vita non c’è vino de sfazione senza feccia de desgusto, non e’ è bruodo grasso de contento senza scumma de desgrazia. Chè, mentre steva a lo meglio, eccote de vrocca la mamma de Filadoro; la quale era n’orca accessì brutta, che la fece la natura pe lo modiello de li scurce. Aveva li capille comme a na scopa de vrusco, non già ped annettare le case de folinie e ragnatele, ma pe annegrecare ed affommare li core; la fronte era de preta de Genova, pe dare lo taglio a lo cor-