Giovanni — Trase, Peppene’.
Peppenella — Don Salvatore tene baccalà in bianco e custatelle ’e piecoro[1]
Giovanni (energico) — No, niente piecoro. (Pausa) Manco comme magna’[2] ha da trasi’ ’o piecoro dint’ ’a casa mia. (Pausa) E niente baccalà. (Carluccio guarda male Peppenella che, con un’occhiata, giustifica la sua involontaria colpa).
Peppenella — E allora?
Giovanni — Nun voglio niente.
Peppenella — Ve cuccate[3] diuno?
Giovanni — Pe’ na notte, nun se more. (Pausa) Si cchiu tarde tengo famma[4], scengo io. Tanto stanotte, che vvuo’ durmi’?
Peppenella (con prepotenza cordiale) — Io mo v’ordino ’e maccarune, e n’ata cosa a piacere!
Giovanni (le afferra un braccio) — Gué!
Peppenella (si svincola, decisamente) — Niente, avit’a mangia’. Pe’ tutto ’o riesto, mme date na voce. Tanto, io primma ’e ll’una, nun me cocco! (Esce in fretta).
Giovanni (si accende un mezzo sigaro, siede, poi) — Carlu’, nun te ’nzura’!
Carluccio — Manco si me sparano!
Giovanni — Na femmena te saglie ’e sette ciele… Na femmena te sprufonna sotto terra. Te fa ammarcia’[5] a n’ommo a fronte aizata[6], ca tutt’’a ggente dice: «Jh che ommo è chillo» O t’ ’o fa sta’ cu’a capa ’mmiez’ ’e scelle[7], comme a nu palummo[8]… (Ride, amaro) Cheste so’ ’e cose ’e pazze, Carlu’! (Pausa) E cosi: eccomi qua, doppo na jurnata ’e fatica: senza appetito, senza suonno, senza pace… e quann’è all’urdemo[9] pure senza… ll’onore!! (Ride ancora).
Carluccio (serio) — Ah, no: senza ll’onore, nun l’avit’a dicere!
Giovanni — E che ’o ddich’io? ’O ddiceno ll’ate! Chisto è ’o munno[10]! Cosi vuole la società! Na femmena se mantene bbona[11]? ll’ommo é onesto! Lle fa nu tuorto? ll’ommo è scurnacchiato[12]! Io nun ce pozzo penza’… Vedite ’o Padreterno addo’ ll’é gghiuto a mettere st’onore ’e ll’ommo! (Pausa) Adda’ ca, sicondo me, ll’onore ’e ll’ommo avarri’a essere comme ’o dulore ’e panza: chi ’o tene, ’o tene. (Pausa) Oh, e mettiamo ca uno invece ’e ll’onore tene ’o disonore… E ch’è fatta na malatia infettiva, ca uno che ’a piglia, ’a mmesca a[13] tutt’ ’a famiglia? Ma faciteme ’o favore! (Pausa).
- ↑ Custatelle ’e piecoro: costolette di pecora
- ↑ Comme magna’: come mangiare
- ↑ Cuccate: coricate
- ↑ Famma: fame
- ↑ Ammarcia’: marciare
- ↑ A fronte aizata: a testa alta
- ↑ Cu ‘a capa ’mmiez’ ’e scelle: con la testa bassa, mortificato
- ↑ Palummo: colombo
- ↑ All’urdemo: all’ultimo
- ↑ ’o munno: il mondo
- ↑ Bbona: buona, onesta
- ↑ Scurnacchiato: ampiamente cornificato
- ↑ ’a mmesca a: contagia
