398
zeppole, e le friarraje, o co l'uoglio, o co la nzogna, che veneno meglio, attiento che la tiella s'avesse da bbruscià; po co no spruoccolo appuntuto le pugnarraje pe farle squiglià, e farle veni vacante da dinto; l'accuonce dinto a lo piatto co zuccaro, e mele.
Pe farle venì chiù tennere farraje la pasta na jurnata primma.
Piglia na carrafa de latte buono, e frisco, nce miette no terzo de zuccaro fino asciorato, seje ossa d'ova fresche, cinc'onze de posema, na carrafa d'acqua fresca, no pocorillo pocorillo de sale, e na crattatura de limone o purtuallo, mmesca buono ogne ncosa co la mano facenno tutto sfarenà; po llo passe pe lo setaccio e lo miette dint'a na cazzarola ncoppa a lo fuoco nò tanto forte, e co na cocchiara de ligno, sempe nova, lo buote sempe da no lato; quanno s'è astregnuto lo levarraje, e lo miette dint'a no piatto, co la cannella fina pe coppa.
Piglia no ruotolo de sanco de puorco tanno scannato, e pecchè chesto subeto se quaglia, l'aje da manià co le mmane, pe levarene la spogna, che nce sta dinto, lo miette dinto a na cazzarola, nce miette na meza libbra de ceccolata cotta, miezo ruotolo de zuccaro fino buono pistato, doje grana de cannella fina, quatto grana de cetronala ntretata, quatto grana de cocozzata pur'accossi, no mustacciuolo pistato, e mettarraje a cocere tutto nsieme a fuoco lento lento, votanno
